ପୁରୁଷୋତ୍ତମପୁର,୧ା୧(ସିମାଞ୍ଚଳ ମିଶ୍ର): ଗଞ୍ଜାମ ଜିଲା ପୁରୁଷୋତ୍ତମପୁର ଥାନା ଅନ୍ତର୍ଗତ ଶିକୁଳା ଗ୍ରାମରେ ହିଂସାକାଣ୍ଡ ପିଛା ଛାଡୁନି। ଗାଁରେ ଗୋଟିଏ ପରେ ଗୋଟିଏ ହିଂସାକାଣ୍ଡ ଘଟିବାରେ ଲାଗିଛି। ଏହି ହିଂସାକାଣ୍ଡ ଘଟଣାମାନ ପୋଲିସ ଲାଗି ଏକପ୍ରକାର ଚ୍ୟାଲେଞ୍ଜ ପାଲଟିଛି। ଗତ ମାର୍ଚ୍ଚ ମାସରେ ପୂର୍ବତନ ସରପଞ୍ଚଙ୍କ ଦେଢ଼ଶୁରଙ୍କୁ ବିଚ୍ ରାସ୍ତାରେ ହାଣି ହତ୍ୟା କରାଯାଇଥିବାବେଳେ ଜଣେ ଯୁବକଙ୍କୁ ସଂଘବଦ୍ଧ ଭାବେ ହାଣି ମରଣାନ୍ତକ ଆକ୍ରମଣ କରିବାର ମାସଟିଏ ବିତି ନ ଥିବାବେଳେ ପୁଣି ଶନିବାର ରାତିରେ ଦୁଇଟି ଦୋକାନକୁ ନିଆଁ ଲଗାଇ ଜାଳିଦେବା ଘଟଣା ଗ୍ରାମରେ ବିବାଦୀୟ ପରିସ୍ଥିତି ଦେଖାଦେଇଛି। ଏଥିନେଇ ରବିବାର କ୍ଷତିଗ୍ରସ୍ତ ଦୋକାନୀ ଦ୍ବୟ ପୋଲିସରେ ଅଭିଯୋଗ କରିଛନ୍ତି। ଏହି ଅଭିଯୋଗକୁ ନେଇ ପୋଲିସ ଘଟଣାସ୍ଥଳକୁ ଯାଇ ତଦନ୍ତ ଚଳାଇଛି। ପଞ୍ଚାୟତ କାର୍ଯ୍ୟାଳୟ ନିକଟରେ ମନୋଜ ଡାକୁଆ ନାମକ ଯୁବକ ଏକ କ୍ୟାବିନ୍ରେ ପାନ ଦୋକାନ କରି ପରିବାର ପୋଷଣ କରୁଥିଲେ। ସବୁଦିନ ଭଳି ସେ ଦୋକାନ ବନ୍ଦ କରି ଘରକୁ ଚାଲିଯାଇଥିବାବେଳେ କେହି ଦୁର୍ବୃତ୍ତ ନିଆଁ ଲଗାଇ ଦୋକାନଟିକୁ ଜାଳିଦେଇଛନ୍ତି। ଫଳରେ ଏଥିରେ ଥିବା ଫ୍ରିଜ୍ ଓ ଲକ୍ଷାଧିକ ଟଙ୍କାର ଜିନିଷପତ୍ର ପୋଡ଼ି ନଷ୍ଟ ହୋଇଯାଇଛି।
ସେହିପରି ହାଇସ୍କୁଲ ନିକଟରେ ଜଳଖିଆ ଦୋକାନ କରିଥିବା କୃଷ୍ଣ ସାହୁଙ୍କ ଦୋକାନକୁ ମଧ୍ୟ ଜାଳି ଦୁର୍ବୃତ୍ତ ଦେଇଛନ୍ତି। ଫଳରେ ଦୋକାନରେ ଥିବା ଲକ୍ଷାଧିକ ଟଙ୍କାର ଆସବାବପତ୍ର ପୋଡ଼ି ନଷ୍ଟ ହୋଇଯାଇଛି। ଏହାକୁ ନେଇ ଲୋକେ ପୁରୁଷୋତ୍ତମପୁର ଦମକଳବାହିନୀକୁ ଖବର ଦେବାରୁ ଦମକଳବାହିନୀ କର୍ମଚାରୀମାନେ ପହଞ୍ଚି ନିଆଁ ଲିଭାଇଥିଲେ।
