କରାଚି, ୧୭।୧୦: ପାକିସ୍ତାନର ଜଣାଶୁଣା ଦ୍ରୁତ ବୋଲର ଉମର ଗୁଲ୍ କ୍ରିକେଟ୍ର ସମସ୍ତ ପ୍ରକାର ଫର୍ମାଟ୍ରୁ ଅବସର ନେଇଛନ୍ତି। ଘରୋଇ ଟି୨୦ କ୍ରିକେଟ୍ ଟୁର୍ନାମେଣ୍ଟ ‘ନ୍ୟାଶନାଲ ଟି୨୦ କପ୍’ରେ ଗୁଲ୍ଙ୍କ ଦଳ ବାଲୋଚିସ୍ତାନ ସେମିଫାଇନାଲରେ ପ୍ରବେଶ କରିବାରେ ବିଫଳ ହୋଇଥିଲା। ଏହାପରେ ସେ ଅବସର ଘୋଷଣା କରିଥିଲେ। ୩୬ ବର୍ଷୀୟ ଗୁଲ୍ ୨୦୦୩ରେ ଜିମ୍ବାଓ୍ବେ ବିପକ୍ଷ ଦିନିକିଆ ମ୍ୟାଚ୍ ଖେଳି ତାଙ୍କ ଅନ୍ତର୍ଜାତୀୟ କ୍ୟାରିୟର ଆରମ୍ଭ କରିଥିଲେ। ୧୭ ବର୍ଷର ଲମ୍ବା କ୍ୟାରିୟରରେ ସେ କ୍ରିକେଟ୍ର ୩ଟି ଯାକ ଫର୍ମାଟ୍ରେ ମୋଟ୍ ୪୨୭ ଉଇକେଟ୍ ଅକ୍ତିଆର କରିଥିଲେ। ପାକିସ୍ତାନ ପକ୍ଷରୁ ୪୭ ଟେଷ୍ଟ, ୧୩୦ ଦିନିକିଆ ଓ ୬୦ ଟି୨୦ ମ୍ୟାଚ୍ ଖେଳି ଏହା ଡାହାଣହାତୀ ଦ୍ରୁତ ବୋଲର ଯଥାକ୍ରମେ ୧୬୩, ୧୭୯ ଓ ୮୫ ଉଇକେଟ୍ ନେଇଛନ୍ତି।
ୟର୍କର ବଲ୍ ପକାଇବାରେ ମାହିର ଥିବା ଗୁଲ୍ ସେ ସମୟରେ ଭାରତର ଯୁବରାଜ ସିଂଙ୍କୁ ନିଜ ଶାଣିତ ବୋଲିଂରେ ବେଶ୍ ଅସୁବିଧାରେ ପକାଇଥିଲେ। କ୍ରିକେଟ୍ର ୩ଟି ଯାକ ଫର୍ମାଟ୍ରେ ଯୁବରାଜ ଓ ଗୁଲ୍ ପରସ୍ପର ୨୨ ମ୍ୟାଚ୍ ଖେଳିଛନ୍ତି। ଯେଉଁଥିରେ ଗୁଲ୍ ୬ଥର ଯୁବରାଜଙ୍କ ଉଇକେଟ୍ ନେବାରେ ସଫଳ ରହିଥିଲେ। ଟି୨୦ କ୍ରିକେଟ୍ ବିଶ୍ୱକପ୍ର ପ୍ରଥମ ସଂସ୍କରଣ ୨୦୦୭ରେ ସେ ବେଶ୍ ପ୍ରଭାବୀ ବୋଲିଂ କରିଥିଲେ। ନ୍ୟୁଜିଲାଣ୍ଡ ବିପକ୍ଷ ମ୍ୟାଚ୍ରେ ମାତ୍ର ୬ ରନ ବିନିମୟରେ ୫ ଉଇକେଟ୍ ନେଇ ସେ ରେକର୍ଡ କରିଥିଲେ।
