ମୁମ୍ବାଇ: ଦକ୍ଷିଣ ଭାରତୀୟ ଚଳଚ୍ଚିତ୍ର ଜଗତର ଅଭିନେତା ବିଜୟ ଦେୱରକୋଣ୍ଡା ଏବେ ବଲିଉଡରେ ତାଙ୍କର ପ୍ରଶଂସକ ତିଆରି କରିବାରେ ଲାଗି ପଡିଛନ୍ତି । ତାଙ୍କର ଅଗାମୀ ବଲିଉଡ ମୁଭିକୁ ନେଇ ସେ ଏବେ ଖୁବ୍ ଚର୍ଚ୍ଚାରେ ରହିଛନ୍ତି । ଏବେ ସେ ଫିଲ୍ମର ଶୁଟିଂ ସହ ସମ୍ପୂର୍ଣ୍ଣ ଟିମ ସହ ଲସ ଆଞ୍ଜେଲସରେ ରହିଛନ୍ତି । ଫିଲ୍ମର ଶୁଟିଂ ସରିବା ପରେ ସେ ଶୁଟିଂ ସେଟରୁ କିଛି ଫଟୋ ଶେୟାର କରି ଦର୍ଶକଙ୍କ ନିକଟତର ହେଉଛନ୍ତି । ଏହି ଫଟୋ ସେ ସୋସିଆଲ ମିଡିଆରେ ଶେୟାର କରି ପ୍ରଶଂସକଙ୍କ ଉତ୍ସୁକତା ବଢାଉଛନ୍ତି । ଏବେ ସେ ତାଙ୍କ ସୋସିଆଲ ମିଡିଆରେ ଏମିତି ଏକ ଫଟୋ ଶେୟାର କରିଛନ୍ତି ଯେଉଁଥିରେ ସେ ତାଙ୍କ ସହ କଳାକାର ଅନନ୍ୟା ପାଣ୍ଡେଙ୍କ ସହ ନଜର ଆସିଛନ୍ତି । ଉଭୟ ‘ଲାଇଗର’ ଫିଲ୍ମର ଶୁଟିଂ ପାଇଁ ଲସ ଆଞ୍ଜେଲସରେ ଅଛନ୍ତି । ଆଉ ଶୁଟିଂରୁ ଫୁରସତ ମିଳିଲେ ଏମାନେ କିଛି କିଛି ଫଟୋ ଓ ଭିଡିଓ ସୋସିଆଲ ମିଡିଆରେ ଶେୟାର କରୁଛନ୍ତି । ଆଉ ଏକ ଫଟୋରେ ବିଜୟ, ଅନନ୍ୟା ଓ ନିର୍ଦ୍ଦେଶକ ପୁରୀ ଜଗନ୍ନାଥ ଓ ଚାର୍ମି କୌରଙ୍କ ସହ ନଜର ଆସିଛନ୍ତି । ସେ ଚାର୍ମି ଓ ଅନନ୍ୟାଙ୍କ କାନ୍ଧରେ ହାତ ରଖି ପୋଜ ଦେଇଛନ୍ତି । ଫିଲ୍ମର କଥା ଯଦି ଆଲୋଚନାକୁ ନିଆଯାଏ ତେବେ ଏହାର ଟାଇଟଲ ‘ଲାଇଗର’ର ଅର୍ଥ ହେଉଛି ଅଧା ଲାୟନ ଅଧା ଟାଇଗର । ଫିଲ୍ମକୁ ନେଇ ନିର୍ମାତା, ନିର୍ଦ୍ଦେଶକ ଓ କଳାକାର ବେଶ ଆଶବାଦୀ ଅଛନ୍ତି । ବହୁ ଅର୍ଥ ବିନିମୟରେ ଏହା ନିର୍ମାଣ କରାଯାଉଥିବା ସୂଚନା ରହିଛି ।
