କଟକ ଅଫିସ, ୨୯ା୪: ରାଜ୍ୟରେ କରୋନାର ଦ୍ୱିତୀୟ ଲହର ଅଧିକ ସଂକ୍ରାମକ ରହିଛି। ପ୍ରତିଦିନ ରେକର୍ଡ ସଂଖ୍ୟକ ସଂକ୍ରମିତ ଚିହ୍ନଟ ହେଉଛନ୍ତି। ଏପରି କି ମୃତ୍ୟୁସଂଖ୍ୟା ମଧ୍ୟ ବଢ଼ିବାରେ ଲାଗିଛି। ଏପ୍ରିଲ ମାସରେ କେବଳ ୮୭,୫୯୮ ଚିହ୍ନଟ ହୋଇଥିବାବେଳେ ୯୬ଜଣଙ୍କ ମୃତ୍ୟୁ ଘଟିଲାଣି। ମେ’ ମାସରେ ଏହା ଆହୁରି ବଢ଼ିବ ବୋଲି ସ୍ବାସ୍ଥ୍ୟ ବିଶେଷଜ୍ଞମାନେ ମତ ଦେଉଛନ୍ତି। ଏଭଳିସ୍ଥିତିରେ ଟିକାକରଣକୁ ଗୁରୁତ୍ୱ ଦିଆଯାଉଛି। ଏହା ଶରୀରର ରୋଗ ପ୍ରତିରୋଧକ ଶକ୍ତିକୁ ବୃଦ୍ଧି କରିବାରେ ସହାୟକ ହୋଇଥାଏ। ରାଜ୍ୟରେ କୋଭାକ୍ସିନ ଓ କୋଭିଶିଲ୍ଡ ଟିକାକୁ କିପରି ଅଧିକରୁ ଅଧିକ ଲୋକଙ୍କୁ ଦିଆଯାଇପାରିବ ସେନେଇ ଚେଷ୍ଟା ଜାରି ରହିଥିବା କୁହାଯାଉଥିବାବେଳେ ଟିକା ଅଭାବରୁ ଅନେକ ଟିକାକରଣ କେନ୍ଦ୍ର ବନ୍ଦ ହୋଇଗଲାଣି। ଏହା ସତ୍ତ୍ୱେ ଟିକା ଲୋକଙ୍କ ପାଇଁ ଅତି ଜରୁରୀ ବୋଲି ସ୍ବାସ୍ଥ୍ୟ ବିଶେଷଜ୍ଞ ମତ ଦେଉଛନ୍ତି।
ଟିକାର ପ୍ରଭାବ ଏବଂ ପାର୍ଶ୍ୱ ପ୍ରତିକ୍ରିୟା ନେଇ ଭୁବନେଶ୍ୱରସ୍ଥିତ ଆଦିତ୍ୟ ଅଶ୍ୱିନୀ ହସ୍ପିଟାଲର ଛାତି ଓ ଯକ୍ଷ୍ମାରୋଗ ବିଶେଷଜ୍ଞ ଡା. ସମ୍ପଦ ଦାସଙ୍କ କହିବାନୁସାରେ, ସଂକ୍ରମଣରୁ ରକ୍ଷା ପାଇବା ପାଇଁ ଆମ ଶରୀରରେ ରୋଗ ପ୍ରତିରୋଧକ ଶକ୍ତି ବୃଦ୍ଧି ହେବା ଜରୁରୀ। ଏହି ରୋଗ ପ୍ରତିରୋଧକ ଶକ୍ତି ଦୁଇ ପ୍ରକାରର। ସ୍ବଳ୍ପ ସମୟ ପାଇଁ ଦେହରେ ବୃଦ୍ଧି କରାଇ ପାରୁଥିବା ରୋଗ ପ୍ରତିରୋଧକ ଶକ୍ତି ଟିକାକୁ ଆମେ ଇମ୍ୟୁନୋଗ୍ଲୋବୁଲିନ-ଏମ୍ କହିଥାଉ। ଯେପରି କି ଟକ୍ସାଇଡ୍ ଇଞ୍ଜେକ୍ସନ୍। ସେହିପରି ଦୀର୍ଘ ସମୟ ପାଇଁ ଦେହରେ ରୋଗ ପ୍ରତିରୋଧକ ଶକ୍ତି ବୃଦ୍ଧି କରାଇ ପାରୁଥିବା ଟିକାକୁ ଆମେ ଇମ୍ୟୁନୋଗ୍ଲୋବୁଲିନ-ଜି କହିଥାଉ। କରୋନା ସଂକ୍ରମଣରୁ ରକ୍ଷା ନିମନ୍ତେ ଯେଉଁ କୋଭାକ୍ସିନ୍ ଓ କୋଭିଶିଲ୍ଡ ଟିକା ଦିଆଯାଉଛି ତାହା ଇମ୍ୟୁନୋଗ୍ଲୋବୁଲିନ-ଜି ବର୍ଗର ଅଟେ। କୋଭାକ୍ସିନ୍ ଏବଂ କୋଭିଶିଲ୍ଡ ଟିକା ରକ୍ତରେ ଥିବା ପ୍ଲାଜ୍ମାରେ ରୋଗ ପ୍ରତିରୋଧକ ଶକ୍ତି ବୃଦ୍ଧି କରିବାରେ ସହାୟକ ହେଉଛି। ତେବେ ମୋ ନିକଟରେ ଯେଉଁ ୩ ହଜାର ବ୍ୟକ୍ତି କୋଭାକ୍ସିନ ଟିକା ନେଇଛନ୍ତି ସେମାନଙ୍କ ମଧ୍ୟରୁ ମାତ୍ର ୧୦ପ୍ରତିଶତଙ୍କୁ ସାମାନ୍ୟ ଜ୍ୱର ଆସିଥିବାବେଳେ ୫ପ୍ରତିଶତଙ୍କ ଠାରେ ବିନ୍ଧାବିନ୍ଧିର ପାର୍ଶ୍ୱ ପ୍ରତିକ୍ରିୟା ଦେଖାଦେଇଥିବା ଜଣାପଡ଼ିଛି। ୨ଡୋଜ୍ ଟିକା ନେବା ପରେ ମଧ୍ୟ ଜଣଙ୍କ ଠାରେ ସଂକ୍ରମଣର ଆଶଙ୍କା ରହିଛି। ଏହା କେବଳ ଶରୀର ପ୍ରତିରୋଧକ ଶକ୍ତିକୁ ବୃଦ୍ଧି କରିବାରେ ସହାୟକ ହୋଇଥାଏ। ଗୋଟିଏ ଭାଏଲରେ ୧୦ଟି ଡୋଜ୍ ରହୁଥିବା ବେଳେ ପ୍ରତ୍ୟେକ ବ୍ୟକ୍ତିଙ୍କୁ ୦.୫ ଏମ୍ଏଲ୍ ଡୋଜ୍ ଦିଆଯାଉଛି। କୋଭାକ୍ସିନ ଟିକା ପ୍ରଥମ ଡୋଜ୍ ନେବାର ୪ ରୁ ୬ସପ୍ତାହ ମଧ୍ୟରେ ଦ୍ୱିତୀୟ ଡୋଜ୍ ନେବାକୁ କୁହାଯାଉଥିବାବେଳେ କୋଭିଶିଲ୍ଡ ଟିକା ପ୍ରଥମ ଡୋଜ୍ ନେବାର ୬ ରୁ ୮ସପ୍ତାହ ମଧ୍ୟରେ ଦ୍ୱିତୀୟ ଡୋଜ୍ ନେବାକୁ କୁହାଯାଉଛି। ପ୍ରଥମ ଡୋଜ୍ ନେବାର ନିର୍ଦ୍ଧାରିତ ସମୟ ମଧ୍ୟରେ ୨ୟ ଡୋଜ୍ ନ ନେଲେ ପ୍ରଥମ ଡୋଜ୍ର ପ୍ରଭାବ ବିଶେଷ ଭାବେ କାର୍ଯ୍ୟ କରିବ ନାହିଁ। ଉଭୟ ଟିକାର କାର୍ଯ୍ୟକାରିତା ସମାନ ଅଟେ। କେବଳ ୨ଟି ଅଲଗା କମ୍ପାନୀ ଦ୍ୱାରା ଏହା ପ୍ରସ୍ତୁତ ହୋଇଛି ବୋଲି ଡା. ଦାଶ କହିଛନ୍ତି।