ଭୁବନେଶ୍ୱର,୨୧।୧୨(ବ୍ୟୁରୋ): ଦୁଇ ଜଣ ଛାତ୍ରୀଙ୍କୁ ଜଣେ ଟ୍ୟୁଶନ୍ ମାଷ୍ଟର ଅପହରଣ କରିନେଇଥିବା ବଡ଼ଗଡ଼ ଥାନାରେ ଅଭିଯୋଗ ହୋଇଛି। ପରିବାର ଲୋକଙ୍କ ଅଭିଯୋଗ କ୍ରମେ ପୋଲିସ ଟ୍ୟୁଶନ୍ ସାର୍ଙ୍କ ନାଁରେ ଏକ ଅପହରଣ ମାମଲା (ନଂ.୪୩୫/୨୧) ରୁଜୁ କରି ତଦନ୍ତ ଆରମ୍ଭ କରିଛି।
ଟ୍ୟୁଶନ୍ ମାଷ୍ଟର ହେଲେ ଗୋପାଳକୃଷ୍ଣ ବଦାତିଆ। ତାଙ୍କ ଘର ଗଞ୍ଜାମ ଜିଲା ହିଞ୍ଜିଳିକାଟୁ। ସେ ବଡ଼ଗଡ଼ ଥାନା ଅଞ୍ଚଳରେ ଭଡ଼ାଘରେ ରହୁଥିଲେ। ଘରୁ ପଳାଇଥିବା ଛାତ୍ରୀଦ୍ୱୟ ଭଉଣୀ। ସେମାନେ ପରିବାର ସହ ବଡ଼ଗଡ଼ ଥାନା ଅଞ୍ଚଳ ମାଝି ସାହିରେ ରୁହନ୍ତି। ବଡ଼ ଝିଅ ୧୦ମ ଶ୍ରେଣୀରେ ପଢୁଥିବା ବେଳେ ସାନ ଝିଅ ୮ମ ଶ୍ରେଣୀରେ ପଢୁଛନ୍ତି। ଅପରପକ୍ଷରେ ଘଟଣାକୁ ୨ ଦିନ ବିତିଯାଇଥିଲେ ମଧ୍ୟ ୨ ଝିଅଙ୍କ ସନ୍ଧାନ ନ ମିଳିବାରୁ ପରିବାର ଲୋକେ ଭାଙ୍ଗି ପଡ଼ିଛନ୍ତି।
ଛାତ୍ରୀଙ୍କ ସମ୍ପର୍କୀୟମାନେ ମଙ୍ଗଳବାର ବଡ଼ଗଡ଼ ଥାନାରେ ପହଞ୍ଚି ଅଭିଯୁକ୍ତ ଟ୍ୟୁଶନ୍ ସାର୍ ଛାତ୍ରୀଦ୍ୱୟଙ୍କୁ ଅପହରଣ କରିଛନ୍ତି ବୋଲି କହିବା ସହ ତାଙ୍କୁ ଧରିବାକୁ ଦାବି କରିଥିଲେ। ଟିଉସନ୍ ମାଷ୍ଟରଙ୍କ ମୋବାଇଲ୍ ଫୋନ ସୁିଇଚ୍ ଅଫ୍ ରହିଥିବାରୁ ସେ ହିଁ ଛାତ୍ରୀଦ୍ୱୟଙ୍କୁ ଅପହରଣ କରିଥିବା ପୋଲିସ ଏକ ପ୍ରକାର ନିଶ୍ଚିତ ହୋଇଛି। ପୋଲିସ ଟ୍ୟୁଶନ୍ ସାରଙ୍କୁ ଧରିବାକୁ ହିଞ୍ଜିଳାକାଟୁରେ ଥିବା ପୈତୃକ ଘର ଓ ଖୋର୍ଦ୍ଦା ବନମାଳିପୁରରେ ଥିବା ଶଶୁର ଘରେ ଚଢ଼ାଉ କରିଥିଲା। ହେଲେ ପୈତୃକ ଘରକୁ ବହୁତ ଦିନ ହେଲା ଗୋପାଳକୃଷ୍ଣ ଯାଇ ନ ଥିବା ବେଳେ ଶଶୁରଘରକୁ ମଧ୍ୟ ୨ରୁ ୩ ମାସ ହେଲା ସେ ଆସି ନ ଥିବା ତାଙ୍କ ସ୍ତ୍ରୀ ପୋଲିସକୁ କହିଛନ୍ତି।
ଏନେଇ ବଡ଼ଗଡ଼ ଥାନା ଅଧିକାରୀ ବିଶ୍ୱରଞ୍ଜନ ନାୟକ କହିଛନ୍ତି, ଟ୍ୟୁଶନ୍ ମାଷ୍ଟର ହିଁ ୨ ନାବାଳିକା ଝିଅଙ୍କୁ ଅପହରଣ କରିଥିବା ସନ୍ଦେହ କରାଯାଉଛି। ଘଟଣାର ବିଭିନ୍ନ ଦିଗକୁ ନେଇ ତଦନ୍ତ କରାଯାଉଛି। ଖୁବଶ୍ରୀଘ୍ର ଛାତ୍ରୀଦ୍ୱୟଙ୍କ ସନ୍ଧାନ ମିଳିବା ସହ ସନ୍ଦିଗ୍ଧ ଟ୍ୟୁଶନ୍ ମାଷ୍ଟରଙ୍କୁ ଧରାଯିବ।
