ମୁମ୍ବାଇ.୧୦।୭: ଶିବସେନାର ନାମ ଏବଂ ନିର୍ବାଚନୀ ଚିହ୍ନକୁ ନେଇ ଲଢେଇ ବର୍ତ୍ତମାନ ସୁପ୍ରିମକୋର୍ଟରେ ଚାଲିଛି। ଏହି ପ୍ରସଙ୍ଗରେ ଉଦ୍ଧବ ଠାକରେଙ୍କ ଆବେଦନ ଶୁଣାଣି କରିବାକୁ ସର୍ବୋଚ୍ଚ ନ୍ୟାୟାଳୟ ଅନୁମତି ଦେଇଛନ୍ତି। ସେପଟେ ମହାରାଷ୍ଟ୍ରର ପୂର୍ବତନ ମୁଖ୍ରମନ୍ତ୍ରୀ ଉଦ୍ଧବ ଠାକରେ ନିର୍ବାଚନ ଆୟୋଗଙ୍କୁ ଟାର୍ଗେଟ କରିଛନ୍ତି। ରାଜ୍ୟର ବିଦର୍ଭ ଅଞ୍ଚଳ ଗସ୍ତ ସମୟରେ ଠାକରେ କହିଛନ୍ତି ଯେ ଦଳର ନାମ ପରିବର୍ତ୍ତନ କରିବାର ଅଧିକାର ନିର୍ବାଚନ ଆୟୋଗଙ୍କ ନିକଟରେ ନାହିଁ।
ଶିବସେନା ଦଳ ଏବଂ ଏହାର ନିର୍ବାଚନୀ ଚିହ୍ନ ଏକନାଥ ଶିନ୍ଦେଙ୍କୁ ଦିଆଯିବା ବିରୋଧରେ ଉଦ୍ଧବ ଠାକରେଙ୍କ ଆବେଦନ ଉପରେ ଶୁଣାଣି କରିବାକୁ ସୁପ୍ରିମକୋର୍ଟ ଅନୁମତି ଦେଇଛନ୍ତି। ଜୁଲାଇ ୩୧ରେ ସୁପ୍ରିମକୋର୍ଟ ଏହି ମାମଲାର ଶୁଣାଣି କରିବେ। ଉଦ୍ଧବଙ୍କ ଆବେଦନରେ ନିର୍ବାଚନ ଆୟୋଗଙ୍କ ନିଷ୍ପତ୍ତିକୁ ରଦ୍ଦ କରିବାକୁ ଦାବି କରାଯାଇଛି।
ସର୍ବୋଚ୍ଚ ନ୍ୟାୟାଳୟ ଏହି ପିଟିଶନର ଶୁଣାଣି କରିବାକୁ ରାଜି ହେବା ପରେ ଶିବସେନା (ୟୁବିଟି) ମୁଖ୍ୟ ଉଦ୍ଧବ ଠାକରେ ନିର୍ବାଚନ ଆୟୋଗଙ୍କୁ ଟାର୍ଗେଟ କରିଛନ୍ତି। ସୋମବାର ସେ କହିଛନ୍ତି, ନିର୍ବାଚନ ଆୟୋଗ (ଇସି) ଗୋଟିଏ ଦଳକୁ ଚିହ୍ନ ବଣ୍ଟନ କରିପାରନ୍ତି, କିନ୍ତୁ ଦଳର ନାଁ ବଦଳାଇବାର କ୍ଷମତା ତାଙ୍କ ପାଖରେ ନାହିଁ। ରାଜ୍ୟର ପୂର୍ବତନ ମୁଖ୍ୟମନ୍ତ୍ରୀ ଏହା ମଧ୍ୟ କହିଛନ୍ତି ଯେ ‘ଶିବସେନା’ ନାମ ତାଙ୍କ ଜେଜେବାପା (କେଶବ ଠାକରେ) ଦେଇଛନ୍ତି ଏବଂ ସେ ଏହାକୁ କାହାକୁ ନେଇଯିବାକୁ ଦେବେ ନାହିଁ।
