ପାରାଦୀପ, ୨୨।୮(ଶରତ ରାଉତ):କେନ୍ଦ୍ର ସରକାରଙ୍କ ବନ୍ଦର, ଜାହାଜ ଚଳାଚଳ ଓ ଜଳପଥ ମନ୍ତ୍ରଣାଳୟ ବିଭାଗ ମନ୍ତ୍ରୀ ସର୍ବାନନ୍ଦ ସୋନୱାଲ ଶୁକ୍ରବାର ପାରାଦୀପ ଗସ୍ତ କରିଥିଲେ। ଏହି ଅବସରରେ ୪୨୭.୮୦ କୋଟି ଟଙ୍କା ଖର୍ଚ୍ଚରେ ହୋଇଥିବା ୭ଟି ନୂତନ ପ୍ରକଳ୍ପ ବିଭିନ୍ନ ସ୍ଥାନରେ ଲୋକାର୍ପଣ କରିଥିଲେ। ଆଗାମୀ ଦିନରେ ଘରୋଇ ସଂସ୍ଥା ଜରିଆରେ ହେବାକୁ ଥିବା ୧୫୮୦.୩୬ କୋଟି ଟଙ୍କାର ପ୍ରକଳ୍ପ ନିମନ୍ତେ ଚୁକ୍ତିନାମା ସ୍ବାକ୍ଷର କରାଯାଇଥିଲା। ଅପରାହ୍ନରେ ଆୟୋଜିତ ସଭାରେ ମନ୍ତ୍ରୀ ସୋନଓ୍ବାଲ ଯୋଗଦେଇ ପାରାଦୀପ ବନ୍ଦର ଏବଂ ଓଡ଼ିଶାର ବିକାଶ ସମ୍ପର୍କରେ ସୂଚନା ଦେଇଥିଲେ। ପାରାଦୀପ ବନ୍ଦର ଏବେ ସବୁକ୍ଷେତ୍ରରେ ଉଲ୍ଲେଖନୀୟ ସଫଳତା ହାସଲ କରିବା ସହ ଦେଶରେ ପ୍ରଥମ ସ୍ଥାନ ଅଧିକାର କରିଛି। ବର୍ତ୍ତମାନ ଭିତ୍ତିଭୂମି ଯେଉଁଭଳି ହୋଇଛି ଆଗାମୀ ଦିନରେ ଏହା ମେଗା ପୋର୍ଟ ହେବାକୁ ଯାଉଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପୂର୍ବ ଭାରତର ବିକାଶର ଚିତ୍ର ଏବେ ସାକାର ହେବାକୁ ଯାଉଛି ବୋଲି ମନ୍ତ୍ରୀ ସୋନୱାଲ କହିଥିଲେ। ଜାତୀୟ ଜଳପଥ ପ୍ରାଧିକରଣ ଯୋଜନା ଅନୁଯାୟୀ ଓଡ଼ିଶାର ନଦୀ ବିକାଶ ପାଇଁ ଖସଡ଼ା କରାଯାଉଛି। ତାଳଚେର, ଅନୁଗୋଳ, କଳିଙ୍ଗ ନଗର, ଧାମରା ଦେଇ ପାରାଦୀପ ପର୍ଯ୍ୟନ୍ତ ନଦୀ ଖନନ ଓ ପ୍ରଶସ୍ତ କରାଯିବ। ଏଥିପାଇଁ ସରକାର ୩୦ ହଜାର ୯୬ କୋଟି ଟଙ୍କା ବିନିଯୋଗ କରିବାକୁ ଲକ୍ଷ୍ୟ ରଖିଛନ୍ତି ବୋଲି ମନ୍ତ୍ରୀ ସୋନଓ୍ବାଲ କହିଥିଲେ। ଏହି ଅବସରରେ ମନ୍ତ୍ରୀ ସମ୍ପଦ ସ୍ବାଇଁ, ଏମ୍ପି ବିଭୁପ୍ରସାଦ ତରାଇ, ବନ୍ଦର ଅଧ୍ୟକ୍ଷ ପି.ଏଲ୍. ହାରାନ୍ଧ ଓ ଉପାଧ୍ୟକ୍ଷ ଟି. ଭେନୁଗୋପାଳ ପ୍ରମୁଖ ଉପସ୍ଥିତ ଥିଲେ।