ଉମରକୋଟ, ୨୬।୦୭ (ସନ୍ତୋଷ ସତପଥୀ): ନବରଙ୍ଗପୁର ଜିଲା ଉମରକୋଟ ବ୍ଲକର ବାଟିବେଡ଼ା ସରକାରୀ ଆଶ୍ରମ ବିଦ୍ୟାଳୟରେ ଜଣେ ଅଷ୍ଟମ ଶ୍ରେଣୀ ହଷ୍ଟେଲ ଛାତ୍ରୀଙ୍କ ସନ୍ଦିଗ୍ଧ ମୃତ୍ୟୁ ଘଟଣାକୁ ନେଇ ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି ହୋଇଛି। ମୃତ ଛାତ୍ରୀଙ୍କ ଘର ଉମରକୋଟ ବ୍ଲକର ଦଲଦଲି ଗ୍ରାମରେ ବୋଲି ଜଣାପଡ଼ିଛି।
ସୂଚନା ଅନୁଯାୟୀ, ଶନିବାର ରାତିରେ ହଷ୍ଟେଲର ସମସ୍ତ ଛାତ୍ରୀ ଭୋଜନ କରିବାକୁ ଯାଇଥିବା ବେଳେ ତିନିଜଣ ଛାତ୍ରୀ ଅନୁପସ୍ଥିତ ଥିଲେ। ପରେ ବିଦ୍ୟାଳୟ କର୍ତ୍ତୃପକ୍ଷ ସେମାନଙ୍କୁ ଖୋଜିବା ଆରମ୍ଭ କରିଥିଲେ। କିଛି ସମୟ ପରେ ଦୁଇଜଣ ଛାତ୍ରୀଙ୍କୁ ଠାବ କରାଯାଇଥିଲା। ସେମାନେ ଅନ୍ୟ ଜଣେ ଛାତ୍ରୀ ଜବା ସାନ୍ତା ସ୍କୁଲ ପାଚେରୀ ଡେଇଁ ବାହାରକୁ ଯାଇ ବିଦ୍ୟାଳୟ ନିକଟସ୍ଥ ଏକ ଗଛରେ ଝୁଲି ପଡ଼ିଥିବା କଥା କହିଥିବା ଜଣାପଡ଼ିଛି। ପରେ ବିଦ୍ୟାଳୟ କର୍ତ୍ତୃପକ୍ଷ ଘଟଣାସ୍ଥଳରେ ପହଞ୍ଚି ଛାତ୍ରୀ ନିଜ ଓଢ଼ଣୀ ସାହାଯ୍ୟରେ ଗଛରେ ଝୁଲିଥିବା ଦେଖିଥିବା ସୂଚନା ମିଳିଛି। ଏହାପରେ ବିଦ୍ୟାଳୟର ପ୍ରଧାନ ଶିକ୍ଷକ ଉମରକୋଟ ଥାନାରେ ଲିଖିତ ଅଭିଯୋଗ କରିଥିଲେ। ସେହିପରି ବିଦ୍ୟାଳୟର ଜଣେ ଶିକ୍ଷକ ଛାତ୍ରୀଙ୍କ ଘରକୁ ଯାଇ ପରିବାର ଲୋକଙ୍କୁ ଘଟଣା ସମ୍ପର୍କରେ ଅବଗତ କରାଇଥିଲେ।
ଖବର ପାଇ ପରିବାର ଲୋକେ ବିଦ୍ୟାଳୟରେ ପହଞ୍ଚିବା ସହ ଉମରକୋଟ ଥାନାରେ ମଧ୍ୟ ଅଭିଯୋଗ ଦାଖଲ କରିଛନ୍ତି। ଘଟଣାର ନିରପେକ୍ଷ ଓ ସଠିକ ତଦନ୍ତ କରିବାକୁ ସେମାନେ ଦାବି କରିଛନ୍ତି।
ପରିବାର ପକ୍ଷରୁ ଅଭିଯୋଗ କରାଯାଇଛି ଯେ, ଛାତ୍ରୀ ଜଣକ କିପରି ବିଦ୍ୟାଳୟ ପାଚେରୀ ଡେଇଁ ବାହାରକୁ ଗଲେ ଏବଂ ଏକ ଶୁଖିଲା ଗଛରେ ଚଢ଼ି ଝୁଲିପଡ଼ିଲେ, ତାହା ସନ୍ଦେହଜନକ। ଏଥିପାଇଁ ସେମାନେ ବିଦ୍ୟାଳୟ କର୍ତ୍ତୃପକ୍ଷଙ୍କ ଭୂମିକା ନେଇ ପ୍ରଶ୍ନ ଉଠାଇଛନ୍ତି। ଘଟଣାର ତଦନ୍ତ ଉମରକୋଟ ପୋଲିସ ପକ୍ଷରୁ ଜାରି ରହିଥିବା ବେଳେ ଖବର ଲେଖାହେବା ସୁଦ୍ଧା ବିଦ୍ୟାଳୟ କର୍ତ୍ତୃପକ୍ଷଙ୍କ ପକ୍ଷରୁ ଏହି ଘଟଣା ଉପରେ କୌଣସି ସରକାରୀ ପ୍ରତିକ୍ରିୟା ମିଳିପାରି ନଥିଲା।
