ନୂଆଦିଲ୍ଲୀ, ୩୧।୮: ଦୁଲୀପ ଟ୍ରଫି ଡେବ୍ୟୁ ମ୍ୟାଚରେ ବୈଭବ ସୂର୍ଯ୍ୟବଂଶୀ ମାତ୍ର ୮ ରନ କରି ଆଉଟ ହେବା ପରେ ତାଙ୍କ ରେଡ ବଲ ଟେମ୍ପରାମେଣ୍ଟକୁ ନେଇ ଅନେକ ପ୍ରଶ୍ନ ଉଠିଥିଲା। କିନ୍ତୁ ସେମିଫାଇନାଲରେ ୮୧ ବଲରେ ୯୨ ରନର ଧୂଆଁଧାର ପାରି ଖେଳି ବୈଭବ ସମସ୍ତ ସମାଲୋଚକଙ୍କୁ ଦମଦାର ଜବାବ ଦେଇଛନ୍ତି। ସେଣ୍ଟ୍ରାଲ ଜୋନ ବିପକ୍ଷ ସେମିଫାଇନାଲରେ ବୈଭବ ୭ଟି ଚୌକା ଓ ୭ଟି ଛକା ସହ ୯୨ ରନ କରିଥିଲେ। ଏହା ସହିତ ସେ ଦୁଲୀପ ଟ୍ରଫି ଇତିହାସରେ ସବୁଠାରୁ କମ୍ ବୟସରେ ଅର୍ଦ୍ଧଶତକ ହାସଲ କରିବାର ରେକର୍ଡ ମଧ୍ୟ ନିଜ ନାମରେ କରିଛନ୍ତି।
ଦୁଲୀପ ଟ୍ରଫି ପାଇଁ ବୈଭବଙ୍କୁ ଇଷ୍ଟ ଜୋନ ଦଳରେ ସ୍ଥାନ ମିଳିଥିଲା। ଅଗଷ୍ଟ ୨୩ରେ ନର୍ଥ ଇଷ୍ଟ ଜୋନ ବିପକ୍ଷରେ ସେ ଡେବ୍ୟୁ କରିଥିଲେ। କିନ୍ତୁ ପ୍ରଥମ ମ୍ୟାଚରେ ୬ ବଲରୁ ମାତ୍ର ୮ ରନ କରି ପ୍ୟାଭିଲିୟନ ଫେରିଥିଲେ। ଏହା ପରେ ତାଙ୍କ ବ୍ୟାଟିଂ ଶୈଳୀ ଓ ରେଡ ବଲ କ୍ରିକେଟର ଟେମ୍ପରାମେଣ୍ଟକୁ ନେଇ ପ୍ରଶ୍ନ ଉଠିଥିଲା। କିଛି କ୍ରିକେଟ ପ୍ରଶଂସକ ଓ ବିଶେଷଜ୍ଞ ତାଙ୍କୁ କେବଳ T20 ଫର୍ମାଟ୍ର ଖେଳାଳି ବୋଲି କହିଥିଲେ। ଦୁଲୀପ ଟ୍ରଫି ଭଳି ପ୍ରତିଷ୍ଠିତ ରେଡ ବଲ ଟୁର୍ନାମେଣ୍ଟରେ ତାଙ୍କୁ ଖେଳାଇବା ନିଷ୍ପତ୍ତି ଉପରେ ମଧ୍ୟ ପ୍ରଶ୍ନ ଉଠିଥିଲା। ବେଙ୍ଗାଲୁରୁର ସେଣ୍ଟର ଅଫ ଏକ୍ସିଲେନ୍ସ ପିଚ୍ରେ ବଡ଼ ବଡ଼ ବ୍ୟାଟରଙ୍କୁ ରନ କରିବାରେ ସମସ୍ୟା ହେଉଥିଲା। କିନ୍ତୁ ବୈଭବ ନିଜ ଆକ୍ରମଣାତ୍ମକ ଶୈଳୀରେ ବ୍ୟାଟିଂ କରିଥିଲେ। ୯୨ ରନ୍ର ପାରିରେ ୭ ଚୌକା ଓ ୭ ଛକା ମାରିବା ତାଙ୍କ ଆତ୍ମବିଶ୍ୱାସର ପ୍ରମାଣ। ଶତକଠାରୁ ମାତ୍ର ୮ ରନ ଦୂରରେ ଥିଲେ ମଧ୍ୟ ସେ ନିଜ ଆକ୍ରମଣାତ୍ମକ ଶୈଳୀ ବଦଳାଇନଥିଲେ। ବଡ଼ ଶଟ୍ ଖେଳିବା ଚେଷ୍ଟାରେ ବାଉଣ୍ଡାରିରେ କ୍ୟାଚ ଆଉଟ ହୋଇଥିଲେ।
ତାଙ୍କ ଏହି ବ୍ୟାଟିଂ ଶୈଳୀ ଦେଖି ଅନେକଙ୍କୁ ପୂର୍ବତନ ଭାରତୀୟ ଓପନର ବୀରେନ୍ଦ୍ର ସେହୱାଗଙ୍କ କଥା ମନେ ପଡ଼ିଛି। ଉଭୟଙ୍କ ବ୍ୟାଟିଂ ଶୈଳୀ ଭିନ୍ନ ହୋଇଥିଲେ ମଧ୍ୟ ନିଜ ଖେଳ ଉପରେ ଅତୁଟ ବିଶ୍ୱାସ ଦୁହିଁଙ୍କ ମଧ୍ୟରେ ବଡ଼ ସମାନତା। ମାତ୍ର ୧୫ ବର୍ଷ ବୟସରେ ନିଜଠାରୁ ଅଧିକ ଅଭିଜ୍ଞ ଖେଳାଳିଙ୍କୁ ନେତୃତ୍ୱ ଦେବା ଏକ ବଡ଼ ଚ୍ୟାଲେଞ୍ଜ। କିନ୍ତୁ ବୈଭବ ଏହି ଦାୟିତ୍ୱକୁ ମଧ୍ୟ ଭଲ ଭାବେ ସମ୍ଭାଳିଥିବା ଦେଖିବାକୁ ମିଳିଛି। ସେମିଫାଇନାଲରେ ନିୟମିତ ଅଧିନାୟକ ଈଶାନ କିଶନ ଆହତ ହୋଇ ମଇଦାନରୁ ବାହାରିଯିବା ପରେ ଦଳର ଦାୟିତ୍ୱ ବୈଭବଙ୍କ ଉପରେ ଆସିଥିଲା। ଫିଲ୍ଡିଂ ସଜାଇବାଠାରୁ ଆରମ୍ଭ କରି ବୋଲରଙ୍କୁ ସଠିକ ସମୟରେ ବ୍ୟବହାର କରିବା ଓ DRS ନେବା ଭଳି ନିଷ୍ପତ୍ତିରେ ମଧ୍ୟ ସେ ପରିପକ୍ୱତା ଦେଖାଇଥିଲେ।
ବୈଭବ କେବଳ ବିସ୍ଫୋରକ ବ୍ୟାଟର ନୁହେଁ। ନର୍ଥ ଇଷ୍ଟ ଜୋନ ବିପକ୍ଷ ମ୍ୟାଚରେ ସେ ବୋଲିଂରେ ମଧ୍ୟ ଚମତ୍କାର କରିଥିଲେ। ମାତ୍ର ୩ ଓଭରରେ ୧୧ ରନ ଦେଇ ୨ଟି ଉଇକେଟ୍ ନେଇଥିଲେ।
ନିଜ ବୋଲିଂକୁ ନେଇ ବୈଭବ ମଜାଦାର ଭାବେ କହିଥିଲେ ଯେ, ଈଶାନ ଭାଇଙ୍କୁ ତାଙ୍କୁ ବୋଲିଂ ଦେବା ରିସ୍କ ଲାଗୁଥିଲା। କିନ୍ତୁ ସେ ନିଜକୁ ‘ଉଇକେଟ୍ ଟେକର’ ବୋଲର ବୋଲି କହିଥିଲେ। ବୈଭବଙ୍କ ସାମ୍ପ୍ରତିକ ପ୍ରଦର୍ଶନକୁ ଦେଖିଲେ ତାଙ୍କୁ ଭାରତୀୟ କ୍ରିକେଟ୍ରେ ଆଗାମୀ ବଡ଼ ତାରକା ବୋଲି କହିବା ଭୁଲ ହେବ ନାହିଁ। ବର୍ତ୍ତମାନ ସେ ସିନିୟର ଦଳ ପାଇଁ T20 ଫର୍ମାଟରେ ସୁଯୋଗ ପାଇଛନ୍ତି। ତେବେ ଦୁଲୀପ ଟ୍ରଫି ଭଳି କଠିନ ରେଡ ବଲ ପ୍ରତିଯୋଗିତାରେ ତାଙ୍କ ପ୍ରଦର୍ଶନ ଚୟନକର୍ତ୍ତାଙ୍କୁ ନିଶ୍ଚିତ ଭାବେ ବଡ଼ ସନ୍ଦେଶ ଦେଇଛି। ବ୍ୟାଟିଂ ହେଉ କି ବୋଲିଂ, ଅଧିନାୟକତ୍ୱ ହେଉ କି ଚାପ ସମ୍ଭାଳିବାର କ୍ଷମତାମାତ୍ର ୧୫ ବର୍ଷ ବୟସରେ ବୈଭବ ଯେଉଁ ପରିପକ୍ୱତା ଦେଖାଉଛନ୍ତି, ତାହା ତାଙ୍କୁ ଭବିଷ୍ୟତର ଜଣେ ସମ୍ପୂର୍ଣ୍ଣ କ୍ରିକେଟର ଭାବେ ଗଢ଼ି ତୋଳୁଛି।