ନୂଆଦିଲ୍ଲୀ,୨୦।୧୨: ଦୀର୍ଘ ସମୟ ଧରି ଟୁଇଟରକୁ ‘ନୀଳ ପକ୍ଷୀ’ ବୋଲି କୁହାଯାଉଥିଲା। କିନ୍ତୁ ନିକଟରେ ଏଲୋନ ମସ୍କଙ୍କ ପ୍ରବେଶ ପରେ ଏହି ସୋସିଆଲ ମିଡିଆ ପ୍ଲାଟଫର୍ମ ସବୁକିଛି ବଦଳି ଯାଇଛି। ସମ୍ପ୍ରତି କମ୍ପାନୀ ନୂଆ ଘୋଷଣା କରିଛି। ତଦନୁଯାୟୀ ଉପଭୋକ୍ତାମାନେ ଏଣିକି ଭେରିଫିକେଶନ ଲାଗି ନୀଳ ରଙ୍ଗ ବ୍ୟତୀତ ଭିନ୍ନ ରଙ୍ଗର ଟିକ୍ ପାଇବେ। ଏବେଠାରୁ ତାହା ମଧ୍ୟ ଦୃଶ୍ୟମାନ ହେବା ଆରମ୍ଭ ହୋଇଛି। ଅନେକ ସରକାରୀ କର୍ମଚାରୀ ଏବଂ ଅନୁଷ୍ଠାନକୁ ବର୍ତ୍ତମାନ ଧୂସର(ଗ୍ରେ) ଟିକ୍ର ଭେରିଫିକେଶନ ଦିଆଯାଇଛି।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସମେତ ବିଶ୍ୱର ବହୁ ପ୍ରସିଦ୍ଧ ବ୍ୟକ୍ତିଙ୍କ ପ୍ରୋଫାଇଲରେ ଏହି ଧୂସର(ଗ୍ରେ) ଟିକ୍ ଦେଖିବାକୁ ମିଳୁଛି। ହେଲେ ପୂର୍ବଭଳି ନୀଳ ଟିକ୍ ଦେଶର ଅନ୍ୟ ବଡ ନେତା ତଥା ଅନୁଷ୍ଠାନମାନଙ୍କ ଆକାଉଣ୍ଟରେ ଦୃଶ୍ୟମାନ ହେଉଛ। ଏଥିରୁ ସ୍ପଷ୍ଟ ହୋଇଛି ଯେ ବର୍ତ୍ତମାନ ଏହି ଅପଡେଟ ସମସ୍ତଙ୍କ ପାଇଁ ଉପଲବ୍ଧ କରାଯାଇନାହିଁ। ଏଣୁ କିଛି ଦିନ ମଧ୍ୟରେ ଟୁଇଟରରେ ଅନ୍ୟ ଲୋକଙ୍କ ଭେରିଫିକେଶନ ଷ୍ଟାଟ୍ସ ବଦଳିବ ବୋଲି ଆଶା କରାଯାଉଛି।
-କିଏ କେଉଁ ଟିକ୍ ପାଇବ?
ନିକଟରେ ଟୁଇଟର ଦାୟିତ୍ୱ ଗ୍ରହଣ କରିଥିବା ଟେସଲା ଏବଂ ସ୍ପେସ ଏକ୍ସର ଏଲୋନ ମସ୍କ କହିଛନ୍ତ, ତିନୋଟି ଟିକ ବିଭିନ୍ନ ବର୍ଗ ପାଇଁ ଉପଲବ୍ଧ ହେବ। କମ୍ପାନୀଗୁଡିକୁ ଗୋଲ୍ଡେନ୍ ଟିକ ଦିଆଯିବ, ସରକାରଙ୍କ ପାଇଁ ଧୂସର(ଗ୍ରେ) ଟିକ୍ ରହିବ। ବାକି ସେହି ପୁରୁଣା ନୀଳ ଟିକ୍ ଅନ୍ୟ ଲୋକଙ୍କୁ ଦିଆଯିବ।
