ୱାଶିଂଟନ/ନୂଆଦିଲ୍ଲୀ, ୧୮।୬(ପି.ଟି.): ପ୍ରତିରକ୍ଷା ଓ ସାମରିକ ରଣନୀତି କ୍ଷେତ୍ରରେ ଆମେରିକା ବଡ଼ ପଦକ୍ଷେପ ଗ୍ରହଣ କରିଛି। ୮ ବର୍ଷ ତଳର ଏକ ନିଷ୍ପତ୍ତିକୁ ବଦଳାଇ ଆମେରିକା ସରକାର ନିଜର ସବୁଠାରୁ ପ୍ରଭାବଶାଳୀ ସାମରିକ ୱିଙ୍ଗ୍ ‘ୟୁଏସ୍ ଇଣ୍ଡୋ-ପାସିଫିକ୍ କମାଣ୍ଡ’ର ନାମକୁ ପୁନର୍ବାର ‘ୟୁଏସ୍ ପାସିଫିକ୍ କମାଣ୍ଡ’ ଭାବେ ନାମିତ କରିଛନ୍ତି। ଆମେରିକା ପ୍ରତିରକ୍ଷା ମନ୍ତ୍ରଣାଳୟ (ପେଣ୍ଟାଗନ) ପକ୍ଷରୁ ମଙ୍ଗଳବାର ଏହି ଘୋଷଣା କରାଯାଇଛି। ଉକ୍ତ ମନ୍ତ୍ରଣାଳୟ ଅନୁଯାୟୀ, ୧୯୪୭ରେ ତତ୍କାଳୀନ ରାଷ୍ଟ୍ରପତି ହ୍ୟାରୀ ଟ୍ରୁମ୍ୟାନ୍ଙ୍କ ଦ୍ୱାରା ପ୍ରତିଷ୍ଠିତ ଏହି କମାଣ୍ଡର ଗୌରବମୟ ଐତିହାସିକ ପୃଷ୍ଠଭୂମିକୁ ସମ୍ମାନ ଜଣାଇ ଏହି ପୁରୁଣା ନାମକୁ ପୁନଃ ସ୍ଥାପିତ କରାଯାଇଛି। ଅନ୍ୟପକ୍ଷରେ ଏହି ନାମ ପରିବର୍ତ୍ତନ ପ୍ରକ୍ରିୟା ମଧ୍ୟରେ ‘ୟୁଏସ୍ ପାସିଫିକ କମାଣ୍ଡ’ ପକ୍ଷରୁ ଭାରତର ଏକ ଭୁଲ୍ ମାନଚିତ୍ର ବ୍ୟବହାର କରାଯାଇଥିବା ଅଭିଯୋଗ କରି ଭାରତରେ ରାଜନୀତି ଗରମ ହୋଇଛି। ଏହାକୁ ନେଇ ବିରୋଧୀ ଦଳ କଂଗ୍ରେସ ବୁଧବାର କେନ୍ଦ୍ରର ମୋଦି ସରକାରଙ୍କୁ କଡ଼ା ସମାଲୋଚନା କରିଛି।
ଆମେରିକା ପ୍ରତିରକ୍ଷା ମନ୍ତ୍ରଣାଳୟ ପକ୍ଷରୁ ଜାରି ବିବୃତିରେ କୁହାଯାଇଛି, ୧ ଜାନୁଆରୀ ୧୯୪୭ରେ ପ୍ରତିଷ୍ଠା ହେବା ପରଠାରୁ ପ୍ରାୟ ୭୦ ବର୍ଷରୁ ଅଧିକ ସମୟ ଧରି ଏହି ସାମରିକ ଗୋଷ୍ଠୀ ‘ୟୁଏସ୍ପିଏସିଓଏମ୍’ ବ୍ୟାନର ଅଧୀନରେ କାର୍ଯ୍ୟ କରୁଥିଲା। ଏହା ଆମେରିକାର ସବୁଠାରୁ ପୁରୁଣା ଏବଂ ସର୍ବବୃହତ୍ ମିଳିତ ସାମରିକ କମାଣ୍ଡ। ୨୦୧୮ରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ଙ୍କ ପ୍ରଥମ କାର୍ଯ୍ୟକାଳ ସମୟରେ ଏହାର ନାମ ବଦଳାଇ ‘ୟୁଏସ୍ ଇଣ୍ଡୋ-ପାସିଫିକ୍ କମାଣ୍ଡ’ କରାଯାଇଥିଲା। ଭାରତ ମହାସାଗର ଏବଂ ପ୍ରଶାନ୍ତ ମହାସାଗର ମଧ୍ୟରେ ବଢ଼ୁଥିବା ରଣନୈତିକ ସମ୍ପର୍କକୁ ସ୍ବୀକୃତି ଦେବା ପାଇଁ ସେତେବେଳେ ପ୍ରତିରକ୍ଷା ସଚିବ ଜେମ୍ସ ମାଟିସ୍ ଏହି ନାମକରଣ କରିଥିଲେ। ଆମେରିକାର ପଶ୍ଚିମ ଉପକୂଳଠାରୁ ଆରମ୍ଭ କରି ଭାରତର ପଶ୍ଚିମ ସୀମା ପର୍ଯ୍ୟନ୍ତ ଏହି ପ୍ରତିରକ୍ଷା କମାଣ୍ଡର ସାମରିକ କ୍ଷେତ୍ର ପରିବ୍ୟାପ୍ତ। ପେଣ୍ଟାଗନ ସ୍ପଷ୍ଟ କରିଛି ଯେ, ପୁରୁଣା ନାମ ‘ୟୁଏସ୍ପିଏସିଓଏମ୍’କୁ ଫେରାଇ ଆଣିବା ଦ୍ୱାରା ପ୍ରଶାନ୍ତ ମହାସାଗରୀୟ ଅଞ୍ଚଳରେ କାର୍ଯ୍ୟରତ ସୈନ୍ୟମାନଙ୍କ ମଧ୍ୟରେ ଗର୍ବ ଓ ସାମୂହିକ ଭାବନା ଜାଗ୍ରତ ହେବ। ନାମ ବଦଳିଲେ ମଧ୍ୟ ଏହି ଅଞ୍ଚଳର ସହଯୋଗୀ ରାଷ୍ଟ୍ରମାନଙ୍କ ସହ ମିଶି ଏକ ମୁକ୍ତ, ଅବାଧ ଓ ସୁରକ୍ଷିତ ସାମରିକ ବାତାବରଣ ବଜାୟ ରଖିବା ପାଇଁ ଆମେରିକାର ପ୍ରତିବଦ୍ଧତା ଏବଂ ମୂଳ ଲକ୍ଷ୍ୟ ଅପରିବର୍ତ୍ତିତ ରହିବ।
ଏହି ନାମ ପରିବର୍ତ୍ତନକୁ ନେଇ କଂଗ୍ରେସର ଗଣମାଧ୍ୟମ ଏବଂ ପ୍ରଚାର ବିଭାଗ ମୁଖ୍ୟ ପବନ ଖେଡ଼ା ‘X’ରେ ଏକ ପୋଷ୍ଟ ଶେୟାର କରିଛନ୍ତି। ସେଥିରେ ଦର୍ଶାଯାଇଛି ଯେ, ଆମେରିକାର ପାସିଫିକ୍ କମାଣ୍ଡ ଭାରତର ଏକ ଭୁଲ୍ ମାନଚିତ୍ର ବ୍ୟବହାର କରିଛି, ଯେଉଁଥିରୁ ଜମ୍ମୁ-କଶ୍ମୀରକୁ ବାଦ୍ ଦିଆଯାଇଛି ଏବଂ ପାକିସ୍ତାନ ଅଧିକୃତ କଶ୍ମୀର (ପିଓକେ)କୁ ପାକିସ୍ତାନର ଅଞ୍ଚଳ ଭାବେ ଦେଖାଯାଇଛି। ଖେଡ଼ା କହିଛନ୍ତି, ‘ମୋଦିଙ୍କ ବନ୍ଧୁମାନଙ୍କର ଭାରତ, ଭାରତର ସ୍ବାର୍ଥ ଏବଂ ଭାରତର ମିତ୍ରମାନଙ୍କ ବିରୋଧରେ କାର୍ଯ୍ୟ କରିବାର ଏକ ଅଦ୍ଭୁତ ଅଭ୍ୟାସ ରହିଛି। ଏହାର ସଦ୍ୟତମ ଉଦାହରଣ ହେଉଛି ୟୁଏସ୍ ପାସିଫିକ୍ କମାଣ୍ଡ ଦ୍ୱାରା ଭାରତର ଭୁଲ୍ ମାନଚିତ୍ରର ବ୍ୟବହାର।’ ସେ ଆହୁରି କହିଛନ୍ତି, ‘ଯେତେବେଳେ ଦେଶର ପ୍ରଧାନମନ୍ତ୍ରୀ ନିଜ ଦେଶକୁ ଏଭଳି ଏକ ଶୋଷଣମୂଳକ ବନ୍ଧୁତା (ଏକ୍ସପ୍ଲୋଇଟେଟିଭ ଫ୍ରେଣ୍ଡଶିପ୍ସ) ମଧ୍ୟକୁ ଠେଲି ଦେଇଛନ୍ତି, ସେତେବେଳେ କୌଣସି ଦେଶ ପାଇଁ ଶତ୍ରୁର କ’ଣ ଆବଶ୍ୟକତା ଅଛି?
