ଜାଲୋର,୧୮।୫: ଆଜିକାଲି ଯୁବକ ଯୁବତୀମାନେ ନିଜ ବିବାହକୁ ମୁହୂର୍ତ୍ତକୁ ଭିନ୍ନ ଓ ସ୍ବତନ୍ତ୍ର କରିବା ପାଇଁ ନିଆରା ଢ଼ଙ୍ଗ ଆପଣାଉଛନ୍ତି। ବିବାହ ପାଇଁ କିଏ ହେଲିକପ୍ଟରରେ ତ ଆଉ କିଏ ବିଳାସପୂର୍ଣ୍ଣ ଗାଡ଼ିରେ ଆଉ କିଏ ଓଟରେ ବରଯାତ୍ରୀ ଯାଉଥିବା ଦେଖିବାକୁ ମଳୁଛି। ହେଲେ ରାଜସ୍ଥାନର ଜାଲୋରର ଜଣେ ଯବକ କିଛି ନିଆରା ପନ୍ଥା ଆପଣାଇଛନ୍ତି। ରାନୀଓ୍ବାଡା ବିଧାନସଭା ଆସନର କୁଡା ଗ୍ରାମରେ ଜଣେ ବର ବଳଦ ଗାଡ଼ିରେ ବରଯାତ୍ରୀ ଯାଇଥିବା ଦୃଶ୍ୟ ସାମ୍ନାକୁ ଆସିଛି। ଯାହାର ଏକ ଭିଡିଓ ଏବେ ସୋସିଆଲ ମିଡିଆରେ ଦେଖିବାକୁ ମିଳିଛି। ସୂଚନାଯୋଗ୍ୟ, କୁଡା ଗ୍ରାମର ଦଲପତ କୁମାର ଦେବାସୀଙ୍କ ସହ ସଓ୍ବୋଡା ଗ୍ରାମର ହୀନାଙ୍କ ସହ ବିବାହ ଅନୁଷ୍ଠିତ ହୋଇଥିଲା। ତେବେ ଦଲପତ ନିଜର ବିବାହକୁ ନିଆରା କରିବା ପାଇଁ ଭାବିଥିଲେ। ଏଥିପାଇଁ ସେ ବଳଦ ଗାଡ଼ିରେ ବରଯାତ୍ରୀ ଯିବାକୁ ନିଷ୍ପତ୍ତି ନେଇଥିଲେ। ଏହି ବଳଦ ଗାଡ଼ିକୁ ମଧ୍ୟ ବହୁ ସୁନ୍ଦର ସଜାଯାଇଥିଲା। ଏଥିରେ ଦଲପତ ଦୀର୍ଘ ୪କିଲୋମିଟର ଯାତ୍ରା କରି କନ୍ୟାଙ୍କ ଘର ସଓ୍ବୋଡା ଗ୍ରାମରେ ପହଞ୍ଚିଥିଲେ। ଗୋଟିଏ ବଳଦ ଗାଡ଼ିରେ ବର ଓ ବାକି ଲୋକ ଅନ୍ୟ ବଳଦ ଗାଡ଼ିରେ ବସି ବରଯାତ୍ରୀ ଯାଇଥିଲେ। ଏଭଳି ନିଆରା ବରଯାତ୍ରୀକୁ ଦେଖିବା ପାଇଁ ସେଠାରେ ଲୋକଙ୍କ ଭିଡ଼ ଜମିଥିଲା। କନ୍ୟାଙ୍କ ପିତା ବାଲକା ରାମ ମଧ୍ୟ ବହୁ ଉତ୍ସାହର ସହ ସେମାନଙ୍କୁ ସ୍ବାଗତ କରିଥିଲେ। ଏହାପରେ ରୀତିନୀତି ଅନୁଯାୟୀ ଦଳପତ ଓ ହୀନାଙ୍କ ବିବାହ ସମ୍ପନ୍ନ ହୋଇଥିଲା। ଅନ୍ୟପଟେ ବର ଦଲପତ ଏନେଇ ପ୍ରତିକ୍ରିୟା ରଖିଛନ୍ତି। ସେ କହିଛନ୍ତି, ନିଜର ପୁରୁଣା ପରମ୍ପରାକୁ ପୁନର୍ଜୀବିତ କରିବା ପାଇଁ ବଳଦ ଗାଡ଼ିରେ ବରଯାତ୍ରୀ ଯିବାକୁ ନିଷ୍ପତ୍ତି ନେଇଥିଲେ। ଆମର ପୂର୍ବପୁରୁଷମାନେ ମଧ୍ୟ ବଳଦ ଗାଡ଼ିରେ ବସି ବରଯାତ୍ରୀ ଯାଉଥିଲେ। ତେଣୁ ଏହି ପରମ୍ପରାକୁ ଆଗକୁ ବଢ଼ାଇବା ପାଇଁ ଏଭଳି ନିଷ୍ପତ୍ତି ନେଇଥିଲୁ ବୋଲି ଦଲପତ କହିଛନ୍ତି।
