କାନପୁର,୨୦ା୪: ଉତ୍ତରପ୍ରଦେଶର କାନପୁରରେ ଜଣେ ୪୮ ବର୍ଷୀୟ ବ୍ୟକ୍ତି ତାଙ୍କ ୧୧ ବର୍ଷର ୨ ଯମଜ ଝିଅଙ୍କ ଗଳାକାଟି ହତ୍ୟା କରିବା ପରେ ପୋଲିସ ନିକଟରେ ଆତ୍ମସମର୍ପଣ କରିଛନ୍ତି। ମେଡିକାଲ ରିପ୍ରେଜେଣ୍ଟେଟିଭ୍ ଭାବେ କାର୍ଯ୍ୟ କରୁଥିବା ଅଭିଯୁକ୍ତ ଶଶୀରଞ୍ଜନ ମିଶ୍ରା ୨ ଝିଅଙ୍କୁ ହତ୍ୟା କରିଥିବା ପୋଲିସକୁ ଡାକି କହିଥିଲେ। ଶଶୀଙ୍କ ଘର ବିହାର ହୋଇଥିବାବେଳେ ସେ ତାଙ୍କ ସ୍ତ୍ରୀ ରେଶମା, ୨ ଯାଆଁଳା ଝିଅ ରିଦ୍ଧି ଓ ସିଦ୍ଧି ଏବଂ ୬ ବର୍ଷର ପୁଅ ସହ କାନପୁରରେ ରହୁଥିଲେ। ସ୍ତ୍ରୀଙ୍କ ପରକୀୟା ପ୍ରୀତି ରହିଥିବା ନେଇ ଶଶୀ ସନ୍ଦେହ କରିଆସୁଥିଲେ। ରେଶମାଙ୍କ କହିବା ଅନୁଯାୟୀ, ଶଶୀ ବିଚଳିତ ରହିବା ସହ ଘର ଭିତରେ ଅନେକ ସିସିଟିଭି କ୍ୟାମେରା ଲଗାଇଥିଲେ। ସେ ରେଶମାଙ୍କୁ ତାଙ୍କ ଝିଅମାନଙ୍କ ପ୍ରକୋଷ୍ଠରେ ପୂରାଇ ଦେଉ ନ ଥିଲେ। ଶନିବାର ରାତିରେ ଖାଇସାରିବା ପରେ ଶଶୀ ୨ ଝିଅଙ୍କୁ ନେଇ ଶୋଇବାକୁ ଯାଇଥିଲେ। ରାତି ସାଢ଼େ ୨ଟା ବେଳେ ସେ ଜଣେ ଝିଅଙ୍କୁ ନେଇ ଓ୍ବାଶରୁମ୍ ଯାଇଥିଲେ। ପରେ ରୁମ୍କୁ ଫେରିଆସି ଲାଇଟ୍ ଲିଭାଇ ଦେଇଥିଲେ। ଏହାର ୨ ଘଣ୍ଟା ପରେ ସେ ପୋଲିସ ଜରୁରୀ ସେବା ନମ୍ବରରେ ଫୋନ୍ କରି ଡାକିବା ସହ ୨ ଝିଅଙ୍କୁ ହତ୍ୟା କରିଥିବା କହିଥିଲେ।