ଭୁବନେଶ୍ୱର,୪।୫(ବ୍ୟୁରୋ): ରାଜ୍ୟର ବିଶ୍ୱବିଦ୍ୟାଳୟଗୁଡ଼ିକରେ ବିଭିନ୍ନ ଅଣଶିକ୍ଷକ ପଦବୀ ଖାଲି ପଡ଼ିଥିବାବେଳେ ସେଥିମଧ୍ୟରୁ ଅନେକ ପଦବୀ ଅନାବଶ୍ୟକ ରହିଛି। ତେଣୁ ଉକ୍ତ ପଦବୀଗୁଡ଼ିକ ଉଚ୍ଛେଦ କରିବାକୁ ରାଜ୍ୟ ଉଚ୍ଚ ଶିକ୍ଷା ବିଭାଗ ପ୍ରକ୍ରିୟା ଆରମ୍ଭ କରିଛି। ଏନେଇ ବିଭାଗର ସ୍ବତନ୍ତ୍ର ସଚିବ ବୀରେନ୍ଦ୍ର କୋରକୋରା ରାଜ୍ୟର ସମସ୍ତ ବିଶ୍ୱବିଦ୍ୟାଳୟର ରେଜିଷ୍ଟ୍ରାରଙ୍କୁ ଚିଠି ଲେଖିଛନ୍ତି। ବିଶ୍ୱବିଦ୍ୟାଳୟଗୁଡ଼ିକରେ ଥିବା ଅନାବଶ୍ୟକ ପଦବୀଗୁଡ଼ିକ ସମ୍ପର୍କରେ ବିବରଣୀ ଦେବାକୁ ଚିଠିରେ ଉଲ୍ଲେଖ କରାଯାଇଛି। ପଦବୀର ନାମ, ପଦବୀରେ ନିଯୁକ୍ତ ମାନବ ସମ୍ବଳ, ବେତନରାଶି ଆଦି ସମ୍ପର୍କରେ ସୂଚନା ଦେବାକୁ କୁହାଯାଇଛି। ସେହିପରି ଉକ୍ତ ପଦବୀଗୁଡ଼ିକ ମଧ୍ୟରୁ କେଉଁଗୁଡ଼ିକ ଉଚ୍ଛେଦ କରାଯିବ ଓ କେଉଁଗୁଡ଼ିକ ଉଚ୍ଛେଦ କରାଯିବ ନାହିଁ, ପୂର୍ବରୁ କେତେକ ପଦବୀ ଉଚ୍ଛେଦ କରାଯାଇଛି, ଏ ସମସ୍ତ ସମ୍ପର୍କରେ ତଥ୍ୟ ଦେବାକୁ ବିଶ୍ୱବିଦ୍ୟାଳୟ କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦିଆଯାଇଛି।
ପଦବୀକୁ ନେଇ ରାଜ୍ୟର ସମସ୍ତ ବିଶ୍ୱବିଦ୍ୟାଳୟ କୁଳପତିଙ୍କ ଉଚ୍ଚଶିକ୍ଷା ବିଭାଗ ସହ ଆଲୋଚନା ପରେ ଅର୍ଥ ବିଭାଗ ଅଧୀନରେ ଏହାର ଅନୁଧ୍ୟାନ କରାଯାଇଥିଲା। ତେବେ ବିଶ୍ୱବିଦ୍ୟାଳୟଗୁଡ଼ିକରେ ଅନେକ ଅନାବଶ୍ୟକ ପଦବୀ ରହିଥିବା ବିଭାଗର ଦୃଷ୍ଟିଗୋଚର ହୋଇଥିଲା। ତେଣୁ ଉକ୍ତ ପଦବୀଗୁଡ଼ିକର ଉଚ୍ଛେଦ ପାଇଁ ନିଷ୍ପତ୍ତି ନିଆଯିବା ପରେ ଏହି ପ୍ରାରମ୍ଭିକ ପଦକ୍ଷେପ ଆରମ୍ଭ ହୋଇଥିବା ଚିଠିରେ ଦର୍ଶାଯାଇଛି।
