ନୂଆଦିଲ୍ଲୀ,୩୦।୧୧: ଦୁନିଆର ସବୁଠାରୁ ଧନୀ ବ୍ୟକ୍ତି ତଥା ଟେସଲା ଏବଂ ସ୍ପେସ୍ ଏକ୍ସ’ର ମୁଖ୍ୟ ଏଲନ୍ ମସ୍କ କହିଛନ୍ତି ଯେ ଦକ୍ଷ ଭାରତୀୟମାନଙ୍କୁ ନିଯୁକ୍ତି ଦେଇ ଆମେରିକା ବହୁତ ଲାଭବାନ ହୋଇଛି। ଜିରୋଧାର ସହ-ପ୍ରତିଷ୍ଠାତା ନିଖିଲ କାମଥଙ୍କ ‘People by WTF’ ପୋଡକାଷ୍ଟରେ ଯୋଗ ଦେଇ ସେ ଏଚ୍-୧ବି (H-1B) ଭିସା ଏବଂ ପ୍ରବାସନକୁ ନେଇ ଚାଲିଥିବା ବିବାଦ ଉପରେ ଏହି ମନ୍ତବ୍ୟ ଦେଇଛନ୍ତି।
ମସ୍କ ଦୃଢ଼ତାର ସହ କହିଛନ୍ତି, “ମୋ ମତରେ, ଆମେରିକା ଆସିଥିବା ଦକ୍ଷ ଭାରତୀୟମାନଙ୍କ ଦ୍ୱାରା ଆମେରିକା ବହୁତ ଲାଭବାନ ହୋଇଛି।” ସେ ମାଇକ୍ରୋସଫ୍ଟର ସିଇଓ ସତ୍ୟ ନାଡେଲା ଏବଂ ଗୁଗଲ୍ ମୁଖ୍ୟ ସୁନ୍ଦର ପିଚାଇଙ୍କ ଭଳି ଭାରତୀୟ ପ୍ରତିଭାମାନଙ୍କୁ ମନେ ପକାଇଥିଲେ, ଯେଉଁମାନେ ବର୍ଷ ବର୍ଷ ଧରି ଆମେରିକାର ଅର୍ଥନୈତିକ ପ୍ରଗତିରେ ଯୋଗଦାନ କରିଆସୁଛନ୍ତି।
ମସ୍କ ସ୍ୱୀକାର କରିଛନ୍ତି ଯେ ଦେଶରେ ଦେଖାଯାଉଥିବା କିଛି ପ୍ରବାସନ ବିରୋଧୀ ମନୋଭାବ ଏଚ୍-୧ବି ଭିସା କାର୍ଯ୍ୟକ୍ରମର ପୂର୍ବ ଅପବ୍ୟବହାର ଏବଂ ପୂର୍ବ ପ୍ରଶାସନ ସମୟରେ ଅତ୍ୟଧିକ ନମନୀୟତା କାରଣରୁ ସୃଷ୍ଟି ହୋଇଛି। ସେ କହିଛନ୍ତି, “H-1B କାର୍ଯ୍ୟକ୍ରମର କିଛି ଅପବ୍ୟବହାର ହୋଇଛି। ଆଉଟସୋର୍ସିଂ କମ୍ପାନୀଗୁଡ଼ିକ H-1B ବ୍ୟବସ୍ଥାରେ ଖେଳ ଖେଳିଛନ୍ତି, ଯାହାକୁ ବନ୍ଦ କରିବାକୁ ପଡ଼ିବ।”
ମସ୍କ H-1B କାର୍ଯ୍ୟକ୍ରମକୁ ବନ୍ଦ କରିବା ସପକ୍ଷରେ ନାହାନ୍ତି, ବରଂ ଏହାର ଅପବ୍ୟବହାରକୁ ରୋକିବା ପାଇଁ ସଂସ୍କାର କରିବାକୁ ଆହ୍ୱାନ ଦେଇଛନ୍ତି। ଆମେରିକାରେ କାମ କରିବାକୁ ଇଚ୍ଛୁକ ଭାରତୀୟମାନଙ୍କ ପାଇଁ ତାଙ୍କର ବାର୍ତ୍ତା ଥିଲା: “ଯିଏ ଅଧିକ ଯୋଗଦାନ କରେ ଏବଂ ସମାଜ ପାଇଁ ନେଉଥିବା ଜିନିଷଠାରୁ ଅଧିକ ମୂଲ୍ୟର ଆଉଟପୁଟ୍ ଦିଏ, ସେ ମୋର ସମ୍ମାନର ପାତ୍ର।”
ବିଶ୍ଳେଷକମାନେ କହୁଛନ୍ତି ଯେ, ଏଚ୍-୧ବି ଭିସା ଫି’ ବୃଦ୍ଧି ହେତୁ ହଜାର ହଜାର ଭାରତୀୟଙ୍କ ପାଇଁ ଆମେରିକାରେ ଚାକିରି କରିବାର ସ୍ୱପ୍ନ ଧୀରେ ଧୀରେ ମଉଳି ଯାଉଥିବା ସମୟରେ ମସ୍କଙ୍କ ଏହି ମନ୍ତବ୍ୟ ଗୁରୁତ୍ୱପୂର୍ଣ୍ଣ।
