ମେଲବୋର୍ନ,୧୮।୧: ପ୍ରଥମ ଭାରତୀୟ ପୁରୁଷ ଖେଳାଳି ଭାବେ ଉନ୍ମୁକ୍ତ ଚାନ୍ଦ ଅଷ୍ଟ୍ରେଲିଆର ବିଗ୍ ବାଶ୍ ଲିଗ୍ (ବିବିଏଲ୍)ରେ ପଦାର୍ପଣ କରିଛନ୍ତି। କିନ୍ତୁ ଭାରତୀୟ କ୍ରିକେଟର ଭାବେ ଅବସର ନେଇ ସାରିଥିବା ଚାନ୍ଦ ପ୍ରଥମ ମ୍ୟାଚ୍ରେ ବିଫଳ ହୋଇଛନ୍ତି। ହୋବାର୍ଟ ହରିକେନ୍ସ ବିପକ୍ଷରେ ମଙ୍ଗଳବାର ଖେଳାଯାଇଥିବା ମ୍ୟାଚ୍ରେ ମେଲବୋର୍ନ ରେନେଗେଡେସ ପାଇଁ ୨୮ ବର୍ଷୀୟ ଚାନ୍ଦ ୮ ବଲରେ ୬ ରନ୍ କରିଥିଲେ। ଛୋଟିଆ ଇନିଂସରେ ସେ କୌଣସି ବାଉଣ୍ଡ୍ରି ଲଗାଇ ପାରି ନ ଥିଲେ।
ମ୍ୟାଚ୍ରେ ୧୮୩ ରନ୍ର ବିଜୟଲକ୍ଷ୍ୟ ପିଛା କରୁଥିବା ମେଲବୋର୍ନ ଅଧିନାୟକ ଆରୋନ ଫିଞ୍ଚ (୭୫) ଓ ଶନ ମାର୍ଶ (୫୧)ଙ୍କ ଅର୍ଦ୍ଧଶତକ ଯୋଗୁ ୧୫ ଓଭର ସୁଦ୍ଧା ୨ ଉଇକେଟ ହରାଇ ୧୩୮ ରନ୍ କରି ସାରିଥିଲା। ଦଳକୁ ଜିତିବା ପାଇଁ ୫ ଓଭରରେ ୪୫ ରନ୍ ଦରକାର ଥାଏ। କିନ୍ତୁ କ୍ରମାଗତ ଉଇକେଟ ପତନ କାରଣରୁ ଦଳ ବିଜୟ ଲକ୍ଷ୍ୟଠାରୁ ୫ ରନ୍ ଦୂରରେ ରହିଯାଇଥିଲା। ବିଜୟୀ ଦଳ ପାଇଁ ସନ୍ଦୀପ ଲାମିଚାନେ ୨ ଏବଂ ଥୋମାସ ରୋଜର୍ସ ୩ ଉଇକେଟ ନେଇଥିଲେ। ପୂର୍ବରୁ ଅଧିନାୟକ ମାଥ୍ୟୁ ଓ୍ବେଡ୍ ୪୮, ଟିମ୍ ଡେଭିଡ୍ ୪୬, ଡାର୍ସି ଶର୍ଟ (୩୭)ଙ୍କ ଯୋଗୁ ହୋବାର୍ଟ ୨୦ ଓଭରରେ ୫ ଉଇକେଟ ହରାଇ ୧୮୨ ରନ୍ କରିବାକୁ ସକ୍ଷମ ହୋଇଥିଲା।
