ନୂଆଦିଲ୍ଲୀ,୨୮।୨ : ପାଣିପାଗର ପରିବର୍ତ୍ତନ ସହିତ ତାପମାତ୍ରା ମଧ୍ୟ ଧୀରେ ଧୀରେ ବୃଦ୍ଧି ପାଇବାରେ ଲାଗିଛି। ତେବେ ଏଥର ଫେବୃଆରୀରେ ତାପମାତ୍ରା ଅନେକ ରେକର୍ଡ ଭାଙ୍ଗିବା ଆରମ୍ଭ କରିଛି। ଯଦିଓ ସକାଳ ଏବଂ ସନ୍ଧ୍ୟାରେ ତାପମାତ୍ରା ହ୍ରାସ ପାଉଛି, କିନ୍ତୁ ଅପରାହ୍ନରେ ତାତି ବଢୁଛି।
ପାଗରେ ଏହି ଉତ୍ଥାନ-ପତନ ସ୍ବାସ୍ଥ୍ୟ ବିଶେଷଜ୍ଞଙ୍କ ଚିନ୍ତା ବଢ଼ାଇ ସାରିଛି। ଏହାକୁ ଦୃଷ୍ଟିରେ ରଖି କେନ୍ଦ୍ର ସ୍ବାସ୍ଥ୍ୟ ସଚିବ ରାଜେଶ ଭୂଷଣ ଉତ୍ତାପ ଜନିତ ରୋଗ ସମ୍ପର୍କରେ ସମସ୍ତ ରାଜ୍ୟକୁ ଏକ ଚିଠି ଲେଖିଛନ୍ତି। ସେ ସମସ୍ତଙ୍କୁ ଜାତୀୟ କାର୍ଯ୍ୟ ଯୋଜନା ପ୍ରତି ଧ୍ୟାନ ଦେବାକୁ ସତର୍କ କରାଇଛନ୍ତି।
କେନ୍ଦ୍ର ଲେଖିଥିବା ଚିଠିରେ କୁହାଯାଇଛି ଯେ ଅନେକ ସ୍ଥାନରେ ତାପମାତ୍ରା ଏକ ଉଚ୍ଚ ସ୍ତରରେ ପହଞ୍ଚିସାରିଛି। ଏପରି ପରିସ୍ଥିତିରେ ଉତ୍ତାପ ଦ୍ୱାରା ହେଉଥିବା ରୋଗ ମଧ୍ୟ ବୃଦ୍ଧି ପାଇବ। ଜଳବାୟୁ ପରିବର୍ତ୍ତନ ଏବଂ ମାନବ ସ୍ବାସ୍ଥ୍ୟ ଜାତୀୟ କାର୍ଯ୍ୟକ୍ରମ ଅଧୀନରେ ସମସ୍ତ ରାଜ୍ୟରେ ଏହାର ଦୈନିକ ମନିଟରିଂ କରାଯିବ। ସ୍ବାସ୍ଥ୍ୟ ବିଭାଗ ଏବଂ ସ୍ବାସ୍ଥ୍ୟ ସୁବିଧାଗୁଡ଼ିକର ପ୍ରଭାବଶାଳୀ ପ୍ରସ୍ତୁତି ପାଇଁ ସମସ୍ତ ଜିଲାରେ ପ୍ରସ୍ତୁତି ନିଶ୍ଚିତ କରିବାକୁ ଅଧିକାରୀମାନଙ୍କୁ କୁହାଯାଇଛି।
ଚିଠିରେ ଦର୍ଶାଯାଇଛି ଯେ ରାଜ୍ୟ ସ୍ବାସ୍ଥ୍ୟ ବିଭାଗ ମେଡିକାଲ ଅଫିସର, ସ୍ବାସ୍ଥ୍ୟ କର୍ମୀ, ତୃଣମୂଳ ସ୍ତରର କର୍ମଚାରୀଙ୍କୁ ଉତ୍ତାପ ସମସ୍ୟା ଏବଂ ଏହାର ଶୀଘ୍ର ଚିହ୍ନଟ ଓ ପରିଚାଳନା ଉପରେ ସଚେତନ କରିବା ଆବଶ୍ୟକ। ଏଥିସହ ବିଭାଗଗୁଡ଼ିକ ପର୍ଯ୍ୟାପ୍ତ ପରିମାଣର ଅତ୍ୟାବଶ୍ୟକ ଔଷଧ, ଇଣ୍ଟ୍ରାଭେନସ ରିକୁଇଡ୍, ବରଫ ପ୍ୟାକ, ଓଆରଏସ ଏବଂ ସମସ୍ତ ଆବଶ୍ୟକୀୟ ଉପକରଣର ଉପଲବ୍ଧତା ନିଶ୍ଚିତ କରିବା ଉଚିତ। ଏହା ସହିତ ସମସ୍ତ ସ୍ବାସ୍ଥ୍ୟ ସୁବିଧାରେ ପର୍ଯ୍ୟାପ୍ତ ପାନୀୟ ଜଳର ଉପଲବ୍ଧତା ପାଇଁ ନିର୍ଦ୍ଦେଶ ମଧ୍ୟ ଜାରି କରାଯାଇଛି।
