ଭୁବନେଶ୍ୱର,୨୯ା୧୦: ବେଦାନ୍ତ ଆଲୁମିନିୟମର ଲାଞ୍ଜିଗଡ଼ ୟୁନିଟ୍ ସହ କର୍ମଚାରୀ ରାଜ୍ୟ ବୀମା ନିଗମ (ଇଏସ୍ଆଇସି) ମଧ୍ୟରେ ଏକ ବୁଝାମଣାପତ୍ର (ଏମ୍ଓୟୁ) ନିକଟରେ ସ୍ବାକ୍ଷର ହୋଇଯାଇଛି। ଏହି ସହଭାଗିତାର ଏକ ଅଂଶ ଭାବେ ଲାଞ୍ଜିଗଡ଼ଠାରେ ଥିବା ବେଦାନ୍ତ ଡାକ୍ତରଖାନା ବର୍ତ୍ତମାନ ଇଏସ୍ଆଇସିର ଏକ ନିଯୁକ୍ତିଦାତା ଡିସ୍ପେନସାରି ଭାବେ ମାନ୍ୟତା ହାସଲ କରିଛି। ବିଶେଷକରି ଇଏସ୍ଆଇସି ସାଧାରଣ ସ୍ବାସ୍ଥ୍ୟଜନିତ ଆପଦକୁ ତିନିସ୍ତରୀୟ ସହାୟତା ଯଥା ପ୍ରାଥମିକ, ମାଧ୍ୟମିକ ଓ ତୃତୀୟ ଶ୍ରେଣୀରେ ବିଭକ୍ତ କରିଛି, ଯେଉଁଥିରେ ଜଣେ ଇଏସ୍ଆଇସିର ହିତାଧିକାରୀ ଚିକିତ୍ସା ପାଇପାରିବେ।
ଏ ସମ୍ପର୍କରେ ବେଦାନ୍ତ ଆଲୁମିନିୟମର ଡେପୁଟି ସିଇଓ (ଆଲୁମିନା ବିଜ୍ନେସ) ଜି. ଜି. ପାଲ କହିଛନ୍ତି, ଆମ କର୍ମଚାରୀ ଓ ବ୍ୟବସାୟିକ ଭାଗୀଦାରିଙ୍କ କଲ୍ୟାଣ ଆମ ପାଇଁ ସବୁଠାରୁ ମୂଲ୍ୟବାନ। ଇଏସ୍ଆଇସି ସହ ଏହି ସହଭାଗିତା ଆମର କର୍ମଚାରୀ ଓ ସେମାନଙ୍କ ପରିବାର ସଦସ୍ୟଙ୍କୁ ମଧ୍ୟ ଇଏସ୍ଆଇସିର କଲ୍ୟାଣକାରୀ ଯୋଜନାରୁ ସୁବିଧା ଓ ଲାଭ ମିଳିବ। ଲାଞ୍ଜିଗଡ ବେଦାନ୍ତ ହସ୍ପିଟାଲ ଲୋକମାନଙ୍କୁ ଦୀର୍ଘ ୧୫ବର୍ଷ ହେଲା ଚିକିତ୍ସା ସେବା ଯୋଗାଇ ଦେଇ ଆସୁଛି। ସେହିଭଳି ଇଏସ୍ଆଇସିର ଆଞ୍ଚଳିକ ନିର୍ଦ୍ଦେଶକ ଓଡ଼ିଶା ଭୁବନେଶ୍ୱରର ପାର୍ଥସାରଥି ପଣ୍ଡା କହିଛନ୍ତି, ଆମେ ଖୁସି ଯେ ବେଦାନ୍ତ ତା’ର ହସ୍ପିଟାଲ ସହିତ ଇଏସ୍ଆଇସିକୁ ସାମିଲ କରାଇଛି, ଯାହାଦ୍ୱାରା ସ୍ଥାନୀୟ ଗୋଷ୍ଠୀ ବହୁ ଲାଭବାନ ହେବେ। ଏହି ପଦକ୍ଷେପ ଦ୍ୱାରା ବେଦାନ୍ତର କର୍ମଚାରୀମାନେ ବିଶେଷ ଭାବେ ଉପକୃତ ହେବେ। ବେଦାନ୍ତ ଲାଞ୍ଜିଗଡ଼ କର୍ମଚାରୀ ଓ ସ୍ଥାନୀୟ ଜନବର୍ଗଙ୍କ କଲ୍ୟାଣ ପାଇଁ ଅନେକ ପଦକ୍ଷେପ ଗ୍ରହଣ କରିଛି।
