ସେମିଳିଗୁଡା/ସୁନାବେଡା, ୧୫।୫(ସ୍ବ.ପ୍ର.): ୨ଜଣ ସରକାରୀ ଅଧିକାରୀଙ୍କ କ୍ୱାର୍ଟସରେ ସ୍ବୀକୃତି ନ ଥାଇ ସଂଯୋଗ ହୋଇଥିବା ବିଦ୍ୟୁତ୍କୁ କାଟିଛି ବିଦ୍ୟୁତ୍ ବିଭାଗ। ସେମିଳିଗୁଡା ବ୍ଲକ ବିଡିଓ ଏବଂ ସହକାରୀ ଯନ୍ତ୍ରୀଙ୍କ ସରକାରୀ ବାସଭବନରୁ ଟାଟା ପାୱାର୍ର ଏନଫୋର୍ସମେଣ୍ଟ ଅଧିକାରୀଙ୍କ ନିର୍ଦ୍ଦେଶରେ ଶୁକ୍ରବାର ବିଦ୍ୟୁତ୍ ସଂଯୋଗ ବିଚ୍ଛିନ୍ନ କରାଯାଇଛି। ଟାଟା ପାୱାର୍ର ଜଣେ ଅଧିକାରୀଙ୍କ କହିବା ଅନୁଯାୟୀ, ୨୦୧୨ରୁ ବିନା କୌଣସି କାଗଜପତ୍ରରେ ଉପରୋକ୍ତ ଦୁଇ ଅଧିକାରୀଙ୍କ ସରକାରୀ ବାସଭବନକୁ ବିଦ୍ୟୁତ୍ ସଂଯୋଗ ହୋଇଥିଲା। ଗତ କିଛି ବର୍ଷ ତଳେ ପୁରୁଣା ଘରକୁ ନବୀକରଣ କରାଯାଇଥିଲେ ମଧ୍ୟ ବିଦ୍ୟୁତ୍ ସଂଯୋଗକୁ ସ୍ଥାୟୀ କରାଯାଇ ନାହିଁ। ଉଭୟ ଅଧିକାରୀଙ୍କ ଉପରେ ୫୦ ହଜାରରୁ ଉଦ୍ଧର୍ବ ଟଙ୍କା ବକେୟା ଥିବାରୁ ବିଦ୍ୟୁତ୍ ସଂଯୋଗ ବିଚ୍ଛିନ୍ନ କରାଯାଇଛି । ଏ ସମ୍ପର୍କରେ ସୁନାବେଡା ବିଦ୍ୟୁତ୍ ବିଭାଗ ଏସଡିଓ ବିଶ୍ବକେସନ ପ୍ରଧାନଙ୍କୁ ପଚାରିବାରୁ ସେଏ ସମ୍ପର୍କରେ କିଛି ଜାଣି ନାହାନ୍ତି। ବିଭାଗର ଏନଫୋର୍ସମେଣ୍ଟ ଅଧିକାରୀଙ୍କୁ ପଚାରି ବୁଝିବେ ବୋଲି କହିଥିଲେ। ସେମିଳିଗୁଡା ବିଡିଓଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ସେ ଫୋନ ଉଠାଇ ନ ଥିଲେ।
