ନ୍ୟୁୟର୍କ, ୧୩।୯(ଏପି): ବର୍ଷର ଚତୁର୍ଥ ତଥା ଅନ୍ତିମ ଗ୍ରାଣ୍ଡସ୍ଲାମ ୟୁଏସ୍ ଓପନ୍ ଏବେ ଅନ୍ତିମ ପର୍ଯ୍ୟାୟରେ ପହଞ୍ଚିଛି। ମହିଳା ସିଙ୍ଗଲ୍ସ ପରେ ଏବେ ପୁରୁଷ ସିଙ୍ଗଲ୍ସ ଇଭେଣ୍ଟର ଫାଇନାଲ ମୁକାବିଲା ସ୍ପଷ୍ଟ ହୋଇଛି। ଟାଇଟଲ ପାଇଁ ରବିବାର ଫାଇନାଲ ମ୍ୟାଚ୍ରେ ଅଷ୍ଟ୍ରିଆର ଦ୍ୱିତୀୟ ସିଡ୍ ଖେଳାଳି ଡୋମିନିକ୍ ଥିମ୍ ଓ ପଞ୍ଚମ ସିଡ୍ ଜର୍ମାନୀ ତାରକା ଖେଳାଳି ଆଲେକ୍ଜାଣ୍ଡର ଜେଭେରେଭ ପରସ୍ପରକୁ ଭେଟିବେ। ଶୁକ୍ରବାର ଖେଳାଯାଇଥିବା ପ୍ରଥମ ସେମିଫାଇନାଲ ମ୍ୟାଚ୍ରେ ଜେଭରେଭ ୩-୬, ୨-୬, ୬-୩, ୬-୪, ୬-୩ ମାରାଥନ୍ ସେଟ୍ରେ ସ୍ପେନ୍ର ୨୦ତମ ସିଡ୍ ଖେଳାଳି ୨୯ ବର୍ଷୀୟ ପାବ୍ଲୋ କାରେନୋ ବୁଷ୍ଟାଙ୍କୁ ପରାସ୍ତ କରି ଫାଇନାଲରେ ପ୍ରବେଶ କରିଛନ୍ତି। ଏହି ମ୍ୟାଚ୍ ବେଶ୍ ରୋମାଞ୍ଚକ ହୋଇଥିଲା। ପ୍ରଥମ ଦୁଇଟି ସେଟ୍ରେ ଜେଭେରେଭ ପରାସ୍ତ ହୋଇ ପଛରେ ପଡିଥିଲେ। ତେବେ ଏହାପରେ ଦମ୍ଦାର ପ୍ରଦର୍ଶନ କରି ଜେଭରେଭ ପ୍ରତ୍ୟାବର୍ତ୍ତନ କରିଥିଲେ ଓ ବାକି ୩ଟି ସେଟ୍ ଜିତି ନେଇ ବାଜି ମାରିଥିଲେ। ବିଜୟୀ ହେବାକୁ ବେଶ୍ କଷ୍ଟ କରିବାକୁ ପଡିଥିଲା ବୋଲି ୨୩ ବର୍ଷୀୟ ଜେଭରେଭ ସ୍ବୀକାର କରିଛନ୍ତି। ବିଜୟୀ ହୋଇଥିବାରୁ ନିଜ ପ୍ରଦର୍ଶନରେ ସେ ଖୁସି ଜାହିର କରିଛନ୍ତି।
ସେହିପରି ଦ୍ୱିତୀୟ ସେମିଫାଇନାଲରେ ଥିମ୍ ୬-୨, ୭-୬, ୭-୬ ସେଟ୍ରେ ରୁଷିଆର ତୃତୀୟ ସିଡ୍ ମାନ୍ୟତାପ୍ରାପ୍ତ ଖେଳାଳି ଡାନିଲି ମେଡ୍ଭେଡେଭଙ୍କୁ ପରାସ୍ତ କରି ଫାଇନାଲରେ ପ୍ରବେଶ କରିଛନ୍ତି। ବିଜୟୀ ହେବା ପାଇଁ ୨୭ ବର୍ଷୀୟ ଥିମ୍ଙ୍କୁ ୨ ଘଣ୍ଟା ୫୬ ମିନିଟ୍ ସମୟ ଆବଶ୍ୟକ ହୋଇଥିଲା। ମ୍ୟାଚ୍ରେ ଜବରଦସ୍ତ ପ୍ରତିଯୋଗିତା ଦେଖିବାକୁ ମିଳିଥିଲା। ମେଡଭେଡେଭ ଗତବର୍ଷ ୟୁଏସ୍ ଓପନ୍ରେ ରନର୍ସଅପ୍ ହୋଇଥିଲେ। ସେ ମଧ୍ୟ ଗତ ଦୁଇବର୍ଷ ହେବ ଫ୍ରେଞ୍ଚ୍ ଓପନ୍ରେ ସ୍ପେନ୍ର ରାଫାଲ ନାଡାଲଙ୍କଠାରୁ ପରାସ୍ତ ହୋଇଥିଲେ। ସେହିପରି ଫେବୃୟାରୀରେ ଅଷ୍ଟ୍ରେଲିଆନ୍ ଓପନ୍ରେ ନୋଭାକ ଜୋକୋଭିକଙ୍କଠାରୁ ମଧ୍ୟ ପରାସ୍ତ ହୋଇଥିଲେ। ଥିମ୍ଙ୍କୁ ଭେଟିବା ପୂର୍ବରୁ ମେଡଭେଡେଭ୍ ସାରା ଟୁର୍ନାମେଣ୍ଟରେ ଗୋଟିଏ ହେଲେ ବି ସେଟ୍ ଡ୍ରପ୍ କରି ନ ଥିଲେ। ଜବରଦସ୍ତ ଫର୍ମରେ ଥିଲେ ମଧ୍ୟ ମେଡଭେଡେଭ୍ଙ୍କୁ ଥ୍ମ୍ କୌଣସି ସୁଯୋଗ ଦେଇ ନ ଥିଲେ।
ଦୀର୍ଘ ୧୬ ବର୍ଷ ପରେ କୌଣସି ଗ୍ରାଣ୍ଡସ୍ଲାମ ସେମିଫାଇନାଲରେ ୩ଜଣ ବଡ଼ ଖେଳାଳି ନୋଭାକ ଜୋକୋଭିଚ୍, ରୋଜର ଫେଡେରର କିମ୍ବା ରାଫାଲ ନାଡାଲଙ୍କୁ ଦେଖିବାକୁ ମିଳି ନ ଥିଲା। କୋଭିଡ୍-୧୯ ମହାମାରୀ ପାଇଁ ନାଡ଼ାଲ ଏଥର ୟୁଏସ୍ ଓପନ୍ରେ ଅଂଶଗ୍ରହଣ ନ କରିବାକୁ ନିଷ୍ପତ୍ତି ନେଇଥିଲେ। ସେହିପରି ଫେଡରର ଆଣ୍ଠୁରେ ଅସ୍ତ୍ରୋପଚାର କରାଇଥିବା କାରଣରୁ ଏହି ଟୁର୍ନାମେଣ୍ଟରେ ଅଂଶଗ୍ରହଣ କରିପାରି ନ ଥିଲେ। ସେହିପରି ଏକ ବିବାଦୀୟ ଢଙ୍ଗରେ ଜୋକୋଭିଚ୍ ବୁଷ୍ଟାଙ୍କ ବିପକ୍ଷ ଚତୁର୍ଥ ରାଉଣ୍ଡ ମ୍ୟାଚ୍ ଖେଳୁଥିବା ବେଳେ ଅଜାଣତରେ ବଲ୍ରେ ଲାଇନ୍ ଜଜ୍ଙ୍କୁ ଆଘାତ ଦେଇ ପ୍ରତିଯୋଗିତାରୁ ବାଦ୍ ପଡିଥିଲେ।
ଏହାପୂର୍ବରୁ ଜେଭରେଭ ଜାନୁୟାରୀରେ ଅଷ୍ଟ୍ରେଲିଆନ ଓପନ୍ ସେମିଫାଇନାଲରେ ପ୍ରବେଶ କରିଥିଲେ ଓ ଏହା ତାଙ୍କର ପ୍ରଥମ ମେଜର ସେମିଫାଇନାଲ ଥିଲା। ଅବଶ୍ୟ ସେ ଥିମ୍ଙ୍କଠାରୁ ପରାସ୍ତ ହୋଇଥିଲେ। ଶନିବାର ମହିଳା ସିଙ୍ଗଲ୍ସ ଫାଇନାଲରେ ନାଓମି ଓସାକା ଓ ଭିକ୍ଟୋରିଆ ଆଜାରେଙ୍କା ଟାଇଟଲ ପାଇଁ ପରସ୍ପରକୁ ଭେଟିବାର କାର୍ଯ୍ୟକ୍ରମ ରହିଛି।
