ଧର୍ମଶାଳା, ୧୨ା୧୧(ଡି.ଏନ.ଏ.): ଆୟବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଧର୍ମଶାଳା ସବ୍ରେଜିଷ୍ଟ୍ରାର କାର୍ଯ୍ୟାଳୟର କନିଷ୍ଠ କିରାଣି ରତ୍ନାକର ମହାନ୍ତିଙ୍କ ବାସଭବନରେ ଗୁରୁବାର ଭିଜିଲାନ୍ସ ବିଭାଗ ଚଢ଼ାଉ କରିଛି। କଟକ ଭିଜିଲାନ୍ସ ଏସ୍ପିଙ୍କ ନିର୍ଦ୍ଦେଶକ୍ରମେ କେନ୍ଦ୍ରାପଡା ଭିଜିଲାନ୍ସ ଡିଏସ୍ପି ସୁରେନ୍ଦ୍ରନାଥ ରାୟଗୁରୁଙ୍କ ନେତୃତ୍ୱରେ ତିନୋଟି ଟିମ୍ ଧର୍ମଶାଳା ଥାନା ଚହଟା ଗାଁରେ ଥିବା ରତ୍ନାକରଙ୍କ ଘର ସମେତ ଜାରକାଠାରେ ଭଡାସୂତ୍ରରେ ଦିଆଯାଇଥିବା ଦୋକାନ ଗୃହ, ଶ୍ୱଶୁର ଘର ଚାନ୍ଦପୁର ଭଳି ୭ ସ୍ଥାନରେ ଚଢ଼ାଉ କରିଥିଲେ। ଚଢ଼ାଉ ସମୟରେ ବାସଭବନରୁ ନଗଦ ୮ଲକ୍ଷ ୨୭ ହଜାର ୫୭ ଟଙ୍କା, ୩ଶହ ଗ୍ରାମ୍ ସୁନା ଅଳଙ୍କାର, ବ୍ୟାଙ୍କ ପାସ୍ ବୁକ୍, ଜମିଜମା ସଂକ୍ରାନ୍ତୀୟ କାଗଜପତ୍ର, ଗାଡି ଆଦି ଜବତ କରାଯାଇଛି। ତାଙ୍କ ସମ୍ପତ୍ତି ମୂଲ୍ୟ ୧ କୋଟି ୩୦ଲକ୍ଷ ଟଙ୍କା ହେବ ବୋଲି ଭିଜିଲାନ୍ସ ବିଭାଗ ପକ୍ଷରୁ ଆକଳନ କରାଯାଇଛି।
