କାନପୁର,୩୦।୧୨: ହିନ୍ଦୁ ଧର୍ମରେ ମୃତ ବ୍ୟକ୍ତିଙ୍କୁ ଶ୍ମଶାନ ଘାଟରେ ଅନ୍ତିମ ସଂସ୍କାର କରାଯାଇଥାଏ। ସେତେବେଳେ ଶ୍ମଶାନର ମାହୋଲ କିଛି ଏପରି ଥାଏ ଭୟ ଲାଗିଥାଏ। ଶ୍ମଶାନରେ ନୀରବତା ପାଟି ଚିରୁଥିବାବେଳେ ସେଥିରେ ତାଳ ଦେଇଥାନ୍ତି ମୃତ ବ୍ୟକ୍ତିଙ୍କ ପରିବାର। ତେବେ ଏଭଳି ସ୍ଥାନରେ କେବେ ଏକାକୀ ଯିବାକୁ କିମ୍ବା ମୃତ ବ୍ୟକ୍ତିଙ୍କ ଚିତା ପାଖକୁ ଯିବାକୁ ଚେଷ୍ଟା କରିବେ। ଶୁଣିଲେ ଡର ଲାଗୁଥିବ। କିନ୍ତୁ ସୋସିଆଲ ମିଡିଆରେ ଏପରି ଏକ ଭିଡିଓ ଭାଇରାଲ ହେଉଛି ଯାହାକୁ ଦେଖିଲେ ଆପଣ କୋହ ସମ୍ଭାଳି ପାରିବେ ନାହିଁ।
ମାମଲାଟି ଉତ୍ତରପ୍ରଦେଶ କାନପୁର କୋହନା ଥାନାକ୍ଷେତ୍ର ଭୈରବ ଘାଟର। ଦେଶର ସବୁ ଇଲାକା ପରି ଏଠାରେ ମଧ୍ୟ ଜାଡପରି ଥଣ୍ଡା ଅନୁଭୂତ ହେଉଛି। ଭିଡିଓରେ ଦେଖାଯାଇଛି କି, ଜଣେ ବୃଦ୍ଧ ଏହି ଶ୍ମଶାନ ଘାଟର ଜଳୁଥିବା ଚିତା ପାଖରେ ଶୋଇଛନ୍ତି। ମଧ୍ୟରାତ୍ରିରେ ଘାଟରେ କେହି ନ ଥିବାବେଳେ ଏପରି ଦୃଶ୍ୟ ଦେଖିବାକୁ ମିଳିଛି। ଯେତେବେଳେ କି ରାତିରେ ଲୋକଙ୍କୁ ଶ୍ମଶାନ ଯିବାକୁ ଡର ଲାଗେ ସେହି ସମୟରେ ବୃଦ୍ଧ ଜଣକ ହୁତୁହୁତୁ ହୋଇ ଜଳୁଥିବା ଚିତା ନିକଟରେ ଶୋଇଛନ୍ତି।
ସୂଚନା ଥାଉ କି, କାନପୁରରେ ହେଉଥିବା ପ୍ରବଳ ଶୀତ ବୃଦ୍ଧ ଜଣକ ସହ୍ୟ କରିପାରୁ ନ ଥିଲେ। ତାଙ୍କ ପାଖରେ ପତଳା କମ୍ବଳ ବ୍ୟତୀତ କିଛି ବି ନ ଥିଲା। ତେଣୁ ସେ ଅନ୍ୟ ଉପାୟ ନ ପାଇ ଶ୍ମଶାନରେ ଜଳୁଥିବା ଚିତାର ସାହାର୍ଯ୍ୟ ନେଇଥିଲେ। ଚିତା ପାଖରେ ଶୋଇ ସେ ଅସହ୍ୟ ଜାଡର ମୁକାବିଲା କରୁଥିଲେ। ଭିଡିଓ ଦେଖିଲେ ଆପଣ କୋହ ସମ୍ଭାଳି ପାରିବେ ନାହିଁ। ଏଠାରେ ପ୍ରଶାସନ ଗରିବଙ୍କୁ କମ୍ବଳ,ଚାଦର ବାଣ୍ଟୁଥିଲେ ମଧ୍ୟ ବୃଦ୍ଧଙ୍କ ପରି ଏପରି ହଜାର ହଜାର ଲୋକ ଏସବୁ ସୁବିଧାରୁ ବଞ୍ଚିତ ହେଉଛନ୍ତି ବୋଲି ଚର୍ଚ୍ଚା ହେଉଛି।
