କରାଚି,୧୪।୧୧: ଜିମ୍ବାଓ୍ବେ ସହ ସିରିଜ ଶେଷ ହେବା ପରେ ପାକିସ୍ତାନ ସୁପର ଲିଗ୍(ପିଏସ୍ଏଲ୍ ୨୦୨୦)ର ଚାରିଟି ମ୍ୟାଚ୍ ଖେଳାଯିବାର ଅଛି। କୋଭିଡ ପାଇଁ ଏହାକୁ ସ୍ଥଗିତ କରାଯାଇଥିଲା। ଏହି ଲିଗ୍ ଖେଳିବା ପାଇଁ ଖେଳାଳିମାନେ ପହଞ୍ଚିବା ଆରମ୍ଭ କରିଛନ୍ତି। ଏହି କ୍ରମରେ ଆଇପିଏଲ୍ରେ ମୁମ୍ବାଇ ଇଣ୍ଡିଆନ୍ସ ଟିମ୍ରେ ସାମିଲ ଥିବା ଓ୍ବେଷ୍ଟଇଣ୍ଡିଜ୍ର ଯୁବ କ୍ରିକେଟର ଶରଫେନ ରଦରଫୋର୍ଡ ପହଞ୍ଚିଥିଲେ। ସେ କ୍ରିସ୍ ଜୋର୍ଦନଙ୍କ ସ୍ଥାନରେ ଖେଳିବା ପାଇଁ ଯାଉଛନ୍ତି। ତେବେ ରଦରଫୋର୍ଡ ପାକିସ୍ତାନରେ ପହଞ୍ଚିବା ପରେ ତାଙ୍କର ଫଟୋ କରାଚି କିଗ୍ସ ପକ୍ଷରୁ ଶେୟାର କରାଯାଇଥିଲା। ଫଟୋଟି ବେଶ୍ ଭାଇରାଲ ହେଉଛି। ସେ ପିନ୍ଧିଥିବା ଜର୍ସି ଏବଂ କିଟ୍କୁ ନେଇ ଲୋକ ଭିନ୍ନ ଭିନ୍ନ ପ୍ରତିକ୍ରିୟା ଦେଉଛନ୍ତି।
ଆଇପିଏଲ୍ ଶେଷ ହେବା ପରେ ୟୁଏଇରୁ ସିଧା ପାକିସ୍ତାନ ପହଞ୍ଚିଥିଲେ ରଦରଫୋର୍ଡ। ବିମାନବନ୍ଦରରେ ପହଞ୍ଚିବା ବେଳେ ସେ ମୁମ୍ବାଇ ଇଣ୍ଡିଆନ୍ସର ଜର୍ସି ପିନ୍ଧିଥିଲେ। ଏହା ଦେଖି ଲୋକେ ଜର୍ସି ତ ଦେଇ ଦେଇଥାନ୍ତ ବୋଲି କହୁଥିବା ଦେଖାଯାଉଛି।
୨୨ ବର୍ଷୀୟ ରଦରଫୋର୍ଡଙ୍କୁ ଚଳିତ ଆଇପିଏଲ୍ରେ ସୁଯୋଗ ମିଳି ନ ଥିଲା। ହେଲେ ସେ ଟିମ୍ରେ ସାମିଲ ଥିଲେ। ୨୦୨୦ରେ ମୁମ୍ବାଇ ଇଣ୍ଡିଆନ୍ସ ଟାଇଟଲ ଜିତିବା କାରଣରୁ ରଦରଫୋର୍ଡଙ୍କ ପାଇଁ ଖୁସିର ମୂହର୍ତ୍ତ ଥିଲା।
