ଭୁବନେଶ୍ୱର, ୪।୫(ବ୍ୟୁରୋ): ରାଜ୍ୟରେ ସୋମବାରଠାରୁ ତୃତୀୟ ପର୍ଯ୍ୟାୟ ଟିକାକରଣ ଆରମ୍ଭ ହୋଇଛି। କିନ୍ତୁ ଟିକା ଅଭାବ ଯୋଗୁ ଏହା କେବଳ ଭୁବନେଶ୍ୱରରେ ଚାଲିଛି। ଖୁବ୍ଶୀଘ୍ର ରାଜ୍ୟର ଅନ୍ୟ ସ୍ଥାନରେ ଆରମ୍ଭ ହେବ ବୋଲି କୁହାଯାଇଥିଲେ ମଧ୍ୟ ଏଥିରେ ବହୁ ବିଳମ୍ବ ହେବାର ଆଶଙ୍କା ଦେଖାଦେଇଛି। କାରଣ ଟିକା ନ ଥିବାରୁ ଏବେ ବି ବହୁ ଟିକାଦାନ କେନ୍ଦ୍ର ବନ୍ଦ ରହିଛି। ରାଜ୍ୟରେ ଥିବା ୧୫୦୦ ଟିକାକରଣ କେନ୍ଦ୍ର ମଧ୍ୟରୁ ସୋମବାର ମାତ୍ର ୨୫୬ କେନ୍ଦ୍ରରେ ଟିକାକରଣ ହୋଇଥିଲା। ମଙ୍ଗଳବାର ୧୨୩ରେ କେନ୍ଦ୍ରରେ ଟିକାକରଣ ହେବ। ତେବେ ବାଲେଶ୍ୱର, ବରଗଡ଼, ବୌଦ୍ଧ, କଟକ, ଗଜପତି, ଜଗତ୍ସିଂହପୁର, କନ୍ଧମାଳ, କୋରାପୁଟ, ନବରଙ୍ଗପୁର, ସମ୍ବଲପୁର ଓ ସୋନପୁର ଆଦି ୧୧ ଜିଲାରେ ଟିକାକରଣ ସମ୍ପୂର୍ଣ୍ଣ ବନ୍ଦ ରହିବ। ରାଜ୍ୟରେ ଏବେ ୧୯,୯୦୦ ଡୋଜ୍ କୋଭିଶିଲ୍ଡ ଓ ୩,୧୫,୫୩୦ ଡୋଜ୍ କୋଭାକ୍ସିନ୍ ଟିକା ଗଚ୍ଛିତ ରହିଛି। ଏହାଛଡ଼ା ରାଜ୍ୟ ସରକାର ନିଜେ କିଣିଥିବା ୧,୪୩,୫୦୦ ଡୋଜ୍ କୋଭାକ୍ସିନ ଟିକା ରହିଛି। ଆଉ ୨୫ଲକ୍ଷ ଡୋଜ୍ ଟିକା ପାଇଁ ରାଜ୍ୟ ସରକାର ଅର୍ଡର ଦେଇଛନ୍ତି। ଆସନ୍ତା ଦୁଇ ତିନିଦିନ ଭିତରେ ଆଉ ଟିକା ଆସିବାର ସମ୍ଭାବନା ରହିଛି। ଆବଶ୍ୟକ ଟିକା ଆସିଗଲେ ପୁଣି ସବୁ କେନ୍ଦ୍ରରେ ଟିକାକରଣ ବ୍ୟାପକ କରାଯିବ ବୋଲି ପରିବାର କଲ୍ୟାଣ ନିର୍ଦ୍ଦେଶକ ଡା. ବିଜୟ ପାଣିଗ୍ରାହୀ କହିଛନ୍ତି।
ସେପଟେ ରାଜ୍ୟରେ ଆସନ୍ତା ୫ ତାରିଖରୁ ଲକ୍ଡାଉନ୍ ହେବ। ୧୯ ତାରିଖ ସକାଳ ୫ଟା ପର୍ଯ୍ୟ ଏହା ଲାଗୁ ହେବ। ଏହି ସମୟରେ ପୂର୍ବଭଳି ସପ୍ତାହାନ୍ତ ଶଟ୍ଡାଉନ୍ ବଳବତ୍ତର ରହିବ। ତେବେ ଏହି ସମୟରେ ଟିକାକରଣ ଜାରି ରହିବ। ରବିବାରକୁ ଛାଡ଼ି ସୋମବାରରୁ ଶନିବାର ଟିକାକରଣ ହେବ। ସରକାରୀ ଛୁଟିଦିନରେ ମଧ୍ୟ ଟିକାକରଣ ହେବ। ଏ ନେଇ ସୋମବାର ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ଅତିରିକ୍ତ ମୁଖ୍ୟ ଶାସନ ସଚିବ ପ୍ରଦୀପ୍ତ କୁମାର ମହାପାତ୍ର ସମସ୍ତ ଜିଲାପାଳ, ମହାନଗର ନିଗମ କମିଶନର, ଜିଲା ମୁଖ୍ୟ ଚିକିତ୍ସାଧିକାରୀଙ୍କୁ ଚିଠି ଲେଖି ଜଣାଇଛନ୍ତି। ଏହି ସମୟରେ ନିରବଚ୍ଛିନ୍ନ ଭାବେ ଟିକାକରଣ ଚାଲୁ କରିବା ପାଇଁ ସେ ନିର୍ଦ୍ଦେଶ ଦେଇଛନ୍ତି। ଏଥିସହ ଟିକାକରଣ ପାଇଁ ସମସ୍ତ ଯୋଗ୍ୟ ହିତାଧିକାରୀଙ୍କୁ ଏହି ସମୟରେ ଯାତାୟାତ ଅନୁମତି ମିଳିବ।
