ଗୋପାଳପୁର,୧୫।୨(ଡି.ଏନ.ଏ.):ରାଜ୍ୟ ସରକାର ବିଦ୍ୟାଳୟର ଭିତ୍ତିଭୂମି ବିକାଶ ପାଇଁ ବହୁ କୋଟି ଟଙ୍କା ବ୍ୟୟ କରୁଛନ୍ତି। ପ୍ରତି ବିଦ୍ୟାଳୟରେ ଶୌଚାଳୟ କରାଯିବାକୁ ଗୁରୁତ୍ୱ ଦିଆଯାଇଛି। ତେବେ ଶିକ୍ଷୟିତ୍ରୀ ଶିକ୍ଷକମାନଙ୍କର ବୈମାତୃକ ମନୋଭାବ ଓ ରକ୍ଷଣାବେକ୍ଷଣ ଅଭାବ ଯୋଗୁ ଶୌଚାଳୟଗୁଡ଼ିକ ଜରାଜୀର୍ଣ୍ଣ ଅବସ୍ଥାରେ ପଡ଼ିରହୁଛି। କନିଷି ହାଟସ୍ଥିତ ରଙ୍ଗେଇଲୁଣ୍ଡା ବ୍ଲକ କାର୍ଯ୍ୟାଳୟ ନିକଟସ୍ଥ ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟରେ ଏଭଳି ଦେଖିବାକୁ ମିଳିଛି। ଏହି ବିଦ୍ୟାଳୟରେ ପ୍ରଥମରୁ ଅଷ୍ଟମ ଶ୍ରେଣୀ ଛାତ୍ରୀଛାତ୍ର ଅଧ୍ୟୟନ କରୁଛନ୍ତି। ଛାତ୍ରୀଛାତ୍ରଙ୍କ ବ୍ୟବହାର ପାଇଁ ଶୌଚାଳୟ ମଧ୍ୟ ନିର୍ମିତ ହୋଇଛି। ବିଡ଼ମ୍ବନାର କଥା ଯେ, ଶିକ୍ଷୟିତ୍ରୀ ଶିକ୍ଷକଙ୍କ ଇଚ୍ଛାଶକ୍ତି ଅଭାବରୁ ଶୌଚାଳୟଗୁଡ଼ିକ ଠିକ୍ କାମରେ ଲାଗୁନାହିଁ। ଶୌଚାଳୟର କବାଟ ଭାଙ୍ଗିରୁଜି ଯାଇଥିବା ବେଳେ ବାକି ୩ଟି ଶୌଚାଳୟରେ ଚାବି ପଡ଼ିଛି। ଏଥିସହ ହାତ ଧୋଇବା ନିମନ୍ତେ ଥିବା ୱାଶ୍ ବେସିନରେ ପାଣି ଆସୁନାହିଁ । ସ୍ବଚ୍ଛତା, ପରିମଳ ଓ ଶୌଚାଳୟ ଉପରେ ସରକାର ଗୁରୁତ୍ୱ ଦେଉଥିବା ବେଳେ ଏଥିପ୍ରତି ପ୍ରଧାନ ଶିକ୍ଷକଙ୍କ ନଜର ନ ପଡ଼ିବା ଆଚମ୍ବିତ କରୁଛି। ଏହାଦ୍ୱାରା ଛାତ୍ରୀଛାତ୍ରମାନେ ଶୌଚାଳୟ ଯିବା ନିମନ୍ତେ ନାନାଦି ଅସୁବିଧାର ସମ୍ମୁଖୀନ ହେଉଛନ୍ତି। ତୁରନ୍ତ ଜିଲା ପ୍ରଶାସନ ଓ ଶିକ୍ଷା ବିଭାଗ ଏଥିପ୍ରତି ଦୃଷ୍ଟି ଦେବା ପାଇଁ ସାଧାରଣରେ ଦାବି ହେଉଛି।
