କେନ୍ଦ୍ରାପଡ଼ା, ୨୦।୩(ଜଗନ୍ନାଥ ଧଳ): ବିଶ୍ୱପ୍ରସିଦ୍ଧ ଗହୀରମଥା ଅନ୍ତୁଡ଼ିଶାଳରେ ସାମୁଦ୍ରିକ କଇଁଛ ଅଲିଭ ରିଡ୍ଲେ ସୁରକ୍ଷିତ ନାହାନ୍ତି। ସୁରକ୍ଷା ପାଇଁ ନିକଟରେ ଗହୀରମଥା ସାମୁଦ୍ରିକ ଅଞ୍ଚଳରେ ପର୍ଯ୍ୟଟକଙ୍କ ଅନୁମତିକୁ ବାରଣ ହୋଇଛି। ୨୦୨୩ ନଭେମ୍ବର ପହିଲାରୁ ସାମୁଦ୍ରିକ ଅଞ୍ଚଳକୁ ମତ୍ସ୍ୟଜୀବୀଙ୍କୁ ନିଷିଦ୍ଧ କରାଯାଇଛି। ଏହାସତ୍ତ୍ୱେ ନିଷିଦ୍ଧାଞ୍ଚଳକୁ ବୋଟ୍, ଟ୍ରଲର ଅବାଧରେ ପଶି ଆସୁଛନ୍ତି। ବନ ବିଭାଗ ପକ୍ଷରୁ କାର୍ଯ୍ୟାନୁଷ୍ଠାନ ହେଲେ ବେଆଇନ ଭାବେ ମତ୍ସ୍ୟଜୀବୀମାନେ ପାଟ୍ରୋଲିଂ ଟିମ୍କୁ ସମୁଦ୍ର ମଧ୍ୟରେ ଘେରିଯାଉଛନ୍ତି। ସୋମବାର ଏପରି ଘଟଣା ୨ଟି ସ୍ଥାନରେ ଦେଖିବାକୁ ମିଳିଛି। ମାଦଳି ଅଞ୍ଚଳରେ ଗୋଟିଏ ପାଟ୍ରୋଲିଂ ଟିମ୍କୁ ମତ୍ସ୍ୟଜୀବୀ ବୋଟ୍, ଟ୍ରଲର ମାଧ୍ୟମରେ ଘେରିଯାଇଥିବା ବେଳେ ବାବୁବାଲି ଅଞ୍ଚଳରେ ପାଟ୍ରୋଲିଂ କରୁଥିବା କନିକା-୩ ବୋଟ୍କୁ ମତ୍ସ୍ୟଜୀବୀ ଘେରିଥିଲେ। ତେବେ କନିକା-୩ର ଟିମ୍ ୨ ରାଉଣ୍ଡ ବ୍ଲାଙ୍କ ଫାୟାରିଂ କରିବାରୁ ଅବାଧ ପ୍ରବେଶ ହୋଇପାରିନାହିଁ। ଏ ସମ୍ପର୍କରେ ଧାମରା ଥାନାରେ ଏକ ଅଭିଯୋଗ ବନ ବିଭାଗ ପକ୍ଷରୁ ହୋଇଛି। ଅପରପକ୍ଷରେ ନିଷିଦ୍ଧ କଟକଣାର ସାଢ଼େ ୪ ମାସରେ ମୋଟ୍ ୩୬ ବୋଟ୍, ଟ୍ରଲର ଜବତ ହୋଇଛି। ୩୫୯ ମତ୍ସ୍ୟଜୀବୀ ଗିରଫ ହୋଇଛନ୍ତି। ଗିରଫ ମତ୍ସ୍ୟଜୀବୀଙ୍କୁ ତୁରନ୍ତ ଜାମିନ ମିଳିଯାଉଥିବାରୁ କଟକଣାର ସୁଫଳ ମିଳୁନାହିଁ। ଗହୀରମଥା ସାମୁଦ୍ରିକ ଅଞ୍ଚଳ ଏକପ୍ରକାର ଅସୁରକ୍ଷିତ ହୋଇପଡ଼ିଛି ବୋଲି ସ୍ଥାନୀୟ ପରିବେଶବିତ୍ମାନେ ମତ ଦେଇଛନ୍ତି।
ଏ ସମ୍ପର୍କରେ ପ୍ରକୃତିପ୍ରେମୀ ଲକ୍ଷ୍ମୀଧର ସ୍ବାଇଁ କହିଛନ୍ତି, ୨୦୨୩ ନଭେମ୍ବରରୁ ୨୦୨୪ ମେ’ ପର୍ଯ୍ୟନ୍ତ ଗହୀରମଥାର ସାମୁଦ୍ରିକ ଅଞ୍ଚଳରେ ବିରଳ ଅଲିଭ ରିଡ୍ଲେଙ୍କ ଅଣ୍ଡାଦାନ ପାଇଁ କଟକଣା ହୋଇଛି। ଏହି ସମୟରେ ବନ ବିଭାଗ, ସାମୁଦ୍ରିକ ଥାନା ଓ ତଟରକ୍ଷା ବାହିନୀ ପକ୍ଷରୁ ସମୁଦ୍ର ମଧ୍ୟରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରିବା କଥା। ତେବେ ଏହି ୩ ସୁରକ୍ଷା ବାହିନୀଙ୍କ ମଧ୍ୟରେ ସମନ୍ବୟ ଆଦୌ ନାହିଁ। ଅବାଧ ଭାବେ ବୋଟ୍, ଟ୍ରଲର ଚଳାଚଳ ଫଳରେ ଜାଲରେ ପଡ଼ି କଇଁଛଙ୍କ ମୃତ୍ୟୁ ହେଉଛି। ହାଇକୋର୍ଟଙ୍କ ନିର୍ଦ୍ଦେଶ ସତ୍ତ୍ୱେ ବୋଟ୍, ଟ୍ରଲରରେ ଟିଇଡି (ଟର୍ଟଲ ଏକ୍ସକ୍ଲୁଡର ଡିଭାଇସ) ବ୍ୟବହାର ହେଉନାହିଁ ବୋଲି ସେ କ୍ଷୋଭ ପ୍ରକାଶ କରିଛନ୍ତି। ସାମୁଦ୍ରିକ ଜୀବ ସୁରକ୍ଷା ସମିତିର ସଭାପତି ପ୍ରକାଶ ଚନ୍ଦ୍ର ଦାସ କହିଛନ୍ତି, କଇଁଛଙ୍କ ଅଣ୍ଡାଦେବା ସ୍ଥାନ ଏବେ ସଙ୍କଟରେ। ବାବୁବାଲି, ମାଦଳି, ଏକକୁଳା ଆଦିରେ ତଟକ୍ଷୟ ଜାରି ରହିଛି। ସମ୍ପ୍ରତି କଇଁଛଗୁଡ଼ିକ ଅଣ୍ଡାଦେବା ପାଇଁ ତଟାଞ୍ଚଳରେ ଠୁଳ ହେଲେଣି। ଆସନ୍ତା ସପ୍ତାହ ମଧ୍ୟରେ ସାମୂହିକ ଅଣ୍ଡାଦେବା ସମ୍ଭାବନା ରହିଛି। ଏହି ସମୟରେ ମତ୍ସ୍ୟଜୀବୀ ନିଷିଦ୍ଧାଞ୍ଚଳରେ ପ୍ରବେଶ କରିବା ଏହି ବିରଳ ଜୀବ ପ୍ରତି ବିପଦ ହୋଇଛି। ଏ ସମ୍ପର୍କରେ ଗହୀରମଥା ରେଞ୍ଜ୍ ଅଫିସର ପ୍ରଦୋଷ ମହାରଣାଙ୍କୁ ପଚାରିବାରେ କଇଁଛଙ୍କ ସୁରକ୍ଷା ପାଇଁ ସମୁଦ୍ର ମଧ୍ୟରେ ୩ଟି ପାଟ୍ରୋଲିଂ ବୋଟ୍ ନିୟୋଜିତ ହୋଇଛି। ୧୪୩୫ ବର୍ଗ କିଲୋମିଟର ମଧ୍ୟରେ ଏହି ବୋଟ୍ ଘୂରୁଥିବା ବେଳେ କେତେକ ସ୍ଥାନରେ ମତ୍ସ୍ୟଜୀବୀ ପଶି ଆସୁଛନ୍ତି। ପାଟ୍ରୋଲିଂ ଟିମ୍ ନଜରକୁ ଆସିଲେ ସେହି ମତ୍ସ୍ୟଜୀବୀ ନିଷିଦ୍ଧାଞ୍ଚଳର ବାହାରକୁ ଯାଇ ଭିଏଚ୍ଏଫ୍ ମାଧ୍ୟମରେ ଅନ୍ୟ ସାଥୀ ମତ୍ସ୍ୟଜୀବୀଙ୍କୁ ଏକାଠି କରୁଛନ୍ତି। ପାଟ୍ରୋଲିଂ ଟିମ୍ ଓ ଅବାଧ ପ୍ରବେଶକାରୀଙ୍କ ମଧ୍ୟରେ ପ୍ରତ୍ୟହ ଏପରି ଘଟଣା ଦେଖିବାକୁ ମିଳୁଛି। ତଟରକ୍ଷୀ ବାହିନୀ ଓ ସାମୁଦ୍ରିକ ଥାନାରୁ ସହଯୋଗ ମିଳୁନାହିଁ ବୋଲି ସେ କହିଛନ୍ତି। ଏ ସମ୍ପର୍କରେ ତାଳଚୁଆ ସାମୁଦ୍ରିକ ଥାନା ଅଧିକାରିଣୀ ସସ୍ମିତା ସାହୁଙ୍କୁ ପଚାରିବାରେ ସାମୁଦ୍ରିକ ଅଞ୍ଚଳରେ ଅବାଧ ପ୍ରବେଶ ରୋକିବା ପାଇଁ ବୋଟ୍, ଡ୍ରାଇଭର ଅଛନ୍ତି। ତେବେ ବୋଟ୍ ଚଳାଇବା ପାଇଁ ଆବଶ୍ୟକ ଇନ୍ଧନ ମିଳୁନାହିଁ ବୋଲି ସେ କହିଛନ୍ତି।
