ଓ୍ବାଶିଂଟନ, ୫।୯ : ରୁଷିଆ ଏବଂ ୟୁକ୍ରେନ ମଧ୍ୟରେ ଯୁଦ୍ଧ ଥମିବାର ନା ଧରୁନି। ଏହା ଯୋଗୁ ୟୁରୋପରେ ମଧ୍ୟ ସଙ୍କଟ ସୃଷ୍ଟି ହୋଇଛି। ଆମେରିକା ଏବଂ ପାଶ୍ଚାତ୍ୟ ଦେଶଗୁଡିକର ପ୍ରତିବନ୍ଧକ ବିରୁଦ୍ଧରେ ରୁଷିଆ ୟୁରୋପକୁ ତୈଳ ଓ ଗ୍ୟାସ ଯୋଗାଣକୁ ମଧ୍ୟ ବନ୍ଦ କରି ଦେଇଛି।
ଏପରିସ୍ଥଳେ ତୁର୍କୀ ଏବଂ ରୁଷିଆ ମଧ୍ୟରେ ସହଯୋଗ ଗତ ୬ ମାସ ମଧ୍ୟରେ ମଜବୁତ ହୋଇଛି। କେବଳ ଏତିକି ନୁହେଁ, ରୁଷିଆ ଏବଂ ୟୁକ୍ରେନ ମଧ୍ୟରେ ତୁର୍କୀ ସଚ୍ଚୋଟ ଏବଂ ନିରପେକ୍ଷ ମଧ୍ୟସ୍ଥି ଭାବରେ ଉଭା ହୋଇଛି। ଯେତେବେଳେ ଦୁଇ ଦେଶ ମଧ୍ୟରେ ଯୁଦ୍ଧ ଯୋଗୁ ବିଶ୍ୱ ସ୍ତରୀୟ ଖାଦ୍ୟ ସଙ୍କଟ ଗୁରୁତର ହେଲା, ତୁର୍କୀ ଦୁଇ ଦେଶ ମଧ୍ୟରେ ମଧ୍ୟସ୍ଥି ଭୂମିକା ଗ୍ରହଣ କରିଥିଲା। ପାଶ୍ଚାତ୍ୟ ଦେଶମାନେ ଏହା ମଧ୍ୟ ଦେଖିଥିଲେ ଯେ ଯୁଦ୍ଧ ମଧ୍ୟରେ ତୁର୍କୀ ଏହାର ବନ୍ଦର ମାଧ୍ୟମରେ ରୁଷିଆର ମଧ୍ୟସ୍ଥତା କରି ୟୁକ୍ରେନର ଶସ୍ୟ ଭଣ୍ଡାରକୁ ବିଶ୍ୱବାସୀଙ୍କ ପାଇଁ ଖୋଲିଥିଲା।
ତୁର୍କୀର ଏହି ମନୋଭାବ ହଠାତ ସୃଷ୍ଟି ହୋଇନାହିଁ। ଜାତିସଂଘର ପ୍ରତିବନ୍ଧକ ଅନୁଯାୟୀ କାର୍ଯ୍ୟ କରିବାରେ ତୁର୍କୀର ଏକ ସ୍ବତନ୍ତ୍ର ଏବଂ ଦୀର୍ଘ ଅଭିଜ୍ଞତା ଅଛି। ଦେଶର ଅର୍ଥନୀତିର ବିକାଶ ପାଇଁ ୟୁକ୍ରେନ-ରୁଷ ଯୁଦ୍ଧ ଦ୍ୱାରା ସୃଷ୍ଟି ହୋଇଥିବା ପରିସ୍ଥିତିର ସୁଯୋଗ ନେବାକୁ ତୁର୍କୀ ଯୋଜନା କରିଛି। ତୁର୍କୀ ରାଷ୍ଟ୍ରପତି ରେସେପ ତାୟିପି ଏର୍ଡୋଗାନ୍ ବାରମ୍ବାର କହିଛନ୍ତି ଯେ ସେ ରୁଷିଆ ଉପରେ ଲଗାଯାଇଥିବା ପାଶ୍ଚାତ୍ୟ ପ୍ରତିବନ୍ଧକକୁ କାର୍ଯ୍ୟକାରୀ କରିବେ ନାହିଁ। ତୁର୍କୀ ଏକ ନାଟୋ ସଦସ୍ୟ ଦେଶ। ଏହା ସତ୍ତ୍ୱେ ତୁର୍କୀ ରୁଷିଆ ପାଇଁ ନିଜର ଆକାଶ ମାର୍ଗ ସୀମାକୁ ବନ୍ଦ କରିନାହିଁ। ଏହାବ୍ୟତୀତ ଏହା ରୁଷୀୟମାନଙ୍କୁ ତୁର୍କୀ ବ୍ୟାଙ୍କଗୁଡ଼ିକରେ ଆକାଉଣ୍ଟ ଖୋଲିବାକୁ ଅନୁମତି ଦେଇଛି।
ନିକଟ ଅତୀତରେ ରୁଷିଆ ସହିତ ତୁର୍କୀର ବଢୁଥିବା ଘନିଷ୍ଠତା ଆମେରିକାର ଚିନ୍ତାକୁ ବୃଦ୍ଧି କରିଛି। ବାସ୍ତବରେ ତୁର୍କୀ ହେଉଛି ଆମେରିକାର ନାଟୋ ସହଯୋଗୀ। ଏହା ସତ୍ତ୍ୱେ ରୁଷିଆ ଉପରେ ପ୍ରତିବନ୍ଧକ ଲଗାଇବା ପରିବର୍ତ୍ତେ ତୁର୍କୀ ବାଣିଜି୍ୟକ ସମ୍ପର୍କକୁ କ୍ରମାଗତ ଭାବରେ ବୃଦ୍ଧି କରିଛି। ଏଥିସହ ମସ୍କୋ ତୁର୍କୀର ପ୍ରଥମ ଆଣବିକ କାରଖାନାକୁ ୨୦ ବିଲିୟନ ଡଲାରର ଅର୍ଥ ପ୍ରଦାନ କରୁଛି।
।
ତଥ୍ୟ ଦର୍ଶାଉଛି ଯେ ରୁଷିଆରୁ ତୁର୍କୀର ରପ୍ତାନି ପୂର୍ବ ଦିନ ତୁଳନାରେ ୬୦ପ୍ରତିଶତ ବୃଦ୍ଧି ହୋଇଛି। ଅପରପକ୍ଷରେ ବହୁ ଦେଶ ରୁଷିଆକୁ ରପ୍ତାନି ହ୍ରାସ କରିଛନ୍ତି।
