ନୂଆଦିଲ୍ଲୀ,୬।୧: ପଞ୍ଜାବରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏକ ଫ୍ଲାଏଓଭରରେ ଫସିବାକୁ ନେଇ ଦେଶରେ ରାଜନୈତିକ ଝଡ଼ ସୃଷ୍ଟି ହୋଇଥିବା ବେଳେ ପଞ୍ଜାବର ଜଣେ ମନ୍ତ୍ରୀଙ୍କ ଏକ ଭିଡିଓ ଭାଇରାଲ ହୋଇଛି। ଭିଡିଓରେ ଭାଜପା କର୍ମୀଙ୍କ ମଧ୍ୟରେ ଘେରି ହୋଇ ‘ମୋଦି ଜିନ୍ଦାବାଦ’ କହୁଛନ୍ତି ପଞ୍ଜାବର ଜଣେ ବରିଷ୍ଠ କଂଗ୍ରେସ ମନ୍ତ୍ରୀ।
ଉପ ମୁଖ୍ୟମନ୍ତ୍ରୀ ଓ ପି ସୋନି କାରରେ ଅମ୍ରିତସର ଯାଉଥିବା ବେଳେ ତାଙ୍କୁ ଅଟକାଇ ଥିଲେ ଭାଜପା କର୍ମୀ। ପ୍ରଧାନମନ୍ତ୍ରୀଙ୍କ ପାଇଁ ଢ଼ିଲା ସୁରକ୍ଷା ବ୍ୟବସ୍ଥା ବିରୋଧରେ ସେମାନେ ବିକ୍ଷୋଭ କରୁଥିଲେ। ଭାଇରାଲ ଭିଡିଓରେ ଦେଖିବାକୁ ମିଳୁଛି, ଉପମୁଖ୍ୟମନ୍ତ୍ରୀଙ୍କ ଗାଡ଼ିକୁ ଚାରି ଆଡ଼ୁ ଘେରି ରହିଥିବା ଭାଜପା କର୍ମୀମାନେ ‘ଜୟ ଶ୍ରୀରାମ’ ସ୍ଲୋଗାନ ଦେଉଛନ୍ତି। ଗାଡ଼ିରେ ଥାଇ କଂଗ୍ରେସ ନେତା ‘ମୋଦି ଜିନ୍ଦାବାଦ’ ସ୍ଲୋଗାନ ଦେବା ପରେ ବାଟ ଛାଡ଼ିଥିଲେ ବିକ୍ଷୋଭକାରୀ।
ଉଲ୍ଲେଖଯୋଗ୍ୟ, ପଞ୍ଜାବର ଫିରୋଜପୁରରେ ଆୟୋଜିତ ଏକ ରାଲିରେ ଯୋଗ ଦେବା ପାଇଁ ଯାଉଥିଲେ ପ୍ରଧାନମନ୍ତ୍ରୀ ମୋଦି। ବିକ୍ଷୋଭକାରୀମାନେ ରାସ୍ତା ନ ଛାଡ଼ିବାରୁ ଲକ୍ଷ୍ୟ ସ୍ଥଳଠାରୁ ୧୦ କିମି ଦୂରରେ ଏକ ଫ୍ଲାଏଓଭରରେ ଫସି ଯାଇଥିଲେ। ୨୦ ମିନିଟ୍ ଅପେକ୍ଷା ପରେ ଫେରି ଯାଇଥିଲେ ଭଠିଣ୍ଡା ବିମାନବନ୍ଦରକୁ।
ପ୍ରଧାନମନ୍ତ୍ରୀଙ୍କ ଜୀବନକୁ ବିପଦରେ ପକାଇବା ପାଇଁ ଭାଜପା ପଞ୍ଜାବ ସରକାରଙ୍କୁ କେନ୍ଦ୍ର ସମାଲୋଚନା କରିଛି। କିନ୍ତୁ ଏହାକୁ ଖଣ୍ଡନ କରିବା ସହ କଂଗ୍ରେସ କହିଛି, ପ୍ରଧାନମନ୍ତ୍ରୀ ଅନ୍ତିମ ମୁହୂର୍ତ୍ତରେ ପ୍ଲାନ ବଦଳି ଦେଇଥିଲେ। ଏହା ଦ୍ୱାରା ସେ ସୁରକ୍ଷା ପ୍ରୋଟୋକଲ ଭଙ୍ଗ କରିଛନ୍ତି। ତାଙ୍କୁ ପ୍ରଥମେ ହେଲିକପ୍ଟର ଯୋଗେ ଯିବାର ଥିଲା। କିନ୍ତୁ ଖରାପ ପାଣିପାଗ ଯୋଗୁ ଅନ୍ତିମ ମୁହୂର୍ତ୍ତରେ ଯୋଜନାରେ ପରିବର୍ତ୍ତନ କରିଥିଲେ।
