ଖଇରା,୮।୫(ଡି.ଏନ୍.ଏ.): ବାଲେଶ୍ୱରରୁ ଭଦ୍ରକ ଜିଲାକୁ ସଂଯୋଗ କରୁଥିବା ମହତିପୁର-ଚରମ୍ପା ଭାୟା ବାରାପୁର ରାସ୍ତା ନିର୍ମାଣ ୬ମାସ ଧରି ଦ୍ରୁତଗତିରେ ଚାଲିବା ପରେ ଏବେ ଏହାର ଗତି ମନ୍ଥର ହୋଇଯାଇଛି। ବିଦ୍ୟୁତ୍ ଓ ଗ୍ରାମ୍ୟ ଉନ୍ନୟନ ବିଭାଗ ମଧ୍ୟରେ ସମନ୍ବୟ ଅଭାବରୁ ରାସ୍ତାରେ ଥିବା ବିଦ୍ୟୁତ୍ ଖୁଣ୍ଟ ଓ ଟ୍ରାନ୍ସଫର୍ମର ଅପସାରଣରେ ବିଳମ୍ବ ମନ୍ଥରତାର ମୁଖ୍ୟକାରଣ ବୋଲି କୁହାଯାଉଛି। ବିଭାଗୀୟ ଉଦାସୀନତାର ଫଳ ଉଭୟ ଗ୍ରାମବାସୀ ଓ ଠିକାଦାରଙ୍କୁ ଭୋଗିବାକୁ ପଡୁଛି। ବହୁ ସ୍ଥାନରେ ଗ୍ରାମବାସୀ ବିଦ୍ୟୁତ୍ ଖୁଣ୍ଟ ଅପସାରଣ ନ ହେବା ପର୍ଯ୍ୟନ୍ତ ରାସ୍ତା ନିର୍ମାଣ କରିବାକୁ ଦେବେ ନାହିଁ ବୋଲି ଅଡି ବସିଥିବା ବେଳେ ଠିକାଦାରଙ୍କ ନିର୍ମାଣ ଅବଧି ସରିସରି ଆସୁଥିବାରୁ ରାସ୍ତାନିର୍ମାଣ ଶେଷ କରିବା ପାଇଁ ଚାପ ପଡୁଛି। ଏଥିଯୋଗୁ ନିର୍ଦ୍ଧାରିତ ସମୟରେ ରାସ୍ତା ନିର୍ମାଣ ସମ୍ପୂର୍ଣ୍ଣ ହେବାରେ ଅନିଶ୍ଚିତତା ଦେଖାଦେଇଛି। ତୁରନ୍ତ ବର୍ଷାଋତୁ ପୂର୍ବରୁ ଖୁଣ୍ଟ ଅପସାରଣ କାର୍ଯ୍ୟ ଶେଷ କରିବାକୁ ଅଲିପୁର, ମୁସ୍ତଫାବାଦ, ସିଙ୍ଗିପୁର,ଅରଖପୁର,ଗଗନଧୁଳି, ପତିରାଜପୁର, ବାରାପୁର ଆଦିି ଗ୍ରାମର ଲୋକେ ମୁଖ୍ୟମନ୍ତ୍ରୀ, ଗ୍ରାମ୍ୟ ଉନ୍ନୟନ ବିଭାଗ ମୁଖ୍ୟଯନ୍ତ୍ରୀ ଓ ସଚିବଙ୍କ ନିକଟରେ ଦାବି କରିଛନ୍ତି।
ରାସ୍ତା ନିର୍ମାଣ ପାଇଁ ପ୍ରାୟ୧୧କୋଟି ଟଙ୍କା ପ୍ରଦାନ କରାଯାଇଥିବା ବେଳେ ସେପ୍ଟେମ୍ବର ମାସରେ ଶିଳାନ୍ୟାସ କରାଯାଇଥିଲା। ରାସ୍ତା ନିର୍ମାଣ କାର୍ଯ୍ୟକୁ ସହଜ ଓ ସୁଗମ କରିବାକୁ ଏହି ରାସ୍ତାରେ ଥିବା ୨୫ଟି ବିଦ୍ୟୁତ୍ ଖୁଣ୍ଟ ଅପସାରଣ କରିବା ପାଇଁ ଆନୁସଙ୍ଗିକ ଖର୍ଚ୍ଚର ଏଷ୍ଟିମେଟ ପ୍ରଦାନ କରିବାକୁ ଟାଟା ପାୱାରକୁ ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ଅବଗତ କରାଯାଇଥିଲା।
ଏଥିପାଇଁ ଟାଟା ପାୱାରକୁ ୪ମାସରୁ ଊର୍ଦ୍ଧ୍ୱ ସମୟ ଲାଗିଯାଇଥିଲା। ପାଖାପାଖି ୩୪ଲକ୍ଷ ଟଙ୍କା ପ୍ରଦାନ କରିବାକୁ ଟାଟା ପାୱାର ପକ୍ଷରୁ ଗ୍ରାମ୍ୟ ଉନ୍ନୟନ ବିଭାଗକୁ ଚିଠି କରାଯାଇଥିଲା। ଏହି ଫାଇଲ୍ ଏବେ ମୁଖ୍ୟଯନ୍ତ୍ରୀଙ୍କ ଅନୁମୋଦନ ଅପେକ୍ଷାରେ ଥିବା ବେଳେ ଏହାମଧ୍ୟରେ ୨ମାସ ଅତିବାହିତ ହୋଇ ସାରିଲାଣି। ବିଭାଗୀୟ ଅବହେଳା ପାଇଁ ଏଥର ବର୍ଷାଋତୁରେ ଗ୍ରାମବାସୀମାନଙ୍କୁ ଶୋଚନୀୟ ରାସ୍ତା ବ୍ୟବହାର କରି ଯିବାକୁ ପଡ଼ିବ ବୋଲି ଏବେଠାରୁ ଚିନ୍ତା ଘାରିଲାଣି। ଏ ସଂକ୍ରାନ୍ତରେ ଗ୍ରାମ୍ୟ ଉନ୍ନୟନ ବିଭାଗ ନିର୍ବାହୀ ଯନ୍ତ୍ରୀ ପ୍ରୀତିରଞ୍ଜନ ସାମଲଙ୍କୁ ପଚାରିବାରୁ ମୁଖ୍ୟଯନ୍ତ୍ରୀଙ୍କ ଅନୁମୋଦନ ସହ ଫଣ୍ଡ୍ ଆସିବା ପରେ ବିଦ୍ୟୁତ୍ ଖୁଣ୍ଟ ଉଠାଯିବା କାର୍ଯ୍ୟ ଆଗେଇ ପାରିବ ବୋଲି କହିଛନ୍ତି।
