ହାଟଡ଼ିହୀ,୨୫।୧୦(ଶୁଭକାନ୍ତ ନାୟକ): କେନ୍ଦୁଝର ଜିଲା ହାଟଡ଼ିହୀ ବ୍ଲକ୍ ଆମ୍ବୋ ପଞ୍ଚାୟତ କରଗୋଳା ବୈତରଣୀ ନଦୀ ବାଲିଘାଟରୁ ବାଲି ଚୋରାଚାଲାଣକୁ ନେଇ ପରିସ୍ଥିତି ଦିନକୁ ଦିନ ଜଟିଳ ହେଉଛି। ଶୁକ୍ରବାର ବେଆଇନ ବାଲି ପରିବହନକୁ ବିରୋଧ କରି ସ୍ଥାନୀୟ ଲୋକେ, ଭାଜପା ନେତା ଯଜ୍ଞ ପ୍ରସାଦ ସାହୁ ଏବଂ ଅନ୍ୟମାନେ ରାତିସାରା ବାଲି ସତ୍ୟାଗ୍ରହ ଆନ୍ଦୋଳନରେ ବସିଥିଲେ। ମାଫିଆଙ୍କ କବଳରୁ ନିଜକୁ ରକ୍ଷା କରିବା ପାଇଁ ଠେଙ୍ଗା, ବାଡ଼ି ଧରି ବାଲିଘାଟ ଜଗିଥିଲେ। ରାତିରେ ବାଲି ମାଫିଆମାନେ ଘାଟକୁ ଗାଡ଼ି ନେଇ ଯାଇଥିବା ବେଳେ ଲୋକଙ୍କ ସହ ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଥିଲା। ପୋଲିସ ପହଞ୍ଚତ୍ବା ପରେ ବାଲି ମାଫିଆ ଗାଡି ଧରି ଘଟଣାସ୍ଥଳରୁ ପଳାଇଥିଲେ।
ସୂଚନା ଯୋଗ୍ୟ, କିଛି ଦିନପୂର୍ବେ ବାଲିଘାଟକୁ ଯାଇଥିବା ବେଳେ ହାଟଡ଼ିହୀ ତହସିଲଦାର, ଖଣି ବିଭାଗ କର୍ମଚାରୀଙ୍କୁ ମାଫିଆମାନେ ହତ୍ୟା ଧମକ ଦେଇଥିଲେ। କାର୍ଯ୍ୟାନୁଷ୍ଠାନ ସମ୍ପର୍କିତ ସୂଚନା ଅଦ୍ୟାବଧି ସ୍ପଷ୍ଟ ହୋଇପାରିନି। ଏବେ ବାଲି ଚୋରିକୁ ରୋକିବା ପାଇଁ ବାଲି ସତ୍ୟାଗ୍ରହ ଚାଲିଥିବା ବେଳେ ରାତି ସମୟରେ ବାଲି ମାଫିଆ ସକ୍ରିୟ ହେଉଛନ୍ତି। ତେବେ ଉକ୍ତ ବାଲି ଚୋରାଚାଲାଣ ପ୍ରସଙ୍ଗକୁ ନେଇ ଆସନ୍ତା ଦିନରେ ଆଇନଶୃଙ୍ଖଳା ପରିସ୍ଥିତି ଉପୁଜିବା ସମ୍ଭାବନାକୁ ଏଡ଼ାଇ ଦିଆଯାଇ ନ ପାରେ। ଖଣି ଅଧିକାରୀ ତାରିଣୀ ସିଂ କହିଛନ୍ତି, ବେଆଇନ ବାଲି ଚୋରାଚାଲାଣ ରୋକିବା ନେଇ ଲୋକମାନେ ଧାରଣା ଦେଇଥିଲେ। ପରେ ଉକ୍ତ ବାଲିଘାଟ ରାସ୍ତାରେ ବଡ଼ ଟ୍ରେଞ୍ଚ ଖୋଳାଯାଇଥିଲା। କିନ୍ତୁ ଟ୍ରେଞ୍ଚକୁ ପୋତି ପୁଣି ବାଲି ଚୋରାଚାଲାଣ ହେଉଛି। ଏ ବାବଦରେ ନନ୍ଦିପଦା ଥାନାରେ ଅଭିଯୋଗ କରାଯାଇଛି। ଆନନ୍ଦପୁର ଉପଜିଲାପାଳ ନୀଳ ମାଧବ ସୁନା କହିଛନ୍ତି, ଖଣି ବିଭାଗ ସହ କଥାହୋଇ ପଦକ୍ଷେପ ନିଆଯିବ। ଆନନ୍ଦପୁର ଡିଏସ୍ପି ପ୍ରଶାନ୍ତ ବେହେରା କହିଛନ୍ତି, ବାଲିଘାଟରେ ୨ ଗୋଷ୍ଠୀଙ୍କ ମଧ୍ୟରେ ସଂଘର୍ଷ ଆଶା କରି ଆନନ୍ଦପୁର ବିଧାୟକ ଅଭିମନ୍ୟୁ ସେଠୀ ଜଣାଇଥିଲେ। ପରେ ନନ୍ଦିପଦା ପୋଲିସକୁ ଘଟଣାସ୍ଥଳକୁ ଯିବାକୁ କହିଥିଲେ। ପୋଲିସ ସେଠାକୁ ଯାଇ ପରିସ୍ଥିତି ଉପରେ ନଜର ରଖିଥିଲା। ବିଜେଡି ବିଧାୟକ ଅଭିମନ୍ୟୁ ସେଠୀ କହିଛନ୍ତି, ବାଲି ମାଫିଆମାନେ ପ୍ରଶାସନ ସହଯୋଗରେ ବାଲି ଚୋରାଚାଲାଣ କରୁଛନ୍ତି। ପୂର୍ବତନ କଂଗ୍ରେସ ବିଧାୟକ ଜୟଦେବ ଜେନା ସୋସିଆଲ ମିଡିଆରେ ବାଲି ଚୋରାଚାଲାଣକୁ ବିରୋଧୀ କରିଛନ୍ତି। ପ୍ରକାଶଯୋଗ୍ୟ, କିଛି ବର୍ଷ ପୂର୍ବେ ବାଲି ଚାଲାଣକୁ ନେଇ ସମଣା ପୂର୍ବତନ ସରପଞ୍ଚ ବୈଷ୍ଣବ ବିଶ୍ୱାଳଙ୍କୁ ଦିନରେ ହାଣି ହତ୍ୟା କରାଯାଇଥିଲା।
