ନୂଆଦିଲ୍ଲୀ,୧୨।୧୧: ଭାରତରେ ଇଲେକ୍ଟ୍ରିକ ଦୁଇ ଚକିଆ ଯାନ ବିଷୟରେ କଥା ହେଲେ ପ୍ରାୟତଃ ଇଲେକ୍ଟ୍ରିକ ସ୍କୁଟର ଦେଖିବାକୁ ମିଳେ। ଇଭି କମ୍ପାନୀଗୁଡିକ ମଧ୍ୟ ଏହାର ବାଇକ୍ ଉପରେ ଦ୍ରୁତ ଗତିରେ କାର୍ଯ୍ୟ କରୁଛନ୍ତି, କିନ୍ତୁ ଇ-ସ୍କୁଟର ତୁଳନାରେ ତାହା କମ। ଆଗାମୀ ଦିନରେ ଆପଣ ଇଲେକ୍ଟ୍ରିକ ବାଇକ୍ର ମଧ୍ୟ ନାନାଦି ବିକଳ୍ପ ମିଳିବା ଆରମ୍ଭ ହେବ। କାରଣ ଅନେକ ଜବରଦସ୍ତ ଇଲେକ୍ଟ୍ରିକ ବାଇକ୍ ଉପରେ କାମ ଚାଲିଛି। ସେଥିମଧ୍ୟରୁ ଗୋଟିଏ ହେଉଛି ଅଲଟ୍ରାଭାଇଓଲେଟ ଏଫ୍୯୯, ନିକଟରେ ଯାହାର ଝଲକ ଦେଖାଯାଇଛି। ଏହା ରେସିଂ ଇଲେକ୍ଟ୍ରିକ ବାଇକ୍ ହେବ, ଯାହାକି ଭାରତୀୟ ବୈଦ୍ୟୁତିକ ଦୁଇ ଚକିଆ ବଜାରର ଦୃଶ୍ୟ ବଦଳାଇ ଦେଇପାରେ।
ଏହି ବାଇକ EICMA ୨୦୨୩ ଇଭେଣ୍ଟରେ ଉନ୍ମୋଚିତ ହୋଇଥିଲା। ଯେତେବେଳେ ଏହା ବଜାରକୁ ଆସିବ ତାହା ଭାରତର ଦ୍ରୁତତମ ଇଲେକ୍ଟ୍ରିକ ବାଇକ ଟାଇଟଲ ହାତେଇବ। ବେଙ୍ଗାଲୁରୁ ଭିତ୍ତିକ ଇଭି କମ୍ପାନୀ ଅଲଟ୍ରାଭାଇଓଲେଟ ଏଫ୍୯୯ ଇଲେକ୍ଟ୍ରିକ ବାଇକ ବିକଶିତ କରିଛି। ଏହା ଦେଶର ପ୍ରଥମ ବୈଦ୍ୟୁତିକ ରେସିଂ ବାଇକ।
ଅଲଟ୍ରାଭାଇଓଲେଟ ଏଫ୍୯୯ ଇଲେକ୍ଟ୍ରିକ ବାଇକ୍ରେ ଦୁଇଟି ଗୁରୁତ୍ୱପୂର୍ଣ୍ଣ ଜିନିଷ ଉପଲବ୍ଧ ରହିଛି। ତାହା ହେଲା ଏୟାର ୱିଣ୍ଡିଶିଲ୍ଡ ଏବଂ ଏୟାର-ବ୍ଲେଡ। ଏୟାର ୱିଣ୍ଡିଶିଲ୍ଡ ଆଗରୁ ଆସୁଥିବା ପ୍ରବଳ ପବନରୁ ଆରୋହୀଙ୍କୁ ସହାୟତା କରିଥାଏ। ସେହିଭଳି ଏୟାର ବ୍ଲେଡ୍ ବାଇକ୍ର ନଇଁବାକୁ ସହଜର କରିଥାଏ। ଏହାର ୯୦ କିଲୋୱାଟ ଇଲେକ୍ଟ୍ରିକ ମୋଟର ଅଛି, ଯେଉଁଥିପାଇଁ ଏହି ବାଇକ ମାତ୍ର ୩ ସେକେଣ୍ଡରେ ଘଣ୍ଟା ପ୍ରତି ୧୦୦ କିଲୋମିଟର ବେଗରେ ଯାଇପାରେ।
ଅଲ୍ଟ୍ରାଭାଇଓଲେଟ ଏଫ୍୯୯ର ଘଣ୍ଟା ପ୍ରତି ୨୬୫ କିଲୋମିଟର ବେଗ ଆପଣଙ୍କୁ ଚକିତ କରିପାରେ। କୌତୁହଳର ବିଷୟ ହେଉଛି ଏହି ବାଇକର ଓଜନ ମାତ୍ର ୧୭୮ କିଲୋଗ୍ରାମ। ଏବେ ଏହାର ମୂଲ୍ୟ ପ୍ରକାଶ କରାଯାଇ ନାହିଁ।
