ଯାଜପୁର ଅଫିସ,୨୯।୬: ବେଦାନ୍ତ ଦ୍ୱାରା କାର୍ଯ୍ୟକାରୀ ହେଉଥିବା ଓସ୍ତପାଳ କ୍ରୋମାଇଟ ଖଣିରୁ ଡମଶାଳା ନାଳକୁ ବର୍ଜ୍ୟଜଳ ନିର୍ଗତ ହେଉଥିବା ଅଭିଯୋଗର ତଦନ୍ତ ରିପୋର୍ଟ ଗତ ୨୧ ତାରିଖରେ କେନ୍ଦ୍ରୀୟ ପ୍ରଦୂଷଣ ନିୟନ୍ତ୍ରଣ ବୋର୍ଡ (ସିପିସିବି)ରେ ଦାଖଲ ହୋଇଛି। ଖଣିରେ ଘଣ୍ଟା ପ୍ରତି ୪୦୦ କିଲୋଲିଟର କ୍ଷମତା ବିଶିଷ୍ଟ ଏଫ୍ଲୁଏଣ୍ଟ ଟ୍ରିଟ୍ମେଣ୍ଟ ପ୍ଲାଣ୍ଟ (ଇଟିପି) ସ୍ଥାପନ କରାଯାଇଛି। ଖଣିର ପାଣି ବିଶୋଧନ କରାଯାଇ ଡମଶାଳା ନାଳରେ ଛଡ଼ାଯାଇଛି, ଯେଉଁଥିରେ କୌଣସି ବିଷାକ୍ତ ଦ୍ରବ୍ୟ ନ ଥିଲା ବୋଲି ରିପୋର୍ଟରେ ଉଲ୍ଲେଖ କରାଯାଇଛି। ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ (ଏସ୍ପିସିବି)ର ସଦସ୍ୟ ସଚିବ ତାଙ୍କ ପତ୍ରସଂଖ୍ୟା ୭୯୨୦ରେ ଦେଇଥିବା ଏହି ରିପୋର୍ଟ ବେଦାନ୍ତକୁ ସୁହାଇଲା ଭଳି ପ୍ରସ୍ତୁତ ହୋଇଛି ବୋଲି ଅଭିଯୋଗକାରୀ ରାଜେଶ କୁମାର ସିଂ କ୍ଷୋଭ ପ୍ରକାଶ କରିିଛନ୍ତି। ତଦନ୍ତକାରୀ ଅଧିକାରୀମାନେ ଏକପ୍ରକାର ବେଦାନ୍ତ କମ୍ପାନୀର ଦରମାଭୋଗୀ କର୍ମଚାରୀଙ୍କ ଭଳି କାମ କରିଛନ୍ତି। ଏପରି କି ରିପୋର୍ଟରେ ବିଷାକ୍ତ ଜଳ ସମ୍ପର୍କରେ ବୈଷୟିକ ଦିଗକୁ ଧ୍ୟାନ ଦିଆଯାଇନାହିଁ ବୋଲି ରାଜେଶ ଏସ୍ପିସିବିର ସଦସ୍ୟ ସଚିବ ଓ ସିପିସିବିର ଡିଭିଜନାଲ ମୁଖ୍ୟଙ୍କୁ ଗତ ୨୨ ତାରିଖରେ ମେଲ୍ ଯୋଗେ ଅଭିଯୋଗ କରିଛନ୍ତି।
ଫେରୋ ଆଲୋଏଜ୍ କର୍ପୋରେଶନ ଲିମିଟେଡ୍ (ଫାକର) ନାମରେ ଥିବା ଯାଜପୁର ଜିଲାର ଓସ୍ତପାଳ ଏବଂ କଳାରଙ୍ଗିଅଟା କ୍ରୋମାଇଟ୍ ଖଣିକୁ ବେଦାନ୍ତ ୨୦୨୦ ଜାନୁୟାରୀରୁ ଲିଜ୍ ହାସଲ କରିଛି। ଏହି ଦୁଇ ଖଣିରେ ୨୦୨୦ ଅକ୍ଟୋବରରୁ ଉତ୍ତୋଳନ ଆରମ୍ଭ ହୋଇଛି। ଏହା ପୂର୍ବରୁ ଦୀର୍ଘଦିନ ଧରି ଓସ୍ତପାଳ କ୍ରୋମାଇଟ ଖଣି ମଧ୍ୟରେ ଜଳସ୍ତର ବୃଦ୍ଧି ଘଟିଥିଲା। ବେଦାନ୍ତ ତା’ର ଖଣି କାର୍ଯ୍ୟ ତ୍ୱରାନ୍ବିତ କରିବା ପାଇଁ ଏହି ଜଳକୁ ନିଷ୍କାସନ କରିବା ଆବଶ୍ୟକ ହେଉଥିଲା। ତେଣୁ ୨୦୨୦ ନଭେମ୍ବରରୁ ୨୦୨୧ ଜାନୁୟାରୀ ମଧ୍ୟରେ ଖଣିର ସମସ୍ତ ଜଳକୁ ଇଟିପି ଜରିଆରେ ବିଶୋଧନ ନ କରି ୧୫ ଲକ୍ଷ ଘନମିଟରରୁ ଊର୍ଦ୍ଧ୍ୱ ବିଷାକ୍ତ ପାଣି ନିଷ୍କାସନ କରିଛି। ଏନେଇ ସୁରେଶ କୁମାର, ଲମ୍ବୋଦର ମହାନ୍ତ, ବିଶ୍ୱରଞ୍ଜନ ପରମଗୁରୁ ଓ ରାଜେଶ କୁମାର ସିଂ ପ୍ରମୁଖ ଗତ ଫେବୃୟାରୀ ଓ ମାର୍ଚ୍ଚରେ କେନ୍ଦ୍ର ସରକାରଙ୍କ ଓ୍ବେବ୍ପୋର୍ଟାଲ୍ ‘ସେଣ୍ଟ୍ରାଲାଇଜ୍ଡ ପବ୍ଲିକ୍ ଗ୍ରିଭାନ୍ସ ରିଡ୍ରେସ୍ ଆଣ୍ଡ୍ ମନିଟରିଂ ସିଷ୍ଟମ୍’ରେ ଅଭିଯୋଗ କରିବା ସହ ଯାଜପୁର ଜିଲାପାଳ ଓ ଏସ୍ପିସିବି କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରିଥିଲେ। ଏହାପରେ ଏସ୍ପିସିବି ସଦସ୍ୟ ସଚିବଙ୍କ ନିର୍ଦ୍ଦେଶକ୍ରମେ ୨୩ା୪ା୨୦୨୧, ୨୮ା୪ା୨୦୨୧ ଓ ୧୮ା୫ା୨୦୨୧ରେ କଳିଙ୍ଗନଗର ଆଞ୍ଚଳିକ ଅଧିକାରୀ ଓସ୍ତପାଳ ଖଣିର ବର୍ଜ୍ୟଜଳ ନିର୍ଗତ ଉପରେ ତଦନ୍ତ କରି ଉପରୋକ୍ତ ରିପୋର୍ଟ ପ୍ରସ୍ତୁତ କରିଛନ୍ତି।
ଅନ୍ୟପକ୍ଷରେ ଖଣିର ପାଣି ବାହାରକୁ ଛଡ଼ାଯାଉଥିବା ନେଇ ଖଣି କର୍ମଚାରୀଙ୍କ ମଧ୍ୟରେ ହ୍ବାଟ୍ସଆପ୍ ଗ୍ରୁପ୍ ‘ମାଇନ୍ସ ଇମ୍ପର୍ଟେଣ୍ଟ ଇସ୍ୟୁଜ୍’ରେ ହୋଇଥିବା କଥାବାର୍ତ୍ତାକୁ ଧ୍ୟାନ ଦିଆଯାଇନାହିଁ। ଏନେଇ ପୂର୍ବରୁ ହୋଇଥିବା ଅଭିଯୋଗରେ ଗୁରୁତ୍ୱ ଦେବାକୁ ନିବେଦନ କରାଯାଇଥିଲା। ଉକ୍ତ ହ୍ବାଟ୍ସଆପ୍ ଗ୍ରୁପ୍ରେ ଇଟିପି ମ୍ୟାନେଜର ସାରସ୍ବତ ନନ୍ଦ ଇଟିପିକୁ ବାଇପାସ୍ କରି ସିଧା ବାହାରକୁ ପାଣି ଛାଡିବାକୁ କହିଥିବା ସ୍ପଷ୍ଟ ଭାବେ ଜଣାପଡ଼ିଛି। ଏହାସହ ଏସ୍ପିସିବି ପକ୍ଷରୁ କାର୍ବନ ଫୁଟ୍ପ୍ରିଣ୍ଟ ଭଳି ପ୍ରଯୁକ୍ତି ବିଜ୍ଞାନ ପ୍ରଣାଳୀକୁ ତଦନ୍ତରେ ଜାଣିଶୁଣି ପ୍ରୟୋଗ କରାଯାଇନାହିଁ ବୋଲି ଅଭିଯୋଗକାରୀ ରାଜେଶ କୁମାର ସିଂ ତାଙ୍କ ଅଭିଯୋଗରେ ଦର୍ଶାଇଛନ୍ତି। ଏହାସହ ବର୍ଜ୍ୟଜଳ ପରିମାଣ ଅନୁଯାୟୀ ଇଟିପି ଜରିଆରେ ବିଶୋଧନ କରି ପାଣି ଛାଡ଼ିବା ଏଠାରେ ସମ୍ଭବ ନୁହେଁ ବୋଲି ଅଭିଯୋଗରେ ଉଲ୍ଲେଖ କରାଯାଇଛି। ଖଣିର ବର୍ଜ୍ୟଜଳ ଦ୍ୱାରା ଡମଶାଳା ନାଳ ଓ ବ୍ରାହ୍ମଣୀ ନଦୀ ପାଣି ବିଷାକ୍ତ ହୋଇଛି। ଏହାକୁ ତୁରନ୍ତ ନିୟନ୍ତ୍ରଣ କରା ନ ଗଲେ ଆଗାମୀ ଦିନରେ ଖଣି ଅଞ୍ଚଳର ଜନବସତି ଉପରେ ବିପଦ ନିଶ୍ଚିତ ବୋଲି ମତପ୍ରକାଶ ପାଉଛି।
ଏ ସଂକ୍ରାନ୍ତରେ ଏସ୍ପିସିବି କଳିଙ୍ଗନଗର ଆଞ୍ଚଳିକ ଅଧିକାରୀ ପ୍ରମୋଦ କୁମାର ବେହେରାଙ୍କୁ ପଚାରିବାରେ ସେ କହିଛନ୍ତି, ଯାହା ନିରୀକ୍ଷଣରେ ଜଣାପଡ଼ିଲା ସେହି ଅନୁସାରେ ରିପୋର୍ଟ ଦାଖଲ ହୋଇଛି।
