ଫୁଲବାଣୀ ଅଫିସ, ୧୪।୮: ଲଘୁଚାପ ଜନିତ ପ୍ରବଳ ବର୍ଷା ଯୋଗୁ କନ୍ଧମାଳ ଜିଲାରେ ଜନଜୀବନ ଅସ୍ତବ୍ୟସ୍ତ ହୋଇପଡିଛି ା ଚକାପାଦ ବ୍ଲକ ରାଇପଦା-ଜୁଇଖୋଲ ଗ୍ରାମକୁ ସଂଯୋଗ କରୁଥିବା ବୃତଙ୍ଗ ନଦୀର କାଠ ପୋଲ ଭାସିଯାଇଛି। ଫଳରେ ଯୋଗାଯୋଗ ସଂପୂର୍ଣ୍ଣ ବିଚ୍ଛିନ୍ନ ହୋଇଯାଇଛି। ଜିଲାର ତଳିଆ ଅଞ୍ଚଳ ଗୁଡ଼ିକ ଅଧିକ ପ୍ରଭାବିତ ହୋଇଛି ା ଅଧିକାଂଶ ସ୍ଥାନରେ ନଦୀ ଉପରେ ପୋଲ ନ ଥିବାରୁ ବର୍ଷା ଜଳ ପ୍ରଭାବରେ ଲୋକେ ବାହ୍ୟ ଜଗତରୁ ବିଚ୍ଛିନ୍ନ ହୋଇ ରହିଛନ୍ତି ା
ଚକାପାଦ ବ୍ଲକ ଅଞ୍ଚଳରେ ମୂଷଳ ଧାରାରେ ବର୍ଷା ଯୋଗୁ ବ୍ୟାଙ୍କ ସାହିବାସିନ୍ଦା ଜଳବନ୍ଧୀ ଭାବେ ରହିଛନ୍ତି। ସାହି ଭିତରେ ବର୍ଷା ପାଣି ଲହଡ଼ି ମାରିବା ସହିତ ବହୁ ଲୋକଙ୍କ ଘରେ ମଧ୍ୟ ବର୍ଷା ପାଣି ପଶିଯାଇଛି ା କିଛି କଚ୍ଚା ଘର ବର୍ଷା ପାଣିରେ କ୍ଷତିଗ୍ରସ୍ତ ହୋଇଛି ା ରାଇପଦା-ଜୁଇଖୋଲ ଗ୍ରାମକୁ ସଂଯୋଗ କରୁଥିବା ବୃତଙ୍ଗ ନଦୀରେ କାଠ ପୋଲ ବନ୍ୟ ଜଳରେ ଭାସି ଯିବାରୁ ଜୁଇଖୋଲ ଗ୍ରାମକୁ ଯୋଗାଯୋଗ ବିଛିନ୍ନ ହୋଇଛି ା ଗ୍ରାମବାସୀ ବିପଦସଂକୁଳ ଭାବେ ନଦୀର ବଢ଼ି ପାଣି ଭିତରେ ପଶି ଯାତାୟାତ କରୁଛନ୍ତି ା
ଫିରିଙ୍ଗିଆ ବ୍ଲକ ଡିଣ୍ଡିରାଗାଁ ପଞ୍ଚାୟତ ଗାଟେଣୀ ନାଳ ଉପରେ ଥିବା ପୋଲ ବହୁ ଦିନରୁ ଭାଙ୍ଗିଯାଇଛି ା ନାଳରେ ଅଧିକ ପାଣି ଯୋଗୁ ଟେଲାପାଲି, ଶିକୁଳିପଦର ଗ୍ରାମର ଲୋକେ ବିଚ୍ଛିନ୍ନ ହୋଇ ରହିଛନ୍ତିା ଏହି ଦୁଇଟି ଗ୍ରାମରେ ପ୍ରାୟ ୪୦ରୁ ଊର୍ଦ୍ଧ୍ୱ ପରିବାର ଦୁଇ ଦିନ ହେବ ବହୁ ହଇରାଣ ହେଉଛନ୍ତି ା ସେହିପରି ପାଙ୍ଗାଉପର ସାହି ପଞ୍ଚାୟତର ୫ଟି ଗାଁ ମଧ୍ୟ ବାହ୍ୟଜଗତରୁ ବିଚ୍ଛିନ୍ନ ହୋଇରହିଛି ା ବାଘ ନଦୀରେ ଥିବା କାଠ ପୋଲ ବନ୍ୟା ଜଳରେ ଭାସି ଯାଇଥିବାରୁ ପରିସ୍ଥିତି ଏପରି ହୋଇଛି। କ୍ରାଣ୍ଡିବାଲି ପଞ୍ଚାୟତ ୧୦ ନଂ ୱାର୍ଡ ଡଙ୍ଗିମେଣ୍ଡି ଗ୍ରାମର ପ୍ରାୟ ୩୫ ପରିବାର ମଧ୍ୟ ବିଚ୍ଛିନ୍ନ ହୋଇ ରହିଛନ୍ତି। ବାଘ ନଦୀ ଉପରେ ପୋଲ ନ ଥିବାରୁ ଏବଂ ବନ୍ୟା ଜଳ ଯୋଗୁ ଲୋକେ ନାହିଁ ନ ଥିବା ହଇରାଣ ହେଉଛନ୍ତି ା କୌଣସି ପ୍ରଶାସନିକ ଅଧିକାରୀ ଏ ପର୍ଯ୍ୟନ୍ତ ସେମାନଙ୍କ ପାଖରେ ପହଞ୍ଚତ୍ ପାରିନାହାନ୍ତି ା
ଜିଲା ଜରୁରୀକାଳୀନ ବିଭାଗ ପକ୍ଷରୁ ମିଳିଥିବା ସୂଚନା ଅନୁସାରେ ତୁମୁଡିବନ୍ଧ ବ୍ଲକରେ ସର୍ବାଧିକ ୭୦.୨ ମିଲିମିଟର ବର୍ଷା ରେକର୍ଡ କରାଯାଇଛି ା ବାଲିଗୁଡାରେ ୨୮ ମିମି, ଚକାପାଦରେ ୨୩ ମିମି, ଦାରିଙ୍ଗିବାଡି ୨୫ ମିମି, ଜି.ଉଦୟଗିରିରେ ୨୨.୨ ମିମି, ଖଜୁରୀପଡାରେ ୩୦.୮ ମିମି, କୋଟଗଡ ୫୬ ମିମି, ନୂଆଗାଁରେ ୨୦.୨ ମିମି, ଫିରିଙ୍ଗିଆରେ ୭.୪ ମିମି, ଫୁଲବାଣୀରେ ୩୯.୮ ମିମି, ରାଇକିଆରେ ୨୪.୮ ମିମ. ଟିକାବାଲିରେ ୨୫ ମିଲିମିଟର ବର୍ଷା ହୋଇଛି ା ଜିଲାର କୌଣସି ସ୍ଥାନରେ ସେଭଳି କିଛି କ୍ଷୟକ୍ଷତି ହୋଇ ନ ଥିବା ବିଭାଗ ପକ୍ଷରୁ କୁହାଯାଇଛି ା
