ଗଜପତି,୨୧।୫(ଗିରିଧାରୀ ପରିଛା): ଡାକ୍ତର, ଫାର୍ମାସିଷ୍ଟ ଓ ସ୍ୱାସ୍ଥ୍ୟକର୍ମଚାରୀ ଅଭାବ ହେତୁ ଗୋଶାଣି ବ୍ଲକ ଗାରାବନ୍ଧ ଗ୍ରାମରେ ରାଜରାସ୍ତାକୁ ଓହ୍ଲାଇଲେ ଲୋକେ । ଦୋକାନ ବନ୍ଦ କରିବା ସହିତ ରାସ୍ତାରୋକୋ କରିଛନ୍ତି ।
ନିୟମିତ ଡାକ୍ତର, ଫାର୍ମାସିଷ୍ଟ ନିଯୁକ୍ତ ଓ ୨୪ ଘଣ୍ଟିଆ ପ୍ରାଥମିକ ସ୍ୱସ୍ଥ୍ୟକେନ୍ଦ୍ର ଖୋଲା ରଖିବା ଦାବିରେ ଲୋକେ ଆନ୍ଦୋଳନରେ ବସିଛନ୍ତି । ଗତ ଏପ୍ରିଲ ମାସରେ ଡାକ୍ତର ଅଭାବକୁ କେନ୍ଦ୍ରକରି ପ୍ରାଥମିକ ସ୍ୱସ୍ଥ୍ୟ କେନ୍ଦ୍ରରେ ତାଲା ପକାଇ ଲୋକେ ଆନ୍ଦୋଳନ କରିଥିଲେ । ସେହିସମୟରେ ପ୍ରଶାସନ ପକ୍ଷରୁ ଡାକ୍ତର ଯୋଗାଇ ଦିଆଯିବ ବୋଲି ପ୍ରତିଶୃତି ଦେବାପରେ ଲୋକେ ଆନ୍ଦୋଳନରୁ ଓହରିଥିଲେ । ହେଲେ ଆଜିଯାଏ କୌଣସି ଡାକ୍ତର, ଫାର୍ମାସିଷ୍ଟ, ସ୍ୱସ୍ଥ୍ୟକର୍ମୀ କାହାର ନିଯୁକ୍ତି ହୋଇନଥିବା ହେତୁ ଗାରବନ୍ଧା ଗ୍ରାମ ଲୋକେ ଆଜି ସ୍ୱତଃପ୍ରବୃତ୍ତ ଭାବେ ଦୋକାନବଜାର ବନ୍ଦ କରି ଆନ୍ଦୋଳନକୁ ଓହ୍ଲାଇଛନ୍ତି ।
କୋୖଣସି ନିର୍ଭରଶୀଳ ପ୍ରତିଶୃତି ନମିଳିବା ଯାଏ ଆନ୍ଦୋଳନ ଜାରିରହିବ ବୋଲି ଲୋକେ ଜିଦରେ ରାସ୍ତାରୋକୋ କରି ବସିଛନ୍ତି । ଫଳରେ ଆନ୍ଧ୍ରପଟୁ ବ୍ରହ୍ମପୁର ଯିବା ମୁଖ୍ୟରାସ୍ତାରେ ଗାଡି ଚଳାଚଳ ସମ୍ପୁର୍ଣ୍ଣ ଭାବେ ଠପ୍ ହୋଇଯାଇଛି ।