ନୂଆଦିଲ୍ଲୀ,୨୦।୧୧: କର୍ନାଟକ ବିପକ୍ଷରେ ଶନିବାର ଖେଳାଯାଇଥିବା ସୟଦ ମୁସ୍ତାକ ଅଲି ଟି୨୦ ଟୁର୍ନାମେଣ୍ଟର ଦ୍ୱିତୀୟ ସେମିଫାଇନାଲରେ ବିଦର୍ଭ ପେସର ଦର୍ଶନ ନାଲକାଣ୍ଡେ ଅନ୍ତିମ ଓଭରରେ ଲଗାତାର ୪ ବଲରେ ୪ ଉଇକେଟ ନେଇଛନ୍ତି। ଏଭଳି ସଫଳତା ପାଇବାରେ ଅଭିମନ୍ୟୁ ମିଥୁନଙ୍କ ପରେ ନାଲକାଣ୍ଡେ ଦେଶର ଦ୍ୱିତୀୟ ବୋଲର। ଦର୍ଶନ ୨୦ତମ ଓଭରର ଅନିରୁଦ୍ଧ ଜୋଶି, ବି ଆର ଶରଥ, ଜେ ସୁଚିଥ ଓ ଅଭିନବ ମନୋହରଙ୍କ ଉଇକେଟ ନେଇଥିଲେ। ଟି୨୦ କ୍ରିକେଟରେ ଏହା ଦର୍ଶନଙ୍କ ଦ୍ୱିତୀୟ ହ୍ୟାଟ୍ରିକ। ପୂର୍ବରୁ କେବଳ ଶ୍ରୀଲଙ୍କାର ପୂର୍ବତନ ପେସର ଟି୨୦ କ୍ରିକେଟରେ ଦୁଇ ଥର ହ୍ୟାଟ୍ରିକ ନେଇଥିଲେ।
ଦର୍ଶନଙ୍କ ଏଭଳି ପ୍ରଦର୍ଶନ ସତ୍ତ୍ୱେ ବିଦର୍ଭ ଫାଇନାଲକୁ ଉଠି ପାରିନାହିଁ। କର୍ନାଟକ ପାଇଁ ରୋହନ କଦମ (୮୭ ରନ୍, ୭ ଚୌକା ଓ ୪ ଛକା)ଓ ଅଧିନାୟକ ମନୀଷ ପାଣ୍ଡେ(୫୪ ରନ୍, ୨ ଚୌକା ଓ ୩ ଛକା)ଙ୍କ ଓପନିଂ ଯୋଡ଼ି ୧୫ ଓଭରରେ ଯୋଡ଼ିଥିଲେ ୧୩୨ ରନ୍। ଫଳରେ ଧାର୍ଯ୍ୟ ୨୦ ଓଭରରେ କର୍ନାଟକ ୭ ଉଇକେଟ ହରାଇ ୧୭୬ ରନ୍ କରିବାକୁ ସକ୍ଷମ ହୋଇଥିଲା। ଜବାବରେ ଖେଳାଳିଙ୍କ ମିଳିତ ଉଦ୍ୟମ ସତ୍ତ୍ୱେ ବିଦର୍ଭ ବିଜୟ ଲକ୍ଷ୍ୟଠାରୁ ୫ ରନ୍ ଦୂରରେ ରହିଯାଇଥିଲା।
