୩୦୦ କିଲୋ ଯୁବକଙ୍କୁ ଡାକ୍ତରଙ୍କଠାରୁ ମିଳିଥିଲା ଏମିତି ଚେତାବନୀ: ୪ ବର୍ଷ ପରେ…

ନ୍ୟୁୟର୍କ,୧୨।୩: ଆମେରିକାର ମିସିସିପି ସହରରେ ରହୁଥିବା ଜଣେ ଯୁବକ ଚାରି ବର୍ଷରେ ୧୬୫ କିଲୋ ଓଜନ ହ୍ରାସ ସମସ୍ତଙ୍କୁ ଆଶ୍ଚର୍ଯ୍ୟ କରିଛନ୍ତି। ଚାରି ବର୍ଷ ପୂର୍ବେ ୪୨ ବର୍ଷିୟ ନିକୋଲାସ କ୍ରାଫ୍ଟଙ୍କ ଓଜନ ପ୍ରାୟ ୩୦୦ କିଲୋ ଥିଲା। ଜଣେ ଡାକ୍ତର ଯୁବକଙ୍କୁ କହିଥିଲେ ଯେ, ସେ ଚାଲୁଥିବା ବୋମା ହୋଇଯାଇଛନ୍ତି ଏବଂ ଯେକୌଣସି ମୁହୂର୍ତ୍ତରେ ତାଙ୍କ ଜୀବନ ଯାଇପାରେ। ଏହା ଯୁବକଙ୍କୁ ଏତେ ଚିନ୍ତିତ କଲା ଯେ ସେ ଓଜନ ହ୍ରାସ କରିବାକୁ ସ୍ଥିର କଲେ।
୨୦୧୯ରେ ନିକୋଲାସ ଓଜନ ହ୍ରାସ କରିବାକୁ ସ୍ଥିର କଲେ। ପ୍ରଥମ ମାସରେ ସେ ଏକ ସନ୍ତୁଳିତ ଖାଦ୍ୟ ଗ୍ରହଣ କରି ୧୮ କିଲୋ ହ୍ରାସ କରିଥିଲେ। ପିଲାଦିନରୁ ନିକୋଲାସଙ୍କର ଅଧିକ ଓଜନ ଏକ ସମସ୍ୟା ଥିଲା ଏବଂ ଉଚ୍ଚ ବିଦ୍ୟାଳୟରେ ପଢୁଥିବାବେଳେ ତାଙ୍କର ଓଜନ ପ୍ରାୟ ୧୩୬ କିଲୋଗ୍ରାମ ଥିଲା। କ୍ରାଫ୍ଟ କହିଛନ୍ତି ଯେ, ଚାପ ଯୋଗୁ ସେ ଅଧିକ ଖାଦ୍ୟ ଖାଉଥିଲେ ଏବଂ ସେହି କାରଣରୁ ତାଙ୍କର ଓଜନ ଏତେ ବଢିଯାଇଥିଲା। ଭାରୀ ଓଜନ ହେତୁ ସେ ଶରୀରରେ ଯନ୍ତ୍ରଣା, ଆଣ୍ଠୁ ଯନ୍ତ୍ରଣା ଏବଂ ନିଶ୍ୱାସପ୍ରଶ୍ୱାସ ନେବାରେ କଷ୍ଟ ଅନୁଭବ କଲେ।
ପରିସ୍ଥିତି ଏପରି ହୋଇଯାଇଥିଲା ଯେ, କ୍ରାଫ୍ଟ ଏକ କାରରେ ବସିପାରୁ ନ ଥିବାରୁ ଘରୁ ବାହାରି ପାରି ନ ଥିଲେ। ଏହି କାରଣରୁ ଲୋକଙ୍କ ସହ ତାଙ୍କର ସାକ୍ଷାତ ମଧ୍ୟ ବନ୍ଦ ହୋଇଯାଇଥିଲା। ୨୦୧୯ରେ, ଜଣେ ଡାକ୍ତର କ୍ରାଫ୍ଟରଙ୍କୁ କହିଥିଲେ, ତୁମେ ସର୍ବାଧିକ ଚାରିରୁ ପାଞ୍ଚ ବର୍ଷ ପର୍ଯ୍ୟନ୍ତ ବଞ୍ଚିବେ। ଏହା ପରେ କ୍ରାଫ୍ଟ ଓଜନ ହ୍ରାସ କରିବାକୁ ଚିନ୍ତା କଲେ। ବର୍ତ୍ତମାନ ନିକୋଲାସ କ୍ରାଫ୍ଟ ସଂପୂର୍ଣ୍ଣ ବଦଳି ଯାଇଛନ୍ତି।