ନୂଆଦିଲ୍ଲୀ, ୩୧।୮: ମାତ୍ର ୧୫ ବର୍ଷ ବୟସରେ ଭାରତୀୟ କ୍ରିକେଟରେ ଲଗାତାର ରେକର୍ଡ କରି ଚାଲିଛନ୍ତି ବୈଭବ ସୂର୍ଯ୍ୟବଂଶୀ। ଏବେ ଦୁଲୀପ ଟ୍ରଫି ୨୦୨୬ର ସେମିଫାଇନାଲରେ ଆଉ ଏକ ବଡ଼ କୀର୍ତ୍ତି ହାସଲ କରିଛନ୍ତି ଏହି ଯୁବ ବ୍ୟାଟର। ସେ ଦୁଲୀପ ଟ୍ରଫି ଇତିହାସରେ ସବୁଠାରୁ କମ୍ ବୟସରେ ଅର୍ଦ୍ଧଶତକ ମାରିଥିବା ବ୍ୟାଟର ହୋଇଛନ୍ତି।
ସେଣ୍ଟ୍ରାଲ ଜୋନ ବିପକ୍ଷ ସେମିଫାଇନାଲରେ ବୈଭବ ଏହି ରେକର୍ଡ ନିଜ ନାଁରେ କରିଛନ୍ତି। ସେଣ୍ଟ୍ରାଲ ଜୋନର ପ୍ରଥମ ଇନିଂସ ୨୬୬ ରନରେ ସୀମିତ ରହିଥିଲା। ଏହାର ଜବାବରେ ଇଷ୍ଟ ଜୋନର ଇନିଂସ ସମୟରେ ବୈଭବ ବିସ୍ଫୋରକ ବ୍ୟାଟିଂ କରିଥିଲେ।
ମ୍ୟାଚର ଦ୍ୱିତୀୟ ଦିନରେ ବୈଭବ ମାତ୍ର ୪୨ଟି ବଲରେ ଛକା ମାରି ଅର୍ଦ୍ଧଶତକ ପୂରଣ କରିଥିଲେ। ଇନିଂସର ପ୍ରଥମ ୧୫ ଓଭର ମଧ୍ୟରେ ସେ ଫିଫ୍ଟି ପୂରଣ କରିଦେଇଥିଲେ।
ସାରାଂଶ ଜୈନଙ୍କ ବଲରେ ଛକା ମାରି ବୈଭବ ୪୨ ବଲରେ ଅର୍ଦ୍ଧଶତକ ପୂରଣ କରିଥିଲେ। ସେତେବେଳେ ତାଙ୍କ ବୟସ ଥିଲା ୧୫ ବର୍ଷ ୧୫୭ ଦିନ। ଏହା ସହିତ ସେ ଦୁଲୀପ ଟ୍ରଫିରେ ସବୁଠାରୁ କମ ବୟସରେ ଫିଫ୍ଟି ମାରିବାର ରେକର୍ଡ ନିଜ ନାଁରେ କରିଛନ୍ତି।
ବୈଭବ ଶତକ ହାସଲ କରିବାରୁ ଅଳ୍ପକେ ବଞ୍ଚିତ ହୋଇଥିଲେ। ସେ ୮୧ଟି ବଲରେ ୯୨ ରନ କରି ଆଉଟ ହୋଇଥିଲେ। ତାଙ୍କ ଇନିଂସରେ ୭ଟି ଚୌକା ଓ ୭ଟି ଛକା ସାମିଲ ଥିଲା। ଅର୍ଥାତ୍ ବୈଭବଙ୍କ ଇନିଂସ୍ରେ ଆରମ୍ଭରୁ ଶେଷ ପର୍ଯ୍ୟନ୍ତ ଚୌକା-ଛକାର ବର୍ଷା ଦେଖିବାକୁ ମିଳିଥିଲା।
ବୈଭବଙ୍କ ପୂର୍ବରୁ ଦୁଲୀପ ଟ୍ରଫିରେ ସବୁଠାରୁ କମ ବୟସରେ ଅର୍ଦ୍ଧଶତକ କରିଥିବା ବ୍ୟାଟର ଥିଲେ ଲକ୍ଷ୍ମଣ ସିଂହ। ସେ ୧୬ ବର୍ଷ ୨୩ ଦିନ ବୟସରେ ୧୯୬୯ରେ ଏହି କୀର୍ତ୍ତି ହାସଲ କରିଥିଲେ।
ଏବେ ବୈଭବ ତାଙ୍କ ରେକର୍ଡକୁ ପଛରେ ପକାଇ ଦେଇଛନ୍ତି। ପୀୟୂଷ ଚାୱଲା ମଧ୍ୟ ୧୬ ବର୍ଷ ୩୦୭ ଦିନ ବୟସରେ ଦୁଲୀପ ଟ୍ରଫିରେ ଫିଫ୍ଟି ମାରିଥିଲେ।
ଦଲୀପ ଟ୍ରଫିରେ ସବୁଠାରୁ କମ ବୟସରେ ଫିଫ୍ଟି
-୧୫ ବର୍ଷ ୧୫୭ ଦିନ ବୈଭବ ସୂର୍ଯ୍ୟବଂଶୀ
-୧୬ ବର୍ଷ ୨୩ ଦିନ ଲକ୍ଷ୍ମଣ ସିଂହ
-୧୬ ବର୍ଷ ୩୦୭ ଦିନ ପୀୟୂଷ ଚାୱଲା
ଏହି ରେକର୍ଡ ସହିତ ବୈଭବ ଦୁଲୀପ ଟ୍ରଫିରେ ୧୬ ବର୍ଷ ବୟସ ପୂର୍ବରୁ ଅର୍ଦ୍ଧଶତକ ହାସଲ କରିଥିବା ପ୍ରଥମ ବ୍ୟାଟର ହୋଇଛନ୍ତି।