ବାରାଣସୀ,୨୩।୫: ଉତ୍ତର ପ୍ରଦେଶର ବାରାଣସୀରେ ଏକ ଅଭାବନୀୟ ଘଟଣା ଘଟିଛି। ଗଙ୍ଗା ନଦୀର ପ୍ରଭୁ ଘାଟରେ ସୋମବାର ଏକ ଡଙ୍ଗା ବୁଡିଯାଇଛି। ଏଥିରେ ୬ ଜଣ ଲୋକ ବୁଡ଼ି ଯାଇଛନ୍ତି। ସେମାନଙ୍କ ମଧ୍ୟରୁ ଦୁଇଜଣଙ୍କ ମୃତଦେହ ଉଦ୍ଧାର କରାଯାଇଛି। ଘଟଣାସ୍ଥଳରେ ଉପସ୍ଥିତ ଏନଡିଆର୍ଏଫ୍ ଦଳ ଦୁଇଜଣଙ୍କୁ ଉଦ୍ଧାର କରିଥିଲେ। ଏନଡିଆରଏଫ ଟିମ୍ ଘଟଣାସ୍ଥଳରେ ବାକି ଦୁଇ ଜଣଙ୍କୁ ଖୋଜାଖୋଜି କରୁଛନ୍ତି। ଘଟଣାସ୍ଥଳରେ ଭୟର ବାତାବରଣ ରହିଛି।
ମିଳିଥିବା ସୂଚନା ଅନୁଯାୟୀ, ଟୁଣ୍ଡଲା ଠାରୁ ବାରାଣସୀକୁ ୬ଜଣ ଲୋକ ଡଙ୍ଗାରେ ଆସୁଥିଲେ। ହଠାତ୍ ଡଙ୍ଗାରେ ଏକ ଛିଦ୍ର ହୋଇ ସେଥିରେ ପାଣି ପଶିବା ଆରମ୍ଭ କଲା। ଲୋକମାନେ କିଛି ବୁଝିବା ପୂର୍ବରୁ ଡଙ୍ଗାଟି ଅନିୟନ୍ତ୍ରିତ ଅବସ୍ଥାରେ ଓଲଟିପଡିଥିଲା।
