ବଣାଇଁ,୪।୯(ପ୍ରଦୀପ ତ୍ରିପାଠୀ): ସୁନ୍ଦରଗଡ଼ ଜିଲା ବଣାଇଁ ଥାନା ଅନ୍ତର୍ଗତ ଗୋବିନ୍ଦପୁର ପଞ୍ଚାୟତ କାର୍ଯ୍ୟାଳୟ ପରିସରରେ ଏକ ଓଏସଆର୍ଟିସି (ମୁଖ୍ୟମନ୍ତ୍ରୀ ବସ ସେବା) ବସକୁ ବନ୍ଧକ ରଖିଛନ୍ତି ଗ୍ରାମବାସୀ l ଦୀର୍ଘ ଦିନ ହେବ ଗୋବିନ୍ଦପୁର ପଞ୍ଚାୟତବାସୀ ତାଙ୍କ ଗ୍ରାମକୁ ତତ୍କାଳୀନ ଲକ୍ଷ୍ମୀ ବସ ବା ଆଜିର ମୁଖ୍ୟମନ୍ତ୍ରୀ ବସ ଚାଲିବା ଦାବି କରି ଆସୁଥିଲେ ହେଁ ପ୍ରଶାସନ ନୀରବ ରହିଥିଲା l ଏଥିନେଇ ଜିଲାପାଳଙ୍କଠାରୁ ଆରମ୍ଭ କରି ବଣାଇଁ ବିଡିଓଙ୍କ ପର୍ଯ୍ୟନ୍ତ ଦାବି କରୁଥିଲେ ହେଁ ସୁଫଳ ନ ମିଳିବାରୁ ଗତ ୧୯ ତାରିଖ ଦିନ ଲହୁଣୀପଡ଼ା ଠାରେ ସୁନ୍ଦରଗଡ଼ ଜିଲାପାଳଙ୍କ ଯୁଗ୍ମ ଅଭିଯୋଗ ଶୁଣାଣି ଥିବାରୁ ସେଠାରେ ଜିଲାପାଳଙ୍କୁ ପୁନଃ ଅଭିଯୋଗ କରି ଅଗଷ୍ଟ ୨ ତାରିଖ ମଙ୍ଗଳବାର ମଧ୍ୟରେ ପ୍ରଶାସନ ନିଷ୍ପତ୍ତି ନ ନେଲେ ୩ ତାରିଖ ୧୪୩ ନମ୍ବର ଜାତୀୟ ରାଜପଥ ଅବରୋଧ କରିବେ ବୋଲି କହିଥିଲେ l
ଗତକାଲି ଓଏସଆର୍ଟିସି ବସଟି ଗୋବିନ୍ଦପୁର ଯାଇଥିଲା, ଏପରିକି ପଞ୍ଚାୟତର ମହିଳାମାନେ ଫୁଲ ଚନ୍ଦନ ଦେଇ ପୂଜାର୍ଚ୍ଚନା କରି ଗାଁକୁ ନେଇଥିଲେ l ପଞ୍ଚାୟତ କାର୍ଯ୍ୟାଳୟ ସମ୍ମୁଖରୁ ବସ ପୁଣି ପଛକୁ ଫେରି ଆସିବା ସମୟରେ ଶତାଧିକ ଗ୍ରାମବାସୀ ବସକୁ ଅଟକ ରଖି ପଞ୍ଚାୟତ କାର୍ଯ୍ୟାଳୟ ପରିସରରେ ରଖିଛନ୍ତି ଗାଁ ଦେଇ ବସ ଚାଲିବା ଦାବିରେ ଅଟଳ ରହି ଆମକୁ ବସ ଦିଅ ତମ ବସ ନିଅ କହୁଛନ୍ତି ଗ୍ରାମବାସୀ l ଏତେ ସମୟ ଧରି ଝାମେଲା ଚାଲିଥିଲେ ମଧ୍ୟ ନାଁ ପ୍ରଶାସକ ନାଁ ପୋଲିସ କେହି ଗ୍ରାମକୁ ପହଁଞ୍ଚିନାହାନ୍ତି I ଅପରପକ୍ଷରେ ପୂର୍ବ ସରକାର ମହିଳାଙ୍କ ସୁବିଧା ପାଇଁ ଆରମ୍ଭ କରିଥିବା ଯୋଜନା ଲକ୍ଷ୍ମୀ ବସକୁ ନାମ ପରିବର୍ତ୍ତନ କରିଦେଲେ ସେବା ମିଳେ ନାହିଁ, ନବୀନ ପଟ୍ଟନାୟକଙ୍କ ମାନସିକତାକୁ କପି ପେଷ୍ଟ କଲେ ସେବା ମିଳନ୍ତା ବୋଲି ମତ ଦେଇଛନ୍ତି l
