ଦାରିଙ୍ଗବାଡି, ୧୨/୧ (ଅରୁଣ ସାହୁ ): ମହୋତ୍ସବ ଦେଖିବାକୁ ଆସିଥିବା ଜଣେ ଯୁବକଙ୍କୁ ଅନ୍ୟ ୨ ଜଣ ଯୁବକ ପ୍ରବଳ ମାଡ଼ ମାରିବା ସହ ହତ୍ୟା ଧମକ ଦେଉଥିବା ଦାରିଙ୍ଗବାଡି ଥାନାରେ ଲିଖିତ ଅଭିଯୋଗ ହୋଇଛି । ସେହିପରି ୨ ଯୁବକଙ୍କୁ ମଧ୍ୟ ଆକ୍ରମଣ କରାଯାଇଥିବା ଓ ଘଟଣାକୁ ନେଇ ଉଭୟ ଗୋଷ୍ଠୀ ଦାରିଙ୍ଗବାଡି ଥାନାରେ ଲିଖିତ ଅଭିଯୋଗ କରିଥିବା ଜଣାପଡିଛି । ପ୍ରକାଶ ଯେ ରବିବାର ସନ୍ଧ୍ୟାରେ ଶୀତ ମହୋତ୍ସବର ଉଦ୍ଯାପନୀ ଉତ୍ସବ ରହିଥିଲା । ଏହି ଉଦ୍ଯାପନୀ ଦିବସରେ ମୁଖ୍ୟ ଆକର୍ଷଣ ରହିଥିଲେ ଓଡ଼ିଶାର ସୁନାମଧନ୍ୟ କଳାକାର କଣ୍ଠଶିଳ୍ପୀ ଅସୀମା ପଣ୍ଡା। ତାଙ୍କ ଗୀତ ଶୁଣିବାକୁ ମହୋତ୍ସବ ପଡିଆରେ ପ୍ରବଳ ଭିଡ଼ ଜମିଥିଲା । ସେହିସମୟରେ ଉଭୟ ଗୋଷ୍ଠୀଙ୍କ ମଧ୍ୟରେ କୌଣସି କଥାକୁ ନେଇ ପ୍ରଥମେ କଥାକଟା କଟି ଓ ପରେ ହାତାହାତି ହୋଇଥିଲା। ଏଥିରେ ଉଭୟ ଗୋଷ୍ଠୀର ଏକାଧିଜ ବ୍ୟକ୍ତି ଆହତ ହୋଇଥିବା ନେଇ ଥାନାରେ ଲିଖିତ ଅଭିଯୋଗ ହୋଇଛି ।
ଉଭୟ ଗୋଷ୍ଠୀ ୨ ରାଜନୈତିକ ଦଳର ହୋଇଥିବା ବେଳେ ଏହା ରାଜନୈତିକ ବିବାଦ ନା ବ୍ୟକ୍ତିଗତ ତାହା ପୋଲିସ ତଦନ୍ତ ଚଳାଇଛି । ପ୍ରକାଶ ଯେ ବ୍ରାହ୍ମଣୀଗାଁ ଥାନା ଅଞ୍ଚଳର ବାବୁନି ପଣ୍ଡାଙ୍କୁ ୨ ଜଣ ମୁଥା, ଗୋଇଠା ମାରି ଲହୁ ଲୁହାଣ କରିଥିବା ଓ ହତ୍ୟା ଉଦ୍ୟମ ଏବଂ ରାଜନୈତିକ ଆକ୍ରୋଶରେ ତାଙ୍କୁ ଆକ୍ରମଣ କରାଯାଇଥିବା ଅଭିଯୋଗ ଅଣାଯାଇଛି। ଅନ୍ୟ ଗୋଷ୍ଠୀର ଯୁବକ ପ୍ରତିକ୍ରିୟାରେ କହିଥିଲେ ଯେ, ବାବୁନି କୁଆଡେ ଜୋର ଜବରଦସ୍ତ ଅସୀମାଙ୍କ ଗ୍ରୀନ ରୁମ ଭିତରକୁ ଯାଇ ଫଟୋ ଉଠାଇବାକୁ ପଶିବାକୁ ଉଦ୍ୟମ କରୁଥିବା ବେଳେ ଗ୍ରୀନ ରୁମ ବାହାରେ ଦାୟିତ୍ୱରେ ଥିବା ରୁଦ୍ର ମାଧବ ବେହେରା ଏବଂ ମହେନ୍ଦ୍ର ଦାସ ତାଙ୍କୁ ପ୍ରଥମେ ବାରଣ କରିଥିଲେ । ଏଥିରେ ବାବୁନି ସେମାନଙ୍କୁ ଅଶ୍ମୀଳ ଭାଷାରେ ଗାଳିଗୁଲଜ କରିଥିଲେ ଓ ପରେ ଦୁହିଁଙ୍କ ମଧ୍ୟରେ ହାତାହାତି ହୋଇ ଉଭୟ ଆହତ ହୋଇ ଦାରିଙ୍ଗବାଡି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଚିକିତ୍ସା କରାଇଥିଲେ । ଖବର ଲେଖିବା ସୁଦ୍ଧା ଉଭୟ ଗୋଷ୍ଠୀଙ୍କ ପକ୍ଷରୁ ଥାନାରେ ଅଭିଯୋଗ ହେବା ପରେ ଆଇଆଇସି ସଂଗ୍ରାମ କେଶରୀ ଜେନା ଘଟଣାର ତଦନ୍ତ ଆରମ୍ଭ କରିଥିବା ଜଣାପଡିଛି।
