ଗାନ୍ଧୀନଗର,୧୬ା୧୦: ନବରାତ୍ରି ଗର୍ବା ବା ଦାଣ୍ଡିଆ ବିନା ଯେପରି ଅଧୁରା ରହିଥାଏ। ବିଶେଷକରି ଗୁଜରାଟରେ ନବରାତ୍ରି ୯ ଦିନ ପର୍ଯ୍ୟନ୍ତ ଗର୍ବା ଉତ୍ସବ ପାଳନ କରାଯାଇଥାଏ। ଚଳିତବର୍ଷ ୧୭ ଅକ୍ଟୋବରରୁ ଏହା ଆରମ୍ଭ ହେବାକୁ ଯାଉଛି। କରୋନା ମହାମାରୀ ଯୋଗୁ ଗୁଜରାଟରେ ସର୍ବସାଧାରଣ ସ୍ଥାନରେ ଦାଣ୍ଡିଆ ଖେଳିବା ଉପରେ ରୋକ ଲଗାଯାଇଛି। ମାତ୍ର ଏହା ପୂର୍ବରୁ ଦାଣ୍ଡିଆ ନୃତ୍ୟର ଭିନ୍ନ ଏକ ଝଲକ ଦେଖିବାକୁ ମିଳିଛି।
କରୋନା ସମୟରେ ଗର୍ବା ଉତ୍ସବ ଉପଭୋଗ କରିବା ପାଇଁ ସୁରତର ଫ୍ୟାଶନ ଡିଜାଇନିଂ ଛାତ୍ର ପିପିଇ କିଟ୍ସ(ପିପିଇ) ପ୍ରସ୍ତୁତ କରିଛନ୍ତି। ଯାହାକୁ ପିନ୍ଧି ଦାଣ୍ଡିଆ ଖେଳିହେବ। ଧଳା ରଙ୍ଗର ପିପିଇ କିଟ୍ସରେ ଏଥେନିକ୍ ଟଚ୍ ଦିଆଯିବା ପାଇଁ ମଲ୍ଟି କଲରର ଓଢ଼ଣୀ ଲଗାଯାଇଛି। କଷ୍ଟ୍ୟୁମ୍କୁ ଅଧିକ ଆକର୍ଷିତ କରିବା ପାଇଁ ଭିନ୍ନ ଭିନ୍ନ ରଙ୍ଗର ପେଣ୍ଟିଂ କରାଯାଇଛି। ଏଥିରେ କାଚର ବ୍ୟବହାର ମଧ୍ୟ ହୋଇଛି।
ସୂଚନାଯୋଗ୍ୟ, ନବରାତ୍ରି ଗୁଜରାଟର ସବୁଠାରୁ ଲୋକପ୍ରିୟ ଉତ୍ସବ। ଏହି କାର୍ଯ୍ୟକ୍ରମ ସମଗ୍ର ବିଶ୍ୱବାସୀଙ୍କୁ ଆକର୍ଷିତ କରିଥାଏ। ଏହି ପର୍ବ ନବରାତ୍ରି ଉପଲକ୍ଷେ ଖୁବ୍ ଧୁମ୍ଧାମରେ ପାଳନ କରାଯାଇଥାଏ। ପାରମ୍ପାରିକ ପୋଷାକ ପିନ୍ଧି ମହିଳାମାନେ ଦାଣ୍ଡିଆ ନୃତ୍ୟ କରିଥାନ୍ତି। ମାତ୍ର ଚଳିତବର୍ଷ କରୋନା ମହାମାରୀ ଯୋଗୁ ସରକାର ଏହା ଉପରେ ରୋକ ଲଗାଇଛନ୍ତି।
