ଭଦ୍ରକ ଅଫିସ, ୨୨।୮: ଲଗାଣ ବର୍ଷା ଯୋଗୁ ଭଦ୍ରକ ଜିଲାରେ ପ୍ରବାହିତ ବିଭିନ୍ନ ନଦୀରେ ବନ୍ୟା ସ୍ଥିତି ସୃଷ୍ଟି ହୋଇଛି। ଫଳରେ ୬ ବ୍ଲକର ୨ଶହରୁ ଊର୍ଦ୍ଧ୍ୱ ଗଁା ଜଳମଗ୍ନ ହେବା ସହ ୧୬,୫୫୪ ହେକ୍ଟର ଜମିରେ ଚାଷ କ୍ଷତିଗ୍ରସ୍ତ ହୋଇଥିବା ପ୍ରଶାସନ ପକ୍ଷରୁ ପ୍ରାଥମିକ ରିପୋର୍ଟରେ ପ୍ରକାଶ କରାଯାଇଛି। ପ୍ରଥମ ବନ୍ୟାଜଳ କମି ନ ଥିବା ବେଳେ ଶନିବାରଠାରୁ ପୁଣିଥରେ ବିଭିନ୍ନ ନଦୀରେ ଜଳସ୍ତର ବଢ଼ିବାରେ ଲାଗିଛି। ଶନିବାର ଜିଲାର କୌଣସି ସ୍ଥାନରେ ବର୍ଷା ହୋଇ ନ ଥିଲେ ମଧ୍ୟ ଉପରମୁଣ୍ଡ କେନ୍ଦୁଝର ଓ ମୟୂରଭଞ୍ଜ ଜିଲାରେ ବର୍ଷା ଯୋଗୁ ନଦୀଗୁଡ଼ିକ ଫୁଲୁଛି।
ଶନିବାର ରାତିରୁ ଭଣ୍ଡାରିପୋଖରୀ ବ୍ଲକ ଆଖୁଆପଦା ଆନିକଟଠାରେ ବୈତରଣୀ ନଦୀର ଜଳସ୍ତର ବିପଦ ସଙ୍କେତ ଉପରେ ରହିଛି। ଧାମନଗର ବ୍ଲକରେ ବୈତରଣୀ, ସାଳନ୍ଦୀ, ଗେଙ୍ଗୁଟି ଓ କୋଚିଳା ନଦୀରେ ଜଳସ୍ତର ବଢ଼ିବାରୁ ତଳିଆ ଅଞ୍ଚଳର ଗଁାଗୁଡ଼ିକ ପାଣିଘେରରେ ରହିଛି। ସେହିପରି ବାସୁଦେବପୁର ବ୍ଲକରେ କାଂଶବାଂଶ, କଞ୍ଚୁଡ଼ି, ଧଳା, ମନ୍ତେଇ, ଗମେଇ ଏବଂ ତିହିଡ଼ି ବ୍ଲକରେ ରେବ, କପାଳୀ ଓ ସାଳନ୍ଦୀରେ ଦ୍ୱିତୀୟ ଥର ବନ୍ୟାଜଳ ଆସି ବିଭିନ୍ନ ଗଁା ଜଳମଗ୍ନ ହୋଇଛି। ଧାମନଗର ବ୍ଲକର ପାଳସାହି ପଞ୍ଚାୟତ ଅଧୀନ ତେଲିପାଟନା ଗ୍ରାମ ନିକଟସ୍ଥ ବୈତରଣୀ ନଦୀବନ୍ଧରେ ଦୁଇଟି ଘଳିଆ ସୃଷ୍ଟି ହୋଇଛି। ନଦୀରେ ଜଳସ୍ତର ଅଧିକ ଥିବାରୁ ନଦୀବନ୍ଧ ଭାଙ୍ଗିଯିବା ଆଶଙ୍କାରେ ସ୍ଥାନୀୟ ଗ୍ରାମବାସୀ ଭୟଭୀତ ଅବସ୍ଥାରେ ଅଛନ୍ତି। ରଇପୁର ପଞ୍ଚାୟତ ବାଙ୍କସାହିର ବିଭିନ୍ନ ରାସ୍ତାରେ ପାଣି ଚାଲୁଛି। ଏନେଇ ଧାମନଗରସ୍ଥିତ ଜଳସମ୍ପଦ ବିଭାଗ କନିଷ୍ଠ ଯନ୍ତ୍ରୀ କିଶୋର ଚନ୍ଦ୍ର ନାୟକ ଘଳିଆ ସୃଷ୍ଟି ହୋଇଥିବା ସ୍ଥାନରେ ବାଲିବସ୍ତା ପ୍ୟାକିଂର ବ୍ୟବସ୍ଥା କରାଯାଇଥିବା କହିଛନ୍ତି।
