ବାରିପଦା ଅଫିସ,୨୯ା୧: ମୟୂରଭଞ୍ଜ ଜିଲା ଶିମିଳିପାଳ ବ୍ୟାଘ୍ର ସଂରକ୍ଷଣ ପ୍ରକଳ୍ପ ଉତର ଡିଭିଜନ୍ ତାଳବନ୍ଦ ରେଞ୍ଜରୁ ଗଳିତ ଦନ୍ତାହାତୀର ଦୁଇ ଦାନ୍ତକୁ ପୋଲିସ ଓ ବନବିଭାଗ ମିଳିତ ଭାବେ ଜବତ କରିଛି । ଏ ସଂକ୍ରାନ୍ତରେ ୱାଇଲ୍ଡ ଲାଇଫ ଆକଟ ଅନୁଯାୟୀ ମାମଲା ରୁଜୁ ହେବା ସହ ୪ ଅଭିଯୁକ୍ତଙ୍କୁ ଗିରଫ କରି ତଦନ୍ତ ଜାରି ରଖିଛିି । ଅଭିଯୁକ୍ତମାନେ ହେଲେ ଗୋବିନ୍ଦ ହେମ୍ବ୍ରମ, କୁନାସିଂ ନାଏକ, ରାମରାୟ ଟୁଡୁ ଓ କୁନା ନାଏକ । ଜବତ ହାତୀ ଦାନ୍ତର ଓଜନ ୪୦କିଗ୍ରା ବୋଲି ଏକ ପ୍ରେସ ବିବୃତିରେ ବ୍ୟାଘ୍ର ସଂରକ୍ଷଣ ପ୍ରକଳ୍ପ ଉତର ଡିଭିଜନର ଉପ ନିର୍ଦ୍ଦେଶକ ସାଇ କିରଣ ପ୍ରକାଶ କରିଛନ୍ତି ।
ସୂଚନା ଅନୁଯାୟୀ, ଶନିବାର ବିଳମ୍ବିତ ରାତିରେ ବିଶୋଇ ପୋଲିସ ଓ ବନବିଭାଗ ଅଧିକାରୀ ମିଳିତ ଭାବେ ରୁଗୁଡିଡିହୀ, ମାଟିଆଣି ଓ ତଳକବାଡି ଗାଁରେ ଚଢାଉ କରିଥିଲେ । ରୁଗୁଡିହୀ ଓ ତଳକବାଦିରୁ ଦୁଇଟି ଦାନ୍ତ ମିଳିଥିବା ବେଳେ ମୋଟ ୪ଜଣ ଅଭିଯୁକ୍ତଙ୍କୁ ଗିରଫ କରିଥିଲେ । ଗୋଟିଏ ଦାନ୍ତ ମୁଖ୍ୟ ଅଭିଯୁକ୍ତ ଗୋବିନ୍ଦ ହେମ୍ବ୍ରମଙ୍କ ନଡା ଗଦାରୁ ମିଳିଥିବା ବେଳେ ଆଉ ଗୋଟିଏ ଅଭିଯୁକ୍ତ ମାତାଲଙ୍କ ଘରପଛ ବିଲ ଖୋଲି ମାଟି ତଳୁ ମିଳିଥିଲା । ତେବେ ଘଟଣାର ତଦନ୍ତ ଚାଲିଥିବା ବେଳେ ଅନ୍ୟ କେଉଁମାନେ ଜଡିତ ରହିଛନ୍ତି ତାହାକୁ ନେଇ ତନାଘନା ଜାରି ରହିଛି ।
