ତୁମୁଡିବନ୍ଧ,୨୨ା୯(ଦୀପକ କୁମାର ପରାସେଠ): କନ୍ଧମାଳ ଜିଲା ତୁମୁଡିବନ୍ଧ ବ୍ଲକ ଅନ୍ତର୍ଗତ ଗୁମା ପଞ୍ଚାୟତର ଡୁପି ଗ୍ରାମରେ ପ୍ରଦାତା ସେବା ସଂସ୍ଥାର ସମ୍ପାଦକ ପ୍ରଦୀପ ଦାସଙ୍କ ନେତୃତ୍ୱରେ ବିକାଶ ଅଂଶୀଦାରମାନଙ୍କ ଏକ ବୈଠକ ହୋଇଥିଲା। ଏଥିରେ ଆଦିମ ଜନଜାତି କୁଟିଆ ସମ୍ପ୍ରଦାୟର ଦୁଇ ପଞ୍ଚାୟତର ୧୫ଟି ଗ୍ରାମର ଅଧିବାସୀ ଉପସ୍ଥିତ ଥିଲେ। ସରକାରୀ କର୍ମଚାରୀ ଭାବେ ବେଲଘର ବନ ବିଭାଗ ବନପାଳ ନିରାକାର ସାହୁ, ତୁମୁଡିବନ୍ଧ ବ୍ଲକ ପ୍ରାଣୀ ସମ୍ପଦ ବିଭାଗର ଡ. ମଙ୍ଗଲଗିରି ରାହୁଲ, ତହସିଲ କାର୍ଯ୍ୟାଳୟମ୍ରୁ ଏଫଆରଏ ସଂଯୋଜକ ଦେବକୀ ବଡସେଟ, ଗୁମା ସରପଞ୍ଚ ସସ୍ମିତା ମାଝୀ, ବେଲଘର ସରପଞ୍ଚ ଗୋବିନ୍ଦ ଚନ୍ଦ୍ର ମାଝୀ ଏବଂ ଝିରିପାନି ସରପଞ୍ଚ କାନ୍ତି ପାତ୍ର, ଡୁପି ଗ୍ରାମର ୱାର୍ଡସଭ୍ୟ ମମତା ମାନସେଠ୍ ଉପସ୍ଥିତ ଥିଲେ। ଉପସ୍ଥିତ ଅଧିକାରୀ ମାନେ ନିଜ ବିଭାଗରେ ହେଉଥିବା ବିଭିନ୍ନ ଯୋଜନା ବିଷୟରେ ସୂଚନା ଦେଇ ଏଥିରୁ ମିଳୁଥିବା ସୁବିଧା ସୁଯୋଗ ସମ୍ପର୍କରେ ବେଅଠକରେ ଆଲୋଚନା କରିଥିଲେ। ବନ ବିଭାଗର ନିରାକାର ସାହୁ କହିଥିଲେ, ଜୀବିକା ପାଇଁ ଜଙ୍ଗଲ କାଟିଲେ ଆମେ ବହୁ ସମସ୍ୟାର ସମ୍ମୁଖିନ ହେଉଛେ। ଜଙ୍ଗଲକୁ ସୁରକ୍ଷା ଦେଇ କିପରି ବଞ୍ଚାଇବା ସେନେଇ ବୁଝାଇଥିଲେ। ପ୍ରାଣୀ ସମ୍ପଦ ବିଭାଗର ଡ. ମଙ୍ଗଲଗିରି ରାହୁଲ କହିଲେ, ପ୍ରାଣୀ ସମ୍ପଦ ଉପରେ ସରକାର ବିଭିନ୍ନ ଯୋଜନା ତିଆରି କରିଛନ୍ତି। ସେହି ଯୋଜନାରେ ଚାଷ କଲେ କିପରି ରିହାତି ସୁବିଧା ପାଇବା ସେ ନେଇ ବୁଝାଇଥିଲେ। ଏଫଆରଏ ସଂଯୋଜିକା ଦେବକୀ ବଡ଼ସେଠ ଆଦିବାସୀମାନେ ଜଙ୍ଗଲ ଜମି ଅଧିକାର ଆଇନରେ କିପରି ପଟ୍ଟା ପାଇବେ ସେ ନେଇ ବୁଝାଇଥିଲେ।
