ନୂଆଦିଲ୍ଲୀ,୮।୭: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ କ୍ୟାବିନେଟ୍ ସମ୍ପ୍ରସାରଣ ମାଧ୍ୟମରେ ଭାଜପା ଉତ୍ତରପ୍ରଦେଶ (ୟୁପି)ରେ ଏକ ଅଭେଦ୍ୟ ଚକ୍ରବ୍ୟୁହ ଗଠନ କରିଛି। ୨୦୨୨ରେ ରାଜ୍ୟରେ ବିଧାନସଭା ନିର୍ବାଚନ ଅନୁଷ୍ଠିତ ହେବ। ବିରୋଧୀ ଦଳଗୁଡ଼ିକୁ ପଛରେ ପକାଇ କିପରି ସମ୍ପୂର୍ଣ୍ଣ ରାଜ୍ୟ ବିଜୟ କରିହେବ ସେ ନେଇ ସୁଚିନ୍ତିତ ରଣନୀତି ପ୍ରସ୍ତୁତ କରାଯାଇଛି। କ୍ୟାବିନେଟ୍ ସାମ୍ପ୍ରସାରଣରେ ରାଜ୍ୟର ୩ ଏସ୍ସି/ଏସ୍ଟି, ୩ ଓବିସି ଏବଂ ଜଣେ ବ୍ରାହ୍ମଣଙ୍କୁ ସ୍ଥାନ ମିଳିଛି। ରାଜ୍ୟରୁ ୭ ଜଣଙ୍କୁ ମନ୍ତ୍ରିମଣ୍ଡଳ ସମ୍ପ୍ରସାରଣରେ ସ୍ଥାନ ମିଳିଛି। ଏହା ଦ୍ୱାରା ରାଜ୍ୟରେ ଜାତିଗତ ସମୀକରଣକୁ ଏକ ନୂଆ ରୂପ ଦେବାରେ ଭାଜପା ସକ୍ଷମ ହୋଇଛି ବୋଲି ରାଜନୈତିକ ସମୀକ୍ଷକ ମତପୋଷଣ କରିଛନ୍ତି। ମୋଦିଙ୍କ ମନ୍ତ୍ରିମଣ୍ଡଳରେ ନୂଆ ମନ୍ତ୍ରୀଙ୍କୁ ମିଶାଇ ରାଜ୍ୟର ମୋଟ ୧୬ ଜଣ ସ୍ଥାନ ପାଇଛନ୍ତି। ଏହା ମୁଖ୍ୟତଃ ରାଜ୍ୟର ବିଧାନସଭା ନିର୍ବାଚନକୁ ଦୃଷ୍ଟିରେ ରଖି କରାଯାଇଥିବା ରାଜନୈତିକ ମହଲରେ ଚର୍ଚ୍ଚା ହେଉଛି। ରାଜ୍ୟର ୮୦ ଟି ଲୋକ ସଭା ଆସନ ଏବଂ ୭୫ ଜିଲା ରହିଛି। ରାଜ୍ୟର ୧୬ ମନ୍ତ୍ରୀଙ୍କ ମଧ୍ୟରୁ ପ୍ରତ୍ୟକଙ୍କୁ ୫ଟି ଲୋକ ସଭା ଆସନର ଦାୟିତ୍ୱ ପ୍ରଦାନ କରାଯାଇଛି।
