ନୂଆପଡା ଅଫିସ,୧୩।୧: ନୂଆପଡା ଜିଲା ବୋଡେନ ଥାନା ଅର୍ଜୁନାଠାରେ ସ୍କୁଟିରୁ ପଡି ୨ଜଣ ଅବସରପ୍ରାପ୍ତ ଶିକ୍ଷକଙ୍କ ମୃତ୍ୟୁ ଘଟିଛି। ମୃତକ ହେଲେ ବୋଡେନ ଥାନା ବାବେବିର ପଞ୍ଚାୟତ ବର୍ତ୍ତନସିଲ ଗ୍ରାମର ଧବଳେଶ୍ୱର ପତି (୬୮) ଏବଂ ମହୁଲପଡ଼ାର ରାମକୃଷ୍ଣ ପଣ୍ଡା (୭୪)। କୌଣସି କାମ ପାଇଁ ସେମାନେ ଏକ ସ୍କୁଟିରେ ବୋଡେନକୁ ଯାଇଥିଲେ। ପୂର୍ବାହ୍ନ ୧ଟାରେ ଘରକୁ ଫେରୁଥିବା ବେଳେ ବୋଡେନ-କରଙ୍ଗାମାଲ ମଝି ଅର୍ଜୁନାଠାରେ ସ୍କୁଟିରୁ ପଡିଯାଇଥିଲେ। ଧବଳେଶ୍ୱରଙ୍କ ଘଟଣାସ୍ଥଳରେ ମୃତ୍ୟୁ ଘଟିଥିବା ବେଳେ ରାମକୃଷ୍ଣଙ୍କୁ ଡାକ୍ତରଖାନା ନେଉଥିବା ବେଳେ ରାସ୍ତାରେ ତାଙ୍କର ମୃତ୍ୟୁ ଘଟିଥିଲା। ଘଟଣାସ୍ଥଳରେ ବୋଡେନ ପୋଲିସ ପହଞ୍ଚତ୍ ମୃତଦେହ ଜବତ କରି ବ୍ୟବଚ୍ଛେଦ ପରେ ପରିବାରବର୍ଗକୁ ହସ୍ତାନ୍ତର କରାଯାଇଛି। ଅନ୍ୟ ଜଣଙ୍କ ମୃତଦେହ ବ୍ୟବଚ୍ଛେଦ ହୋଇନାହିଁ ବୋଲି ବୋଡେନ ଥାନା ଆଇଆଇସି ସୋବାକର ସେଠ ସୂଚନା ଦେଇଛନ୍ତି । ଅନ୍ୟପକ୍ଷେ ଏକ ଡମ୍ଫର ସ୍କୁଟିକୁ ଧକ୍କା ଦେଇ ଫେରାର ହୋଇଯାଇଥିବା ସ୍ଥାନୀୟ ଅଞ୍ଚଳରେ ଚର୍ଚ୍ଚା ହେଉଛି।
