ନୂଆଦିଲ୍ଲୀ, ୨୫।୮ : ବହୁ ଚର୍ଚ୍ଚିତ ପେଗାସସ ଗୁପ୍ତଚରୀ ମାମଲାରେ ସୁପ୍ରିମକୋର୍ଟଙ୍କ ଦ୍ୱାରା ଗଠିତ ତଦନ୍ତ କମିଟି ଗୁରୁବାର ସର୍ବୋଚ୍ଚ ନ୍ୟାୟାଳୟରେ ଏହାର ରିପୋର୍ଟ ଉପସ୍ଥାପନ କରିଛନ୍ତି। କମିଟି ୨୯ ଟି ମୋବାଇଲ ଫୋନ ଯାଞ୍ଚ କରିଥିଲେ। ଏଥିମଧ୍ୟରୁ ପାଞ୍ଚଟିରେ ମାଲୱେର ସଫ୍ଟୱେର୍ ମିଳିଥିଲା। ତଥାପି, ଏହା ପେଗାସସ କି ନାହିଁ ବୋଲି ସ୍ଥିର ହୋଇପାରିି ନାହିଁ।
କମିଟି ଏହାର ରିପୋର୍ଟକୁ ତିନି ଭାଗରେ ସୁପ୍ରିମକୋର୍ଟରେ ଉପସ୍ଥାପନ କରିଛି। ଏହାର ଏକ ଅଂଶରେ ଦର୍ଶାଯାଇଛି ଯେ ନାଗରିକଙ୍କ ଗୋପନୀୟତା ଅଧିକାରର ସୁରକ୍ଷା ପାଇଁ ଏକ ଆଇନ ପ୍ରସ୍ତୁତ କରାଯିବା ଉଚିତ।
ଅବସରପ୍ରାପ୍ତ ଜଷ୍ଟିସ ରବୀନ୍ଦ୍ରନଙ୍କ ନେତୃତ୍ୱରେ ଗଠିତ ହୋଇଥିବା କମିଟିର ରିପୋର୍ଟ ସୁପ୍ରିମକୋର୍ଟଙ୍କ ୱେବସାଇଟରେ ଅପଲୋଡ କରାହେବ। ଅନ୍ୟାନ୍ୟ ରିପୋର୍ଟର ସଂଶୋଧିତ ଅଂଶକୁ ସମ୍ପୃକ୍ତ ପକ୍ଷଙ୍କୁ ପ୍ରଦାନ ପାଇଁ ଆବେଦନ ଉପରେ ବିଚାର କରାଯିବ।
ପେଗାସସ ଗୁପ୍ତଚରୀ ଯାଞ୍ଚ ପାଇଁ ସୁପ୍ରିମକୋର୍ଟଙ୍କ ଦ୍ୱାରା ଗଠିତ ବୈଷୟିକ ଏବଂ ତଦାରଖ କମିଟି ସେମାନଙ୍କ ରିପୋର୍ଟରେ କହିଛନ୍ତି ଯେ କେନ୍ଦ୍ର ସରକାର ଏହି ଘଟଣାରେ ସହଯୋଗ କରିନାହାଁନ୍ତି। ଚାରି ସପ୍ତାହ ପରେ ଶୀର୍ଷ କୋର୍ଟ ବର୍ତ୍ତମାନ ଏହି ମାମଲାର ଶୁଣାଣି କରିବେ।
ଆସନ୍ତା କାଲି ଶୁକ୍ରବାର ଅବସର ନେଉଥିବା ଅବସର ନେଉଥିବା ପ୍ରଧାନ ବିଚାରପତି ଏନଭି ରମନାଙ୍କ ବ୍ୟତୀତ ଜଷ୍ଟିସ ସୂର୍ଯ୍ୟ କାନ୍ତ ଏବଂ ଜଷ୍ଟିସ ହିମା କୋହଲି ମଧ୍ୟ ଶୁଣାଣି ପାଇଁ ବେଞ୍ଚରେ ଉପସ୍ଥିତ ଥିଲେ। ତିନି ଭାଗର ଅନୁସନ୍ଧାନ ରିପୋର୍ଟର ଗୋଟିଏ ଅଂଶ ଗୋପନୀୟତା ରକ୍ଷା କରିବା ତଥା ଦେଶର ସାଇବର ସୁରକ୍ଷା ସୁନିଶ୍ଚିତ କରିବା ପାଇଁ ଆଇନ ପ୍ରଣୟନ କରିବାକୁ ପରାମର୍ଶ ଦେଇଛି।
