ନିକଟରେ ଅଭିନେତା ବିକି କୌଶଳ ବାପା ହୋଇଛନ୍ତି। ଏଥିପାଇଁ ତାଙ୍କ ଖୁସି କହିଲେ ନ ସରେ। ସ୍ତ୍ରୀ ତଥା ଅଭିନେତ୍ରୀ କ୍ୟାଟ୍ରିନା କୈଫଙ୍କ ସହ ସେ ଏବେ ପୁଅ ସେବାରେ ଲାଗିପଡ଼ିଛନ୍ତି। ପୁଅ ଜନ୍ମ ହେବା ପରେ ବିକିଙ୍କୁ ପ୍ରଥମ ଥର ପାଇଁ ମୁମ୍ବାଇ ବାହାରେ ଦେଖାଯାଇଥିଲା। ସେ ଦିଲ୍ଲୀରେ ଏକ କାର୍ଯ୍ୟକ୍ରମରେ ଯୋଗ ଦେଇଥିଲେ।
ଏହି କାର୍ଯ୍ୟକ୍ରମ ସମୟରେ ସେ ହସି ହସି କହିଥିଲେ, ମୁଁ ଅଭିନୟ ଅପେକ୍ଷା ଡାଏପର ବଦଳାଇବାରେ ଅଧିକ ପାରଙ୍ଗମ। ମୁଁ କେବଳ ଏତିକି କହିବାକୁ ଚାହୁଁଛି। ପୁଅ ହେବା ପରେ ଦାୟିତ୍ୱ ବଢିଯାଇଛି। ତାକୁ ଛାଡି କୁଆଡେ ଯିବା ବେଶ୍ କଷ୍ଟକର। କିନ୍ତୁ ଯେଉଁ ଦିନ, ସେ ଏହା ଦେଖିବ, ସେ ତାଙ୍କ ବାପାଙ୍କ ପାଇଁ ଗର୍ବ କରିବ। ବାପା ହେବାର ଅର୍ଥ କ’ଣ ତାହା ମୁଁ ଶବ୍ଦରେ ପ୍ରକାଶ କରିପାରିବି ନାହିଁ।
ଦିଲ୍ଲୀରେ ଅନୁଷ୍ଠିତ NDTV ଇଣ୍ଡିଆନ ଅଫ ଦି ଇୟର ୨୦୨୫ ସମାରୋହରେ ବିକିଙ୍କୁ ବର୍ଷର ଶ୍ରେଷ୍ଠ ଅଭିନେତା ପୁରସ୍କାରରେ ସମ୍ମାନିତ କରାଯାଇଥିଲା। ‘ଛାଭା’ ଚଳଚ୍ଚିତ୍ରରେ ଛତ୍ରପତି ସମ୍ଭାଜୀ ମହାରାଜଙ୍କ ଭୂମିକା ପାଇଁ ସେ ଏହି ପୁରସ୍କାର ପାଇଥିଲେ।
ଡିସେମ୍ବର ୨୦୨୧ରେ ରାଜସ୍ଥାନର ସିକ୍ସ ସେନ୍ସ ଫୋର୍ଟ ବାରୱାରାରେ ବିକି ଏବଂ କ୍ୟାଟ୍ରିନାଙ୍କର ଗ୍ରାଣ୍ଡ ବିବାହ ହୋଇଥିଲା। ସେମାନେ ବିବାହ ବନ୍ଧନ ପର୍ଯ୍ୟନ୍ତ ସେମାନଙ୍କର ସମ୍ପର୍କକୁ ଗୁପ୍ତ ରଖିଥିଲେ। ଚାରି ବର୍ଷ ପରେ ଏହି ଦମ୍ପତି ମା’ବାପା ହୋଇଛନ୍ତି।
Dharitri – Odisha’s No.1 Odia Daily
