ସିଓଲ, ୧୭।୧ : ଉତ୍ତର କୋରିଆର ଏକଛତ୍ରବାଦୀ ଶାସକ କିମ୍ ଜୋଙ୍ଗ୍ ଉନ୍ ପୁଣି ଥରେ ୨ଟି କ୍ଷେପଣାସ୍ତ୍ର ପରୀକ୍ଷା କରିଛନ୍ତି। ଏନେଇ ଦକ୍ଷିଣ କୋରିଆ ଏବଂ ଜାପାନ ପକ୍ଷରୁ ସୂଚନା ପ୍ରଦାନ କରାଯାଇଛି। ଉତ୍ତର କୋରିଆ ସମୁଦ୍ରକୁ ଆଉ ଦୁଇଟି ସନ୍ଦେହଜନକ କ୍ଷେପଣାସ୍ତ୍ର ନିକ୍ଷେପ କରିଛି।
ଏହା ସହିତ ଉତ୍ତର କୋରିଆ ଦ୍ୱାରା ପରୀକ୍ଷଣ ହୋଇଥିବା କ୍ଷେପଣାସ୍ତ୍ର ସଂଖ୍ୟା ଦୁଇ ସପ୍ତାହ ମଧ୍ୟରେ ୪ କୁ ବୃଦ୍ଧି ପାଇଛି। ଦକ୍ଷିଣ କୋରିଆର ଜଏଣ୍ଟ୍ ଚିଫ୍ ଅଫ୍ ଷ୍ଟାଫ୍ସ୍ କହିଛନ୍ତି ଯେ ଉତ୍ତର କୋରିଆ ସୁନାନ ନାମକ ଅଞ୍ଚଳରୁ ସ୍ବଳ୍ପ ଦୂରଗାମୀ କ୍ଷେପଣାସ୍ତ୍ର ପରୀକ୍ଷଣ କରିଛି। ଏଠାରେ ଏକ ଆନ୍ତର୍ଜାତୀୟ ବିମାନବନ୍ଦର ରହିଛି। ଏହି କ୍ଷେପଣାସ୍ତ୍ର କେତେ ଦୂର ଯାଇଛି ଦକ୍ଷିଣ କୋରିଆ ଏପର୍ଯ୍ୟନ୍ତ ସଠିକ୍ ଭାବେ କୌଣସି ସୂଚନା ପ୍ରଦାନ କରି ନାହିଁ।
ଜାପାନ ଏହା ମଧ୍ୟ କହିଛି ଯେ ଏହି ଉତକ୍ଷେପଣ ବିଷୟରେ ସୂଚନା ମିଳିଛି ଏବଂ ଏହି କ୍ଷେପଣାସ୍ତ୍ରଗୁଡ଼ିକ ବିଷୟରେ ସୂଚନା ସଂଗ୍ରହ ପାଇଁ ପ୍ରଧାନମନ୍ତ୍ରୀ ଫୁମିଓ କିଶିଦା ନିର୍ଦ୍ଦେଶ ଦେଇଛନ୍ତି। ପ୍ରତିରକ୍ଷା ମନ୍ତ୍ରୀ ନୋବୁଓ କିସି କହିଛନ୍ତି ଯେ ଏହି କ୍ଷେପଣାସ୍ତ୍ରଗୁଡିକ ଜାପାନର ସ୍ବତନ୍ତ୍ର ଅର୍ଥନୈତିକ ଅଞ୍ଚଳ ବାହାରେ ପଡିଛି।
ଜାପାନର ମୁଖ୍ୟ କ୍ୟାବିନେଟ ସଚିବ ହିରୋକାଜୁ ମାତ୍ସୁନୋ କହିଛନ୍ତି ଯେ ଜାପାନ ତଥା ଅନ୍ତର୍ଜାତୀୟ ସମୁଦାୟ ଉପରେ ପ୍ରଭାବ ପକାଇଥିବା ଉତ୍ତର କୋରିଆର ସମସ୍ତ କାର୍ଯ୍ୟକୁ ଆମେ ଦୃଢ଼ ନିନ୍ଦା କରୁଛୁ।
ଗତ କିଛି ମାସ ମଧ୍ୟରେ ଉତ୍ତର କୋରିଆ ନୂତନ କ୍ଷେପଣାସ୍ତ୍ରର ପରୀକ୍ଷଣକୁ ତ୍ୱରାନ୍ବିତ କରିଛି।
କେତେକ ବିଶେଷଜ୍ଞ କହିଛନ୍ତି ଯେ କିମ ଜୋଙ୍ଗ ପୁନର୍ବାର କ୍ଷେପଣାସ୍ତ୍ର ପରୀକ୍ଷଣ ରଣନୀତିକୁ ଫେରି ଆସୁଛନ୍ତି। ଯାହାଦ୍ୱାରା ସେ କ୍ଷେପଣାସ୍ତ୍ର ପରୀକ୍ଷା ମାଧ୍ୟମରେ ଧମକ ଦେଇ ଆମେରିକା ଏବଂ ପଡୋଶୀ ଦେଶ ଉପରେ ଚାପ ପକାଇବାକୁ ଚେଷ୍ଟା କରୁଛନ୍ତି। ଏହାପରେ ବୁଝାମଣା କରିବାକୁ ପ୍ରସ୍ତାବ ଦେବାର ଆଶା ମଧ୍ୟ ରହିଛି ବୋଲି ବିଶେଷଜ୍ଞ କହିଛନ୍ତି।
ବେଜିଂର ହାତ ପ୍ୟୋଙ୍ଗୟାଙ୍ଗର ଉତ୍ତେଜନାମୂଳକ ପଦକ୍ଷେପ ପଛରେ ରହିଥିବାରୁ ଅନୁମାନ କରାଯାଉଛି ବୋଲି ବିଶେଷଜ୍ଞ ମତପୋଷଣ କରିଛନ୍ତି। ଚାଇନା ଉତ୍ତର କୋରିଆକୁ ଆର୍ଥିକ ଏବଂ ସାମରିକ ଭାବରେ ଆବଶ୍ୟକ ସହାୟତା ଯୋଗାଇ ଦେଉଥିବାରୁ ଅଭିଯୋଗ ମଧ୍ୟ ହେଉଥିବା ସେମାନେ କହିଛନ୍ତି।
