ଢେଙ୍କାନାଳ ଅଫିସ, ୫।୨ ଢେଙ୍କାନାଳ ଜିଲା ହିନ୍ଦୋଳ ବ୍ଲକ ନୂଆଗାଁ ପଞ୍ଚାୟତର ବିଜେଡି ସମର୍ଥତ୍ତ ସମିତିସଭ୍ୟ ପ୍ରାର୍ଥୀ ସୁବ୍ରତ ବେହେରା (୨୩) ଅପହରଣ ମାମଲା ଅଦ୍ୟାବଧି ରହସ୍ୟାବୃତ ହୋଇ ରହିଛି। ଉଦ୍ଧାର ହୋଇଥିବା ସୁବ୍ରତଙ୍କୁ ଅଜ୍ଞାତ ସ୍ଥାନରେ ରଖି ପଚରାଉଚୁରା କରାଯାଉଛି। ତେବେ ତାଙ୍କ ବୟାନରେ ତାଳମେଳ ରହୁ ନ ଥିବାରୁ ଅପହରଣ ରହସ୍ୟ ଉନ୍ମୋଚନ ହୋଇପାରୁ ନ ଥିବା ଏସ୍ପି ଏଲ୍. ଦିବ୍ୟା ଭି. କହିଛନ୍ତି। ସୁବ୍ରତ ଅତ୍ୟଧିକ ଭୟଭୀତ ହୋଇପଡ଼ିଥିବାରୁ ଠିକ୍ ଭାବେ ବୟାନ ଦେଇ ପାରୁ ନ ଥିବା ନିର୍ଭରଯୋଗ୍ୟ ସୂତ୍ରରୁ ଜଣାପଡ଼ିଛି। ଅନ୍ୟପଟେ ରାଜନୈତିକ ଶତ୍ରୁତାରୁ ଏହି ଅପହରଣ କରାଯାଇଥିବା ସନ୍ଦେହରେ ପୋଲିସ ଗୁରୁବାର ଅଟକ ରଖିଥିବା ୪ଜଣଙ୍କୁ ଜେରା କରି ଛାଡ଼ିଦେଇଛି। ଶୁକ୍ରବାର କଣ୍ଟାବଣିଆ ପୋଲିସ ନୂଆଗଁା ପଞ୍ଚାୟତର ଅନ୍ୟଜଣେ ବିଜେଡି ସମର୍ଥିତ ସମିତିସଭ୍ୟ ପ୍ରାର୍ଥୀ ରିଟୁ ସାହୁଙ୍କୁ ପଚରାଉଚରା କରୁଛି। ସେହିପରି ହିନ୍ଦୋଳ ବ୍ଲକ ଅଧ୍ୟକ୍ଷ ପ୍ରିୟରଞ୍ଜନ ମାହୁନ୍ତଙ୍କ ସମ୍ପର୍କୀୟ ଭାଇ ତଥା ବାଲିମୀ ଥାନା ଅଞ୍ଚଳର ନୀଳକଣ୍ଠ ଦାସଙ୍କୁ ମଧ୍ୟ ଅଟକ ରଖାଯାଇ ତନାଘନା କରାଯାଉଛି।
ସମିତିସଭ୍ୟ ପଦବୀରେ ଶାସକ ଦଳ ସମର୍ଥନରେ ଦୁଇଜଣ ପ୍ରାର୍ଥୀ ଛିଡ଼ାହେବା ଏବଂ ଏହାକୁ ନେଇ ସୃଷ୍ଟି ହୋଇଥିବା ରାଜନୈତିକ ଶତ୍ରୁତା କାରଣରୁ ଏହି ହାଇପ୍ରୋଫାଇଲ ଅପହରଣ କରାଯାଇଥିବା ଚର୍ଚ୍ଚା ଜୋର୍ ଧରିଛି। ପ୍ରବଳ ଚାପ ପଡୁଥିବାରୁ ପୋଲିସ ତଦନ୍ତ ଦିଗହରା ହେଉଥିବା ଆଲୋଚନା ମଧ୍ୟ ହେଉଛି। ଏହି ଘଟଣା ୩ଦିନ ହେଲା ଜିଲା ରାଜନୀତିକୁ ସରଗରମ କରିଛି। ଅନ୍ୟପଟେ ଅଟକ ସମ୍ପର୍କୀୟ ଭାଇଙ୍କୁ ଛଡ଼ା ନ ଗଲେ ଥାନା ଆଗରେ ଆମରଣ ଅନଶନରେ ବସିବେ ବୋଲି ବ୍ଲକ ଅଧ୍ୟକ୍ଷ ପ୍ରିୟରଞ୍ଜନ ମାହୁନ୍ତ ଚେତାବନୀ ଦେଇଛନ୍ତି। ସୂଚନାଯୋଗ୍ୟ, ବିଜେଡି ସମର୍ଥନରେ ହିନ୍ଦୋଳ ବ୍ଲକ ଅଧ୍ୟକ୍ଷ ହୋଇଥିବା ପ୍ରିୟରଞ୍ଜନ ଚଳିତ ନିର୍ବାଚନରେ କୁକୁଟା ପଞ୍ଚାୟତରୁ ସମିତିସଭ୍ୟ ପ୍ରାର୍ଥୀ ଭାବେ ନିର୍ବାଚନ ଲଢୁଛନ୍ତି।
ଏ ସଂକ୍ରାନ୍ତରେ ହିନ୍ଦୋଳ ବିଧାୟିକା ସୀମାରାଣୀ ନାୟକ କୁହନ୍ତି, ନିଖୋଜ ସମିତିସଭ୍ୟ ପ୍ରାର୍ଥୀ ଉଦ୍ଧାର ହେବାପରେ ଭୟ ଓ ଆଶଙ୍କା ଟଳିଛି। ଏହି ଘଟଣାର ବିଧିବଦ୍ଧ ତଦନ୍ତ କରି ଦୋଷୀ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସେ ଦାବି କରିଛନ୍ତି। ଏ ନେଇ ଏସ୍ପି କୁହନ୍ତି, ଉଦ୍ଧାର ସମିତିସଭ୍ୟ ପ୍ରାର୍ଥୀଙ୍କୁ ପଚରାଉଚରା ଚାଲିଛି। ତଦନ୍ତ ପରେ ସମ୍ପୂର୍ଣ୍ଣ ତଥ୍ୟ ଦିଆଯିବ।
